​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រធានាធិបតី ចូ បៃ​ដិន បាន​ប្រាប់​មេដឹកនាំ​អាហ្វ្រិក​រាប់សិប​នាក់​ដែល​បាន​ជួបជុំគ្នា​នៅ​ទីក្រុង​វ៉ាស៊ីនតោន​ថា សហរដ្ឋ​អាម៉េរិក​”​ចូល​ទៅ​ទាំងស្រុង​ក្នុង​អនាគត​​របស់​ទ្វីបអាហ្វ្រិក​” ដោយ​បាន​ដាក់ចេញ​នូវ​មូលនិធិ​រដ្ឋាភិបាល​ដែល​បាន​សន្យា និង​ការវិនិយោគ​ឯកជន​រាប់​ពាន់​លាន​កាលពី​ថ្ងៃ​ពុធ ដើម្បី​ជួយ​ឱ្យ​ទ្វីប​នេះ​រីក​ចម្រើន​ខាង​ផ្នែក​សុខភាព ហេដ្ឋារចនាសម្ព័ន្ធ អាជីវកម្ម និង​បច្ចេកវិជ្ជា​។​

​ដោយ​បង្ហាញ​ពី​ចក្ខុវិស័យ​របស់​គាត់​នៅ​ឯ​កិច្ចប្រជុំ​កំពូល​មេដឹកនាំ​អាម៉េរិក​-​អាហ្វ្រិក​រយៈពេល​បី​ថ្ងៃ លោកបៃ​ដិនបាន​ប្រាប់​ក្រុម​មេដឹកនាំ​និង​អ្នក​ផ្សេង​ទៀត​នៅក្នុង​សាលសន្និសីទ​ធំ​មួយ​ថា​”​សហរដ្ឋ​អា​​ម៉េ​រិក​ប្តេជ្ញា​គាំទ្រ​គ្រប់ផ្នែក​នៃ​កំណើន​របស់​ទ្វីប​អាហ្វ្រិក​”​។

​លោកបៃ​ដិនដែល​កំពុង​បង្ហាញ​ថា​សហរដ្ឋអាម៉េរិក​ជា​ដៃគូ​អាច​ជឿ​ទុកចិត្តបាន​ក្នុង​ការលើកកម្ពស់​ការ​បោះឆ្នោត​តាម​បែប​ប្រជាធិបតេយ្យ​និង​ជំរុញ​កំណើន​ផ្នែក​សុខភាព​និង​ថាមពល​ដ៏​សំខាន់​បាន​ប្រាប់​​ទស្ស​និក​ថា ប្រាក់​៥៥ ពាន់​លាន​ដុល្លារ​ក្នុង​ការវិនិយោគ​ដែល​បាន​សន្យា​ក្នុង​រយៈពេល​បី​ឆ្នាំ​ខាងមុខ គឺ “​គ្រាន់តែ​ជា​ការចាប់ផ្តើម​ប៉ុណ្ណោះ​”​។​

​លោក​បាន​ប្រកាស​ផងដែរ​ពី​ការសន្យា​ជួយ​ជាង ១៥ ពាន់​លាន​ដុល្លារ​ក្នុង​ផ្នែក​ពាណិជ្ជកម្ម​និង​ការវិនិយោគ​ឯកជន និង​ភាព​ជា​ដៃគូ​នានា​។​

​លោកបៃ​ដិ​ននិយាយទៀតថា “​នៅ​មាន​រឿង​ច្រើន​ទៀត​ដែល​យើង​អាច​ធ្វើ​រួមគ្នា ហើយ​យើង​នឹង​ធ្វើ​វា​ជាមួយគ្នា​”​។​

​សហរដ្ឋ​អាម៉េរិក​ចាញ់​ចិន​ឆ្ងាយ​ណាស់​ក្នុង​ការវិនិយោគ​នៅ​អនុ​តំបន់​សាហា​រ៉ា​អាហ្វ្រិក ដែល​បាន​ក្លាយជា​សមរភូមិ​ដ៏​សំខាន់​នៅក្នុង​ការប្រកួតប្រជែង​ដ៏​ស្វិតស្វាញ​រវាង​មហាអំណាច​ធំៗ​។ សេត​វិមាន​ទទូចថា ការជួបជុំ​គ្នា​នៅ​សប្តាហ៍​នេះ​គឺជា​វគ្គ​ស្តាប់​មេដឹកនាំ​អាហ្វ្រិក​ជាជាង​កិច្ចខិតខំ​ប្រឹងប្រែង​ដើម្បី​ទប់ទល់​នឹង​ឥទ្ធិពល​របស់​រដ្ឋាភិបាល​ក្រុង​ប៉េកាំង​ប៉ុន្តែ​គោល​លទ្ធិ​នៃ​គោលនយោបាយ​ការបរទេស​ស្នូល​របស់​​ប្រធានាធិបតី​អាម៉េរិក​កំពុង​លេចចេញ​ជា​រូបរាង​ច្បាស់​ឡើង​ហើយ នោះ​គឺ​អាម៉េរិក​កំពុង​ស្ថិត​ក្នុង​សមរភូមិ​កំណត់​យុគសម័យ ដើម្បី​បង្ហាញ​ថា លទ្ធិប្រជាធិបតេយ្យ​អាចធ្វើ​បាន​ល្អ​ជាង​លទ្ធិ​ផ្តាច់ការ​។​

​សារ​នោះ​គឺ​ច្បាស់លាស់​នៅក្នុង​ព្រឹត្តិការណ៍​កាលពី​ថ្ងៃ​ពុធ​។ នៅក្នុង​សុន្ទរកថា លោកបៃ​ដិនបាន​និយាយ​អំពី​របៀប​ដែល​សហរដ្ឋ​អាម៉េរិក​នឹង​ជួយ​ក្នុងការ​ធ្វើ​ទំនើបកម្ម​បច្ចេកវិជ្ជា​នៅ​ទូ​ទាំង​ទ្វីបអាហ្វ្រិក ផ្តល់​ថាមពល​ស្អាត ជំរុញ​សមភាព​ស្ត្រី​តាមរយៈ​ឱកាស​អាជីវកម្ម នាំយក​ទឹកស្អាត​ដល់​សហគមន៍ និង ផ្តល់​មូលនិធិ​ដល់​ការថែទាំ​សុខភាព​ឱ្យ​កាន់តែ​ប្រសើរ​ឡើង​។ ការិយាល័យ​របស់​ជំទាវ​ទី​មួយ​ជី​ល បៃ​ដិន ក៏បាន​ផ្តល់​ប្រាក់​ចំនួន ៣០០ លាន​ដុល្លារ​សម្រាប់​ការការពារ​ជំងឺមហារីក ការ​ពិនិត្យ​សុខភាព ការព្យាបាល និង​ការស្រាវជ្រាវ​នៅ​អាហ្វ្រិក​ផងដែរ​៕

លោកបៃ​ដិនជល់​កែវ​ជាមួយប្រ​ធានា​ធិបតី​សេណេ​ហ្គាល់​នៅ​សេត​វិមាន​កាលពី​ថ្ងៃ​ពុធ