​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ លោក បឺ​ណាត អា​ណុល (Bernard Arnault) ដែល​ជា​មហាសេដ្ឋី​បារាំង​នៅ​ពីក្រោយ​ក្រុមហ៊ុន​មហាអំណាច​ទំនិញ​ប្រណីត LVMH បាន​វ៉ា​ដាច់​ម្ចាស់ Twitter លោក អេ​ឡុន ម៉ាស នៅ​លើស​ន្ទ​ស្សន៍​មហាសេដ្ឋី Bloomberg កាលពី​ថ្ងៃ​អង្គារ​ទី​១៣​ធ្នូ ដោយ​កត់សម្គាល់​ជា​លើក​ទី​មួយ​ដែល​លោក​បាន​ជាប់​ចំណាត់​ថ្នាក់​កំពូល​នៃ​បញ្ជី​អ្នក​មាន​បំផុត​។ ​តាម​ពិត​មិន​ដែល​ធ្លាប់​មាន​នរណាម្នាក់​មក​ពី​ប្រទេស​បារាំង​ឬ​អឺរ៉ុប​ទាំងមូល​មាន​ទ្រព្យសម្បត្តិ​ច្រើន​បំផុត​នៅលើ​ភពផែនដី​នោះទេ​។​

​បុរស​អាយុ ៧៣ ឆ្នាំ​រូប​នេះ​បាន​ស្ថិតក្នុង​តារាង​ចំណាត់ថ្នាក់​អ្នក​មាន​ទ្រព្យសម្បត្តិ​ស្តុកស្តម្ភ​ជា​យូរ​មក​ហើយ ប៉ុន្តែ​ខុស​ពី​លោក​ម៉ាស​និង​មហាសេដ្ឋី​ដទៃទៀត លោក​កម្រ​បង្ហាញ​មុខ​ជា​សាធារណៈ​ណាស់​ហើយ​​មិន​ដែល​មាន​សកម្មភាព​ផ្ទាល់ខ្លួន​នៅ​លើ​បណ្តាញ​សង្គម​នោះទេ​។ ទោះបីជា​ក្រុមហ៊ុន LVMH Moet Hennessy Louis Vuitton មាន​មុខមាត់​ជា​យីហោ​នៃ​ប្រណីតភាព​អស្ចារ្យ​ពេក​ក្រៃ​ដោយ​​មាន​យីហោ​ចំនួន ៧៥ រាប់​ចាប់ពី​ម៉ាក Dom Perignon រហូត​ដល់​ម៉ាក Christian Dior និង​ម៉ាក Tiffany & Co ក៏ដោយ ក៏​លោក​មិន​ចង់​បង្ហាញ​មុខមាត់​នៅក្នុង​ប្រទេស​មួយ​ដែល​​ស្អប់​ការ​សម្ញែង​ទ្រព្យសម្បត្តិ​នោះ​ឡើយ​។​

​លោក​អា​ណុល ដែល​មាន​ទ្រព្យសម្បត្តិ​ប្រមាណ ១៧០,៨ ពាន់​លាន​ដុល្លារ​អាម៉េរិក បាន​ប្រើប្រាស់​សិល្បៈ​ហត្ថកម្ម​របស់​អឺរ៉ុប​ដើម្បី​ប្រែក្លាយ​ក្រុមហ៊ុន LVMH​ទៅ​ជា​ក្រុមហ៊ុន​ពហុ​ទំនិញ​ប្រណីត​ដ៏​ធំ​បំផុត​របស់​​ពិភពលោក​។ វា​ជា​កន្លែង​ហ្វឹកហាត់​សម្រាប់​អ្នក​រចនា​ម៉ូត ដែល​មាន​មហិច្ឆតា​ចង់​បង្កើត​កេរ្តិ៍ឈ្មោះ​សម្រាប់​ខ្លួនគេ តួយ៉ាង​ដូចជា លោក ម៉ាក ចា​កូប (Marc Jacobs) និង​សព​លោក វើជី​ល អាប់​ឡូ (Virgil Abloh) នៅ​ក្រុមហ៊ុន Louis Vuitton, លោក រ៉ា​ហ្វ សាយ​ម៉ុន (Raf Simons) នៅ​ក្រុមហ៊ុន Christian Dior និង លោក ហ្វូ​បេ ហ្វី​ឡូ (Phoebe Philo) នៅ​ក្រុមហ៊ុន Celine​។ ពួកគេ​ទាំងអស់​នេះ​បាន​បញ្ចូល​ឱ្យ​យីហោ​ល្បី​ទាំងនេះ​នូវ​ភាព​ថ្មីថ្មោង ដែល​រក្សា​ក្រុមហ៊ុន​ឱ្យនៅតែ​ពាក់ព័ន្ធ​ជាមួយ​អ្នកប្រើប្រាស់​វ័យក្មេង​។​

​ខណៈ​ទីផ្សារ​ចុះខ្សោយ​ក៏​បាន​បង្ហូត​ទ្រព្យសម្បត្តិ​របស់​លោក​អា​ណុល​ចេញ​នៅ​ឆ្នាំ​នេះ ពោលគឺ​ថយចុះ ៧,២ ពាន់​លាន​ដុល្លារ​ក្នុង​ឆ្នាំ ២០២២ លោក​នៅ​តែ​ធ្វើ​បាន​ល្អប្រសើរ​ជាង​ពួក​មហាសេដ្ឋី​បច្ចេកវិជ្ជា ដែល​គ្របដណ្តប់​លើ​បញ្ជី​អ្នក​មាន​បំផុត​នៅលើ​ពិភពលោក​។ នោះ​គឺ​ដោយសារ​តែ​តម្រូវការ​នៅតែ​មាន​ភាពរឹងមាំ​សម្រាប់​ផលិតផល​លំដាប់​ខ្ពស់ ខណៈ​វិបត្តិកូ​វីដ​១៩​បាន​ធូរស្រាល​។​

​ក្រុមហ៊ុន LVMH ដែល​មាន​មូលដ្ឋាន​នៅ​ទីក្រុង​ប៉ារីស រកចំណូលបាន ៦៤ ពាន់​លាន​អឺរ៉ូ​ក្នុង​ការលក់​កាលពី​ឆ្នាំមុន ដែល​ជា​ការ​ស្ទុះ​ងើប​ឡើងវិញ​យ៉ាង​ខ្លាំង​ពី​ការធ្លាក់ចុះ​ប្រឹប​ដោយសារ​ជំងឺ​រាតត្បាត​ក្នុង​ឆ្នាំ ២០២០​។ លោក​អា​ណុល​និង​ក្រុមគ្រួសារ​របស់​គាត់​មាន​ភាគហ៊ុន​ប្រហែល ៤៨ ភាគរយ​នៅក្នុង​ក្រុមហ៊ុន ជាមួយ​នឹង​សិទ្ធិ​បោះឆ្នោត ៦៤ ភាគរយ នេះ​បើ​យោងតាម​របាយការណ៍​ប្រចាំឆ្នាំ​របស់​ក្រុមហ៊ុន​។​

​កើត​នៅ​ទីក្រុង​រូបេក (Roubaix) ភាគ​ខាងជើង​ប្រទេស​បារាំង​ក្នុង​ឆ្នាំ ១៩៤៩ លោក​អា​ណុល​បាន​បញ្ចប់​ការសិក្សា​ពី​សាលា​វិស្វកម្ម​វរជន Polytechnique​។​លោក​បាន​បន្ត​ធ្វើការ​នៅ​អាជីវកម្ម​​គ្រួសារ​គឺ​ក្រុមហ៊ុន Ferret Savinel ដែល​ផ្តោត​លើ​សំណង់​ឧស្សាហកម្ម មុន​ពេល​ផ្លាស់​ទៅ​រស់នៅ​សហរដ្ឋ​អាម៉េរិក​ក្នុង​ឆ្នាំ ១៩៨១ ជា​កន្លែង​ដែល​គាត់​ប្រថុយ​រកស៊ី​ខាង​អភិវឌ្ឍន៍​អចលនទ្រព្យ​។​

​លោក​បាន​ត្រឡប់​មក​បារាំង​វិញ ហើយ​ឈាន​ជើង​ចូលទៅក្នុង​វិស័យ​ទំនិញ​ប្រណីត​ក្នុង​ឆ្នាំ ១៩៨៤ នៅពេល​ដែល​គាត់​កាន់កាប់​ក្រុមហ៊ុន Boussac Saint-Freres ជា​ក្រុមហ៊ុន​វាយ​ន​ភណ្ឌ​ក្ស័យធន ដែល​ជា​ម្ចាស់​លើ​ម៉ាក​យីហោ​កាបូប Christian Dior ។ លោក​បាន​កែច្នៃ​ប្រភេទ​អាជីវកម្ម​ភាគច្រើន​របស់​ក្រុមហ៊ុន ហើយ​ក្នុង​ឆ្នាំ ១៩៨៩​បាន​ប្រើប្រាស់​វិបត្តិ​ដើម្បី​ទិញ​ភាគហ៊ុន​គ្រប់គ្រង​នៅ​ក្នុង​​ក្រុមហ៊ុន LVMH ដែល​ក្រុមហ៊ុន​សំខាន់​ពីរ​របស់​ខ្លួន គឺ Louis Vuitton និង Moet Hennessy បាន​ច្រចាប់​បញ្ចូល​គ្នា​ក្នុង​ឆ្នាំ ១៩៨៧​។​

​ក្នុង​រយៈពេល​បី​ទសវត្សរ៍​បន្ទាប់ លោក​បាន​ប្រែក្លាយ​ក្រុមហ៊ុន LVMH ទៅ​ជា​កន្លែង​លក់​ស្រា​សំប៉ាញ ស្រា​ក្រហម ស្រា​គោ​ញាក់ សម្លៀក​បំពាក់ ឈុត​ធ្វើ​ពី​ស្បែក នាឡិកា គ្រឿងអលង្ការ ការ​ស្នាក់​នៅ​សណ្ឋាគារ ទឹកអប់ និង​គ្រឿងសម្អាង តាមរយៈ​ហាង​ជាង ៥.៥០០ នៅ​ទូទាំង​ពិភពលោក​។ លោក​បាន​ដឹង​មុន​គេ​ថា​ប្រទេស​ចិន​នឹង​ក្លាយ​ជា​ទីផ្សារ​សំខាន់ ហើយ​ក៏​ប្រញាប់​បើក​ហាង Louis Vuitton ដំបូង​គេ​ក្នុង​ទីក្រុង​ប៉េកាំង​ក្នុង​ឆ្នាំ ១៩៩២​។​

LVMH ដែល​មាន​តម្លៃ​ទីផ្សារ ៣៦៥,៧ ពាន់​លាន​អឺរ៉ូ ដែល​ជា​តម្លៃ​ទីផ្សារ​ធំ​បំផុត​នៅ​អឺរ៉ុប​កាលពីដើមឆ្នាំ​នេះ បាន​ដកចេញ​ដែន​កំណត់​នៃ​អាយុ​របស់​នាយក​ប្រតិបត្តិ​របស់​ខ្លួន​។ នោះ​នឹង​អនុញ្ញាតឱ្យ​លោក​អា​ណុល​បន្ត​កាន់​តំណែង​នេះ​រហូតដល់​អាយុ ៨០ ឆ្នាំ ជា​សញ្ញា​មួយ​បង្ហាញថា លោក​មាន​បំណង​ចង់​កាន់​តំណែង​នេះ​យូរ​ជាង​នេះ​ទៀត​។​

​ក្នុងការ​ខិតខំ​ដើម្បី​គេចចេញ​ពី​ភាពលេច​មុខមាត់​ជា​សាធារណៈ លោក​អា​ណុល​បាន​និយាយ​កាលពី​ខែ​តុលា​ថា ក្រុមហ៊ុន LVMH បាន​លក់​យន្តហោះ​ឯកជន​របស់​ខ្លួន​ហើយ​។ គណនី Twitter ជាច្រើន​បាន​តាមដាន​យន្តហោះ​របស់​ពួក​មហាសេដ្ឋី​ក្នុង​ការប៉ុនប៉ង​ធ្វើ​ឱ្យ​ពួកគេ​អាម៉ាស់មុខ​ចំពោះ​ការបំភាយ​កា​បូន ហើយ​ប្រធានបទ​នេះ​បាន​ក្លាយជា​ប្រធានបទ​ក្តៅ​នៅក្នុង​ប្រទេស​បារាំង ដោយ​មាន​អ្នកនយោបាយ​មួយចំនួន​បាន​ស្នើ​ឱ្យ​ហាមឃាត់​ឬ​បង់ពន្ធ​ឱ្យ​ច្រើន​លើ​យន្តហោះ​ឯកជន​។​

​លោក​អា​ណុល​បាន​និយាយ​នៅ​លើ​វិទ្យុ Radio Classique ដែល​ជា​កម្មសិទ្ធិ​របស់​ក្រុមហ៊ុន LVMH ថា “​ជាមួយនឹង​សាច់រឿង​ទាំងអស់នេះ ក្រុមហ៊ុន​មាន​យន្តហោះ​មួយគ្រឿង ហើយ​យើង​បាន​លក់​វា​ហើយ​។ លទ្ធផល​ឥឡូវ​គឺថា​គ្មាន​អ្នកណា​ម្នាក់​អាច​មើលឃើញ​ថា​ខ្ញុំ​ទៅ​ទីណា​នោះទេ ព្រោះ​ខ្ញុំ​ជួល​យន្តហោះ​គេ ពេល​ខ្ញុំ​ប្រើ​យន្តហោះ​ឯកជន​”៕

​លោក បឺ​ណាត អា​ណុល ឥឡូវ វ៉ា​ដាច់ អេ​ឡុន ម៉ាស ក្លាយជា​មនុស្ស​មានទ្រព្យ​ធន​ច្រើន​បំផុត​លើ​លោក​