ដោយ​: សុខុម / ស្ទឹងត្រែង​: រដូវរំហើយ ខ្យល់​ត្រជាក់ បក់​ផាត់​ពី​ជើង នា​ពាក់កណ្ដាល​ខែធ្នូ​នេះ ត្រី​ប៉ា​សុី​អុី ដែល​ល្បី​ថា មាន​រសជាតិ​ឆ្ងាញ់​ដ៏​ពិសេស​នោះ កំពុង​ចាប់ផ្ដើម​សំបូរ​ជា​បណ្ដើរៗ​ហើយ ក៏ប៉ុន្តែ​តម្លៃនៅលើទីផ្សារ ដើមរដូវ​នេះ​នៅតែ​ថ្លៃ​។

​នៅ​ព្រឹក​ព្រលឹម មនុស្សម្នា​មមាញឹក ដើរ​ដោយ​ថ្មើរជើង សំដៅ​ចុះទៅ​កំពង់​សាឡាង មុខ​រង្វង់​មូល ជាប់មាត់​ទន្លេសេកុង ខេត្តស្ទឹងត្រែង​អ្នកខ្លះ​កាន់​កន្ត្រក ចានដែក ឬ​កា​ធុន កា​រ៉ុង ខ្លះ​កាន់​ជញ្ជីង ដណ្ដើម​គ្នា​ទិញ​ត្រី យកមក​លក់​ឲ្យ​ឈ្មួញ​បន្ត​។

​នៅពេលនោះ គេ​ឃើញ​ទូក​បើក​ម្ដង​មួយៗ​សំដៅ​យ៉ាង​លឿន ចូលមក​ចត​នៅ​មាត់ច្រាំង​។​អ្នក​ឈរ​ចាំ​ទិញ​ត្រី នៅលើ​គោក ក៏​ចុះទៅ​សួររក​ត្រី ដែលមាន​តម្លៃ​ថ្លៃ​ជាងគេ​។ នេះ​គឺជា​ទម្លាប់ អ្នករស់នៅ ខេត្តស្ទឹងត្រែង តាំងពី​យូរ​ឆ្នាំ មកហើយ រហូតដល់​សព្វថ្ងៃនេះ​។

​ត្រី​ដែល​ចាប់អារម្មណ៍​ជាងគេ​នោះ គឺជា​ត្រី​ប៉ា​សុី​អុី​។ ដោយសារតែ​ត្រី​ប៉ា​សុី​អុី​ល្បី ហើយ​មានតែ​ក្នុង​ខេត្តស្ទឹងត្រែង ទើប​គេ​សង់​រូបសំណាក​ថ្ម​ត្រី​ប៉ា​សុីអុី​ដ៏​ធំ​មួយ នៅលើ​គោក ក្បែរ​មាត់​ទន្លេសេកុង តំណាង​ឲ្យ​ធនធាន​ត្រី​ប៉ា​ស៊ី​អុី ដ៏​កម្រ​មាន នៅ​ទឹកដី​ខេត្តស្ទឹងត្រែង នា​ភូមិភាគ​ឦសាន​។ រូប​ត្រី​ប៉ា​សុី​អុីថ្ម​នោះ លំអ​សោភ័ណភាព​ក្រុង និង​ធ្វើ​ឲ្យ​ភ្ញៀវទេសចរ​ជាតិ​អន្តរជាតិ ចាប់អារម្មណ៍​ផងដែរ​។

​អ្នកលក់​ត្រី បាន​និយាយប្រាប់​ឲ្យ​ដឹងថាៈ ត្រី​ធំៗ​ដែលមាន​តម្លៃ​ថ្លៃ សុទ្ធ​តែមាន​រសជាតិ​ឆ្ងាញ់​ពិសេស​ផ្សេងគ្នា​។ តែ​ត្រី​ដែល​ថ្លៃ​ជាងគេ គឺជា​ប្រភេទ​ត្រី​ប៉ា​សុី​អុី និង​ចាត់ទុកថា ក៏​ជា​ត្រី​ដ៏​កម្រ​តែមួយគត់ នៅ​ប្រទេស​កម្ពុជា គឺមាន​សំបូរ​តែ​ខេត្តស្ទឹងត្រែង​ប៉ុណ្ណោះ នៅពេល​បច្ចុប្បន្ន​។

​អ្នកលក់​ត្រី បាន​ប្រាប់​យើង​ថាៈ តម្លៃ​ត្រី​ប៉ា​សុី​អុី​មាន​ទម្ងន់​ក្រោម​មួយ​គីឡូក្រាម តម្លៃ​ចាប់ពី ៨​ទៅ​១០ ម៉ឺន​រៀល​។ បើ​ទម្ងន់​ក្នុង​ត្រី​មួយ​ក្បាល​ពីមួយ​គីឡូ​កន្លះ ទៅ​ពីរ​គីឡូ តម្លៃ​ដល់​ទៅ ៤០ ម៉ឺន​រៀល ឬ​ស្មើនឹង ១០០ ដុល្លារ​អាមេរិក​។

​ត្រី​ទឹកសាប នៅ​ខេត្តស្ទឹងត្រែង រស់នៅ​តំបន់​ធម្មជាតិ ពោរពេញ​ទៅដោយ​ថ្ម​ទឹក​ជួរ​ហូរ​ខ្លាំង​។​ព្រៃ​លិច​ទឹក​អន្លង់​ជ្រៅៗ ជាច្រើន​កន្លែង និង​មាន​ទន្លេ​ចំនួន ៤ ហូរ​កាត់ ក្នុងនោះ​មាន ទន្លេមេគង្គ​ទន្លេសេកុង ទន្លេសេសាន និង​ទន្លេស្រែពក​។​ទន្លេ​ទាំង​បួន​នេះ ហូរ​កាត់ត​ភ្ជាប់​គ្នា ២ ទន្លេធំៗ​នោះ​គឺ​ទន្លេសេកុង និង​ទន្លេមេគង្គ ទៅដល់​ខេត្តក្រចេះ​។

​ស្ត្រី​មាន​វ័យ​៦១​ឆ្នាំ ឈ្មោះ កែវ វណ្ណា រស់នៅ​ភូមិ​ព្រែក សង្កាត់​ស្ទឹងត្រែង គឺជា​អ្នក​ចាំ​ទិញ​ត្រី ពី​អ្នកនេសាទ កំពុង​រង់ចាំ​ទទួល​ទិញ​ត្រី នៅ​កំពង់​សាឡាង ជាមួយ​កូនស្រី​របស់គាត់​ម្នាក់ទៀត​ដោយ​ទិញ​ត្រី​បណ្ដើរ ឆ្លៀត​រៀបរាប់​ប្រាប់​ឲ្យ​ដឹងថាៈ ត្រី​ប៉ា​សុី​អុី ពិត​ជាមាន​រសជាតិ​ឆ្ងាញ់ ហើយ​មានការ​ថយចុះ កាន់តែ​ខ្សត់​ទៅ ពីមួយ​ឆ្នាំទៅ​មួយឆ្នាំ​។

​អ្នកលក់​ត្រី បាន​រៀបរាប់​ប្រាប់ទៀតថាៈ ត្រី​ប៉ា​សុី​អុី ដែល​លក់បាន​ថ្លៃ គឺ​វា​នៅរស់ ក្រោយពី​អ្នកនេសាទ ចាប់បាន​ដោយ​ប្រើ​មង​ក្រឡា​ញឹក​។​ត្រី​ប៉ា​សុី​អុី គេ​ដោះ​ចេញពី​មង ដាក់​ត្រាំ​ទឹក​នៅក្នុង​បាត​ទូក យកមក​លក់​បន្ត​។ ត្រី​ប្រភេទ​នេះ គេ​ច្រក​ជា​ស្បោង ឬ​ដាក់​ក្នុង​ចានដែក ឬ​កា​ធុន ដែលមាន​ទឹក​ទាំង​វា​នៅរស់ យកមក​លក់​បន្ត​នៅ​ផ្សារ​”​សាមគ្គី​”​។ ឈ្មួញ​ធំៗ​ដែល​ទិញ​បន្ត​គេ​យកទៅដាក់ នៅតាម​ផ្ទះសំណាក់ ឬ​សណ្ឋាគារ ដោយ​ប្រើ​អុកស៊ីសែន ដើម្បី​ឲ្យ​វា​នៅរស់ និង​ស្រស់​ល្អ​។

​ចំណែក​ត្រី​ប៉ា​សុី​អុី ឬ​ត្រី​ដទៃទៀត ដូចជា ត្រី​ប៉ា​វ៉ា ត្រី​ក្អែក​ធំៗ ដែល​ងាប់​ហើយ​នោះ គេ​ដាក់​ក្នុង​ធុង​ស្នោ ត្រាំ​ទឹកកក ផ្ញើ​ទៅ​ម៉ូយ តាម​បណ្ដា​ខេត្ត​ឆ្ងាយៗ ឬ​ទីក្រុង​ភ្នំពេញ តាម​រថយន្ត​តាក់ស៊ី តាម​ការបញ្ជាទិញ​។

​លោកស្រី សុំ សម័យ ម្ចាស់​ភោជនីយដ្ឋាន​សោភា សុ​គី​ស៊ុប នៅ​ក្រុង​ស្ទឹងត្រែង បាន​រៀបរាប់ថាៈ មុខម្ហូប​ដែល​ពេញនិយម ធ្វើ​ពី​ត្រី​ប៉ា​សុីអុី ភាគច្រើន គេ​យកទៅ​ស្ងោរជ្រក់ ចំហុយ ឬ​ធ្វើ​ផ្អក​…​។

​ម្ចាស់​ហាង​សោភា សុ​គី​ស៊ុប បាន​រៀបរាប់​ទៀតថាៈ ត្រី​ប៉ា​សុី​អុី គេ​យកទៅ​ធ្វើ​ផ្អក អាច​រក្សាទុក​បានយូរ​។ រីឯ​តម្លៃ​វិញ​នោះ ក៏​ថ្លៃ​គួរសម​ដែរ​។​អាស្រ័យ​ទៅតាម​ប្រភេទ​ត្រី​ណា ដែលមាន​មាឌ តូច ឬ​មាឌធំ​។ ម៉ូយ​ជាច្រើន ដែល​បានមក​ភ្លក្ស​រសជាតិ​ម្ហូប នៅក្នុង​ហាង​របស់​លោកស្រី​។ ភ្ញៀវ​ដែល​មិន​បានមក ហើយ​ធ្លាប់​ស្គាល់​គេ ក៏​កុម្មង់​ទិញ​ផ្អក ឬ​ទិញ​ត្រី​ប៉ា​ស៊ី​អុិ​ត្រី ដទៃទៀត​ពី​គាត់​។

​ទាក់ទង​ទៅនឹង​ស្ថានភាព​ត្រី​ប៉ា​សុី​អុី នៅក្នុង​ខេត្តស្ទឹងត្រែង​នេះ មន្ត្រី​ជំនាញ​ជលផល បាន​រៀបរាប់​ខ្លះៗ ពី​ការរស់នៅ បែប​ធម្មជាតិ​របស់​ត្រី​កម្រ​។

​លោកស្រី សម វិចិត្រ នាយ​ខណ្ឌ​រដ្ឋបាល​ជល​ផល ខេត្តស្ទឹងត្រែង បាន​រៀបរាប់ថាៈ វា​បាន​ផ្លាស់​ទី​ទៅក្នុង​ទឹកដី​ឡាវ ព្រំប្រទល់​កម្ពុជា​ឡាវ​។ តាម​ទន្លេមេគង្គ និង​បង្ក​កំណើត និង​បន្ត​វិលត្រឡប់ ទៅ​រស់នៅ​តំបន់​មូ​យ​ចំនួន ក្នុងស្រុក​សំបូរ ខេត្តក្រចេះ តាម​ធម្មជាតិ​របស់​ត្រី​ទឹកសាប​។ ចំណែក​ការ​បម្លាស់​ទី​រប​ស់វា ជា​ហ្វូង​និង​ស៊ី​ស្លែ​ថ្ម ជា​អាហារ ចូលចិត្ត​រស់នៅ តាម​តំបន់​ទឹក​ជួរ​ហូរ​ខ្លាំង សំបូរ​ដោយ​ថ្ម​។

​តាម​ការកត់សម្គាល់ ឃើញថា ពីមួយ​ឆ្នាំទៅ​មួយឆ្នាំ ផល​ត្រី​ប៉ា​ស៊ី​អុី ពិតជា​មានការ​ថយចុះ​ដោយសារ​វា​អាច​បណ្ដាលមកពី​កត្តា​ប្រែប្រួល​អាកាសធាតុ និង​របប​ទឹក​ឡើង​ចុះ មិន​ទៀងទាត់ ព្រមទាំង​ការអភិវឌ្ឍន៍​ផ្សេងៗ តាម​ដង​ទន្លេ និង​តម្រូវការ​របស់​មនុស្ស​៕/V​.mara