​ប្រែ​សម្រួលៈ​បំណង​(​ដេល្លី​ម៉េល​)៖ កងទ័ពអាកាស​ឥណ្ឌា​ធ្វើ​សមយុទ្ធ​ហ្វឹកហាត់​នៅ​ថ្ងៃ​ព្រហស្បតិ៍​និង​ថ្ងៃ​សុក្រ​ទី​១៥​និង​១៦​ធ្នូ នៅ​ភាគ​ខាងកើត​ប្រទេស តែ​វា​មិន​ពាក់ព័ន្ធ​នឹង​ការ​វាយតប់​គ្នា​កាលពី​សប្តាហ៍​​មុន​រវាង​ទាហាន​ឥណ្ឌា​និង​ចិន​នៅក្នុង​តំបន់​នេះ​ទេ នេះ​បើ​តាម​ការប្រកាស​របស់​កងទ័ពអាកាស​ឥណ្ឌា​។​

​ក្រសួង​ការពារជាតិ​ឥណ្ឌា​បាន​និយាយ​នៅ​សប្តាហ៍​នេះ​ថា ទាហាន​ឥណ្ឌា​បាន​រារាំង​មិន​អោយ​ទាហាន​ចិន​ចូលក្នុង​ទឹកដី​ឥណ្ឌា​កាលពី​ថ្ងៃ​៩​ធ្នូ ក្នុងអំឡុងពេល​មានការ​វាយតប់​គ្នា​ដែល​បណ្តាលអោយ​របួស​ទា​​ហាន​ទាំងសងខាង​។​​តែ​ចិន​បាន​អះអាង​ថា ទាហាន​ឥណ្ឌា​បាន​ឆ្លងកាត់​ព្រំដែន​តាម​ការជាក់ស្តែង​ដោយ​ខុសច្បាប់​ដើម្បី​រារាំង​ការ​ល្បាត​តាម​ធម្មតា​របស់​ទាហាន​ចិន​។​

​វា​ជា​ការប៉ះទង្គិច​ដូច្នេះ​លើកដំបូង​រវាង​មហាអំណាច​នុយក្លេអ៊ែរ​អាស៊ី​ទាំង​ពីរ​ចាប់តាំងពី​ឆ្នាំ​២០២០ នៅពេល​ទាហាន​ឥណ្ឌា​២០​នាក់​និង​ទាហាន​ចិន​៤​នាក់​ត្រូវបាន​សម្លាប់​ដោយ​ការ​វាយ​គ្នា​ដោយ​កំលាំងបាយ​​ដូចនេះ​។​

​សារព័ត៌មាន​ឥណ្ឌា​បាន​និយាយថា កងទ័ពអាកាស​ឥណ្ឌា​បាន​បញ្ជូន​ចេញ​យន្តហោះ​ប្រយុទ្ធក្នុងអំឡុងពេល​ប៉ះទង្គិច​គ្នា​ចុងក្រោយ​នៅ​តំបន់​តា​វ៉ាង​នៃ​ភ្នំ​ហេមពាន្ត ក្នុង​រដ្ឋ​អា​រុន​ណា​ចាល់​របស់​ឥណ្ឌា ដែល​ចិន​​ក៏​អះអាងថា​ជា​ទឹកដី​របស់​ខ្លួន​ផងដែរ​៕

​កងទ័ពអាកាស​ឥណ្ឌា​បាន​និយាយថា បញ្ជាការ​ទ័ពអាកាស​ភាគ​ខាងកើត​នឹង​ធ្វើ​សមយុទ្ធ​ដើម្បី​បង្វឹក​អាកាសយានិក​អោយ​ថ្នឹក ។​វា​ត្រូវ​បាន​កំណត់​ទុកជា​យូរ​មក​ហើយ​តាំងពី​មុន​ឧបទ្ទវហេតុ​នៅ​តា​វ៉ាង​​និង​វា​មិន​ពាក់ព័ន្ធ​នឹង​ហេតុការណ៍​ចុងក្រោយ​នេះ​ទេ​