​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ រដ្ឋាភិបាល​ក្រុង​មូ​ស្គូ​កាលពី​ថ្ងៃ​ពុធ​ទី​១៤​ធ្នូ​បាន​និយាយថា គ្មាន “​បទ​ឈប់​បាញ់​ថ្ងៃបុណ្យ​ណូអែល​” នោះ​ទេ​បន្ទាប់​ពី​សង្គ្រាម​បំផ្លិចបំផ្លាញ​ជិត​១០​ខែ​នៅ​​ក្នុងប្រទេស​អ៊ុ​យក្រែន ទោះបីជា​ការដោះលែង​អ្នកទោស​រាប់សិប​នាក់ រួម​ទាំង​ជនជាតិ​អាម៉េរិក​ម្នាក់​បាន​បង្ហាញ​ថា​ទំនាក់ទំនង​មួយចំនួន​រវាង​ភាគី​ទាំង​ពីរ​នៅ​តែ​មាន​ក៏ដោយ​។​

​បច្ចុប្បន្ន រុស្ស៊ី​និង​អ៊ុ​យក្រែន​មិនទាន់​បាន​ចូលរួម​ក្នុង​កិច្ចពិភាក្សា​ណាមួយ​ដើម្បី​បញ្ចប់​ការប្រយុទ្ធ​គ្នា ដែល​កំពុង​ឆាបឆេះ​ខ្លាំង​នៅ​ភាគ​ខាងកើត​និង​ខាងត្បូង​និង​បាន​ឈាន​ទៅដល់​ទីក្រុង​គៀវ​ម្តង​​ទៀត​កាលពី​ថ្ងៃ​ពុធ​។ មនុស្ស​រាប់​ម៉ឺន​នាក់​ត្រូវបាន​សម្លាប់ មនុស្ស​រាប់លាន​នាក់​ផ្សេង​ទៀត​ត្រូវបាន​ផ្លាស់​ទីលំនៅ និង​ទីក្រុង​ជាច្រើន​ត្រូវបាន​វាយ​រាប​ដល់​ដី​ចាប់តាំងពី​រុស្ស៊ី​បាន​លុកលុយ​ប្រទេស​ជិត​​ខាង​របស់ខ្លួន​កាលពី​ថ្ងៃទី ២៤ ខែ​កុម្ភៈ​។​

​ក្នុងពេល​ពណ៌នា​អំពី​ការបំផ្លាញ​របស់​រុស្ស៊ី​លើ​ទីក្រុង​នៅ​ភាគ​ខាងកើត​ដោយ​កាំភ្លើង​ធំ ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀ ហ្សេ​លេន​ស្គី បាន​និយាយ​នៅក្នុង​សុន្ទរកថា​វីដេអូ​ពេល​ល្ងាច​ជា​ទៀងទាត់​ថា “​គ្មាន​ភាពស្ងប់ស្ងាត់​នៅ​សមរភូមិ​ជួរ​មុខ​ទេ​” ដូច្នេះ​មានតែ​ការបំផ្លិចបំផ្លាញ​និង​រណ្តៅ​គ្រាប់​។​

​លោក​ហ្សេ​លេន​ស្គី​បាន​និយាយ​នៅ​សប្តាហ៍​នេះ​ថា រុស្ស៊ី​គួរតែ​ចាប់ផ្តើម​ដកទ័ព​ចេញ​នៅ​មុន​បុណ្យ​ណូអែល ជា​ជំហាន​មួយ​ដើម្បី​បញ្ចប់​ជម្លោះ​ដែល​ជា​ជម្លោះ​ធំ​បំផុត​របស់​អឺរ៉ុប​ចាប់តាំងពី​សង្គ្រាមលោក​​លើក​ទី​ពីរ​។ រដ្ឋាភិបាល​ក្រុង​មូ​ស្គូ​បាន​ច្រានចោល​សំណើ​នេះ​ទាំងស្រុង ដោយ​និយាយថា អ៊ុយ​ក្រែន​ត្រូវតែ​ទទួលយកការ​បាត់បង់​ទឹកដី​ទៅ​រុស្ស៊ី មុនពេល​មាន​វឌ្ឍនភាព​ណាមួយ​កើតឡើង​។​

​ត្បិត​ខ្វះ​នូវ​កិច្ចចរចា​សន្តិភាព​ក្តី ក៏​អ្នក​ជាប់​ឃុំ​រាប់រយ​នាក់​ត្រូវបាន​ដោះលែង​ឱ្យ​មាន​សេរីភាព​នៅក្នុង​ការដោះដូ​រ​អ្នកទោស​ក្នុង​ប៉ុន្មាន​សប្តាហ៍​ថ្មីៗ​នេះ​។​ការដោះលែង​នេះ​រួម​ជាមួយ​វឌ្ឍនភាព​លើ​កិច្ច​ពិភាក្សា​​ដើម្បី​បន្ត​ការនាំចេញ​របស់​រុស្ស៊ី​នូវ​សារធាតុ​ផ្សំ​ក្នុង​ជី​និង​ការបន្ត​កិច្ចព្រមព្រៀង​គ្រាប់​ធញ្ញជាតិ បាន​បង្ហាញឱ្យឃើញថា ភាគី​ទាំងពីរ​នៅ​តែ​រក្សា​ទំនាក់ទំនង​មាន​ដែន​កំណត់​លើ​កម្រិត​ជាច្រើន​។​

​រដ្ឋាភិបាល​ក្រុង​គៀវ​និង​វ៉ាស៊ីនតោន​បាន​និយាយ​កាលពី​ថ្ងៃ​ពុធ​ថា ការដោះដូរ​អ្នក​ជាប់​ឃុំ​រាប់សិប​នាក់​ចុងក្រោយ​នេះ​ក៏​មាន​ពលរដ្ឋ​អាម៉េរិក​ម្នាក់​ផង​ដែរ​។​

​ប្រមុខ​រដ្ឋបាល​របស់​ប្រធានាធិបតី​អ៊ុយ​ក្រែនលោក បានកំណត់​អត្តសញ្ញាណ​ជនជាតិ​អាម៉េរិក​ឈ្មោះថា ស៊ូ​អេ​ឌី មូ​រ៉េកេ​ហ្ស៊ី (Suedi Murekezi) ដែល​គាត់​និយាយថា “​បាន​ជួយ​ប្រជាជន​របស់​យើង​” មុនពេល​ត្រូវ​រុស្ស៊ី​ចាប់ឃុំខ្លួន​។​

​កាសែត Washington Post បាន​និយាយថា មូ​រ៉េកេ​ហ្ស៊ី​គឺ​ជា​ទាហាន​ជើងចាស់​របស់​កងទ័ព​អាកាស​អាម៉េរិក​កើត​នៅ​ប្រទេស​អ៊ូ​ហ្គង់​ដា​៕

​ទាហាន​អ៊ុយ​ក្រែន​កំពុង​ត្រៀមកាំភ្លើង​ធំ​នៅ​សមរភូមិ​