​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អ្នកការទូត​អង្គការសហប្រជាជាតិ​(​អ​.​ស​.​ប​) ដែល​មាន​ព័ត៌មាន​ច្បាស់ការ​ពីររូប បាន​និយាយ​កាលពី​ថ្ងៃ​ពុធ​ទី​១៤​ធ្នូ​ថា​គណៈកម្មាធិការ​ដ៏​សំខាន់​មួយ​របស់​​អ​.​ស​.​ប​បាន​រារាំង​របប​យោធា​មី​យ៉ាន់​ម៉ា​ជាថ្មី​ម្តង​ទៀត​ពី​ការទទួលបាន​អាសនៈ​របស់​ប្រទេស​នេះ​នៅ​អ​.​ស​.​ប​។​

​ក្រុម​អ្នកការទូត​បាន​និយាយថា គណៈកម្មាធិការ​សារតាំង​របស់​មហាសន្និបាត​បាន​ជួបប្រជុំ​កាលពី​ថ្ងៃ​ចន្ទ ហើយ​បាន​ពន្យារ​ពេល​សកម្មភាព​លើ​សំណើ​របស់​របប​យោធា​ដោយនិយាយ​ក្នុង​លក្ខខណ្ឌ​មិន​​បញ្ចេញ​ឈ្មោះ នៅ​មុន​ពេល​ការប្រកាស​ជា​ផ្លូវការ​ដែល​ទំនង​ធ្វើ​នៅ​ចុង​សប្តាហ៍​នេះ​។​

​ការសម្រេចចិត្ត​នេះ​មានន័យថា លោក ក្យ​រ ម៉ូ ទុន (Kyaw Moe Tun) ដែលជា​ឯកអគ្គរដ្ឋទូត​មី​យ៉ាន់​ម៉ា​នៅ​អ​.​ស​.​ប​នៅពេលដែល​យោធា​បាន​បណ្តេញ​មេដឹកនាំ​ស៊ីវិល​លោកស្រី អ៊ុង​សាន ស៊ូ​ជី កាលពី​ថ្ងៃទី ១ ខែ​កុម្ភៈ ឆ្នាំ ២០២១ នឹង​នៅតែ​បន្ត​ការងារ​ដដែល​។​

លោក ក្យ​រ ម៉ូ ទុន នៅជា​ឯកអគ្គរដ្ឋទូត​មី​យ៉ាន់​ម៉ា​នៅ​អ​.​ស​.​ប

​កាលពី​ខែ​ធ្នូ​ឆ្នាំមុន មេដឹកនាំ​យោធា​របស់​មី​យ៉ាន់​ម៉ា​ក៏​បាន​បរាជ័យ​ក្នុង​កិច្ចខិតខំ​ប្រឹងប្រែង​របស់​ពួកគេ​ដើម្បី​ជំនួស​លោកទុន​ផងដែរ​ដែល​នៅតែ​ជា​អ្នក​គាំទ្រ​រដ្ឋាភិបាល​មុន​និង​រដ្ឋាភិបាល​រួបរួម​​ជាតិ​ដែល​ប្រឆាំង​នឹង​របប​យោធា​។​

​លោក គ្រីស ហ្គា​ន់​ណេ​ស (Chris Gunness)​នាយក​គម្រោង​គណនេយ្យ​ភាព​មី​យ៉ាន់​ម៉ា ដែល​មាន​មូលដ្ឋាន​នៅ​ទីក្រុង​ឡុង​ដ៍ បាន​ស្វាគមន៍​ចំពោះ​ចំណាត់ការ​របស់​គណៈកម្មាធិកា​រ​សារតាំង​ដោយ​​និយាយថា វា​មាន “​សារៈសំខាន់​ខាង​ការទូត​និង​ជា​និមិត្តរូប​ដ៏​អស្ចារ្យ នៅ​គ្រា​ដែល​មេដឹកនាំ​រដ្ឋប្រហារ​ខុស​ច្បាប់​កំពុង​ព្យាយាម​ទទួលបាន​ការទទួលស្គាល់​ពី​អន្តរជាតិ​”​។​

​លោក​ហ្គា​ន់​ណេ​ស​បាន​និយាយ​នៅក្នុង​សេចក្តីថ្លែងការណ៍​មួយ​ថា “​ឧត្តមសេនីយ៍មីន អ៊ុង​ហ្លាំង (Min Aung Hlaing)​បាន​បង្ក​អំពើហិង្សា​លើ​ប្រជាជន​មី​យ៉ាន់​ម៉ា​ក្នុង​កម្រិត​មួយ​ដែល​មិន​ធ្លាប់​ឃើញ​​នៅក្នុង​តំបន់​អាស៊ីអាគ្នេយ៍​ចាប់តាំងពី ប៉ុល ពត បាន​បញ្ចេញ​នូវ​រជ្ជកាល​នៃ​អំពើ​ភេរវកម្ម​របស់​ខ្មែរ​ក្រហម​មក​លើ​ប្រទេស​កម្ពុជា​”​។​

​លោក ដា​មៀន លី​លី (Damian Lilly) ជា​មន្ត្រី​គម្រោង​គណនេយ្យភាព បាន​ជំរុញ​ឱ្យ​អ​.​ស​.​ប​ធានាថា លោក​ទុន​មាន​សិទ្ធិ​និង​ឯកសិទ្ធិ​ទាំងអស់​របស់​អ​.​ស​.​ប ហើយ​ថា​រដ្ឋាភិបាល​ឯកភាព​ជាតិ “​ត្រូវបាន​អនុញ្ញាត​ឱ្យ​តំណាង​ឱ្យ​ប្រទេស​មី​យ៉ាន់​ម៉ា​នៅក្នុង​ស្ថាប័ន​អ​.​ស​.​ប​ទាំងអស់​”​។​

​លោក​បាន​និយាយថា “​ពេលនេះ​មាន​ភាព​មិន​ស៊ីសង្វាក់​គ្នា​គួរឱ្យកត់សម្គាល់​” ខណៈ​លោក​ទុន​កំពុង​អង្គុយ​ក្នុង​មហាសន្និបាត​ដែល​មាន​សមាជិក​ចំនួន ១៩៣ រូប ខណៈ​កៅអី​របស់​មី​យ៉ាន់​ម៉ា​នៅ​ក្រុមប្រឹក្សា​សិទ្ធិមនុស្ស​អ​.​ស​.​ប​គឺ​ទទេ​៕

គណៈកម្មាធិការ​សារតាំង​របស់​មហាសន្និបាត​បាន​ជួបប្រជុំ​កាលពី​ថ្ងៃ​ចន្ទ ហើយ​បាន​ពន្យារ​ពេល​សកម្មភាព​លើ​សំណើ​របស់​របប​យោធា​ដោយនិយាយ​ក្នុង​លក្ខខណ្ឌ​មិន​​បញ្ចេញ​ឈ្មោះ នៅ​មុន​ពេល​ការប្រកាស​ជា​ផ្លូវការ​ដែល​ទំនង​ធ្វើ​នៅ​ចុង​សប្តាហ៍​នេះ​