ប្រែ​សម្រួលៈ​បំណង​(​ដេល្លី​ម៉េល​)៖​ក្រសួងការបរទេស​រុស្ស៊ី​បាន​ព្រមាន​ថា​បើសិនជា​សហរដ្ឋ​អាម៉េរិក​បញ្ជាក់ថា​ជា​ការពិត​របាយការណ៍​ដែល​ថា​ខ្លួន​មាន​ផែនការ​បញ្ជូន​ប្រព័ន្ធ​កាំជ្រួច​ការពារ​ដែនអាកាស​ទំនើប​អោយ​អ៊ុ​យក្រែន នោះ​វា​នឹង​ជា​ការ​បង្ករឿង​មួយទៀត​ដោយ​អាម៉េរិក​ដែល​អាច​នាំអោយ​មាន​ចម្លើយ​តប​ពី​រដ្ឋាភិបាល​ទីក្រុង​មូ​ស្គូ​។​

​អ្នកនាំពាក្យ​ក្រសួង​លោកស្រី ម៉ា​រៀ ហ្សា​ខា​រ៉ូ​វ៉ា​( Maria Zakharova )​បាន​និយាយ​ក្នុង​សន្និសីទកាសែត​ប្រចាំ​សប្តាហ៍​ថា «​អាម៉េរិក​បាន​ក្លាយ​ជា​គូ​ភាគី​ដ៏​មាន​ប្រសិទ្ធភាព​មួយ​»​ចំពោះ​ជម្លោះ​នៅ​អ៊ុ​យក្រែនក្រោយពី​មាន​សេចក្តីរាយការណ៍​ថា ខ្លួន​នឹង​ផ្តល់​អោយ​អ៊ុយ​ក្រែន​នូវ​កាំជ្រួច​ធុន​ភែ​ត​ធ្រៀ​ត​(Patriot) ដែល​ជា​សព្វាវុធ​ទំនើប​បំផុត​ដែល​លោកខាងលិច​ជួយ​ដល់​អ៊ុយ​ក្រែន​ដើម្បី​ទប់ទល់​នឹង​ការ​វាយប្រហារ​របស់​រុស្ស៊ី​។​

អ្នកនាំពាក្យ​ក្រសួង​លោកស្រី ម៉ា​រៀ ហ្សា​ខា​រ៉ូ​វ៉ា​

​លោកស្រី ហ្សា​ខា​រ៉ូ​វ៉ា បាន​បន្ថែមថា ជំនួយ​យោធា​អាម៉េរិក​កាន់តែ​ច្រើនឡើង រួម​ទាំង​ការបញ្ជូន​សព្វាវុធ​ទំនើប​ដូច្នេះ «​នឹង​មានន័យថា​ជា​ការចូលរួម​ពាក់ព័ន្ធ​របស់​បុគ្គលិក​យោធា​កាន់តែ​ធំ​ទៅ​នៅក្នុង​ជម្លោះ​នេះហើយ​អាច​នាំ​មក​ផលវិបាក​»​។​

​ពួក​មន្ត្រី​អាម៉េរិក​បាន​និយាយ​កាលពី​ថ្ងៃ​អង្គារ​ថា រដ្ឋាភិបាល​ទីក្រុង​វ៉ាស៊ីនតោន​ប្រុង​អនុម័ត​បញ្ជូន​ប្រព័ន្ធ​កាំ​ជ្រួច​Patriot​ទៅកាន់​អ៊ុ​យក្រែន ក្រោយ​ក្រុម​មេដឹកនាំ​អ៊ុយ​ក្រែន​ទទូច​សុំ​វាជា​បន្ទាន់​ដើម្បី​បាញ់​ទម្លាក់​កាំជ្រួច​រុស្ស៊ី​ដែល​ហោះ​ចូលមក​។​ការអនុម័ត​ជា​ផ្លូវការ​មួយ​ត្រូវ​រំពឹងថា​នឹង​ប្រកាស​ឡើង​ក្នុង​ពេល​ឆាប់ៗ​។​

Patriot​មួយ​កង​ទាមទារ​ទាហាន​ដល់​ទៅ​៩០​នាក់​ដើម្បី​ដំណើរការ​និង​ថែ​ទាំង​វា ។​អស់​ពេល​ជា​ច្រើន​ខែ​មក​ហើយ​អាម៉េរិក​ស្ទាក់ស្ទើរ​ក្នុង​ការផ្តល់​ប្រព័ន្ធ​កាំជ្រួច​ស្ទាក់​កំទេច​នេះ ដោយសារ​តែ​វា​នឹង​បញ្ជូន​ទ័ព​ចូល​អ៊ុយ​ក្រែន​ដើម្បី​ដំណើរការ​និងគ្រប់គ្រងវា​។​

​សូម្បី​តែ​មុន​លេច​ចេញ​របាយការណ៍​នេះ ក៏​អតីត​ប្រធានាធិបតី​រុស្ស៊ី លោក​ឌី​មី​ទ្រី ម៉េ​តវ៉េ​ដេ​វ ដែល​ជា​អនុប្រធាន​ក្រុមប្រឹក្សាសន្តិសុខ​រុស្ស៊ី បាន​ព្រមាន​ថា​បើ​Patriots​ចូល​ក្នុងប្រទេស​អ៊ុ​យក្រែន «​ជាមួយ​បុគ្គលិក​យោធា​របស់​ណា​តូ វា​នឹង​ក្លាយ​ជា​គោលដៅ​វាយប្រហារ​ស្របច្បាប់​ភ្លាម​របស់​កងកម្លាំង​ប្រ​ដាប់​អាវុធ​របស់​យើង​»​។​

​កាលពី​ថ្ងៃ​ពុធ នៅពេល​ត្រូវ​បាន​សួរថា​តើ​រដ្ឋាភិបាល​ទីក្រុង​មូ​ស្គូ​គាំទ្រ​ការ​គំរាម​នេះ​ទេ អ្នកនាំពាក្យ​វិមាន​ក្រឹម​ឡាំង​បាន​ឆ្លើយតប​ថា​«​បាទ ពិត​ហើយ​»តែ​លោក​មិន​ធ្វើ​អត្ថាធិប្បាយ​យ៉ាងណា​ទេ​រង់ចាំ​អាម៉េរិក​ប្រកាស​ផ្លូវការ​សិន​៕

​មេដឹកនាំ​សេត​វិមាន​និង​មន្ទីរ​បញ្ច​កោណបាន​និយាយថា ការ​ផ្តល់ជំនួយ​យោ​ធា​បន្ថែម​ដល់​អ៊ុយ​ក្រែនជា​អាទិភាព​មួយ និង​កាំជ្រួច​Patriot​កំពុងស្ថិត​ក្នុង​ការពិចារណា​