​ប្រែ​សម្រួលៈ​បំណង​(​បំណង​)៖​មនុស្ស​ប្រាំ​បីនាក់​ត្រូវបាន​សម្លាប់​និង​២៣​នាក់​រងរបួស​ដោយ​ការបាញ់​ផ្លោង​របស់​អ៊ុយ​ក្រែន​ចូល​តំបន់​លូ​ហាន់ស​ខ៍​(Luhansk)​ដែល​គ្រប់គ្រង​ដោយ​រុស្ស៊ី នេះ​បើ​តាម​ការផ្សាយ​​របស់​ទីភ្នាក់ងារ​សារព័ត៌មាន​TASS​របស់​រដ្ឋ​រុស្ស៊ី​កាលពី​ថ្ងៃ​សុក្រ​។​

TASS​បាន​និយាយថា ការបាញ់​ផ្លោង​បាន​បំផ្លាញ​អាគារ​មួយ​នៅក្នុង​ភូមិ​ឡាន​ត្រា​ទីវ​កា​(Lantrativka) និង​មនុស្ស​ជាប់​ក្រោម​គំនរ​បាក់បែក​។​

​មន្ត្រី​តំបន់​ដែល​គ្រាំ​ដោយ​រុស្ស៊ី​បាន​និយាយថា អ៊ុយ​ក្រែន​បានបាញ់​កាំជ្រួច​រ៉ុក្កែត​HIMARS​ផលិត​នៅ​អាម៉េរិក​ដាក់​ភូមិ​ឡាន​ត្រា​ទីវ​កា​នៅ​ម៉ោង ៤​ជិត​ភ្លឺ​ថ្ងៃ​សុក្រ​។​ប្រធាន​តំបន់​លូ​ហា​ន់ស​ខ៍ក៏បាន​និយាយថា​​មាន​ការស្លាប់​និង​របួស​ជន​ស៊ីវិល​ដោយសារ​ការបាញ់​ផ្លោង​របស់​អ៊ុយ​ក្រែន​ចូល​ទីប្រជុំជន ស្វា​តូ​វ​(Svatove)​កាលពី​ព្រឹក​ថ្ងៃ​សុក្រ​។​

មន្រ្តីអ៊ុយក្រែនក៏បាននិយាយថា កាំជ្រួចរបស់រុស្ស៊ីបានវាយប្រហារហេដ្ឋារចនាសម្ពន្ធសំខាន់ៗនៅទូទាំងអ៊ុយក្រែនកាលពីថ្ងៃសុក្រ ដោយផ្តាច់ភ្លើងបន្ថែមនៅពេលប្រជាជននាំគ្នាចូលលេនដ្ឋាន។

​នៅ​ខាង​អ៊ុយ​ក្រែន​ឯណេះ​វិញ ពួក​មេៗ​ទ័ព​អ៊ុយ​ក្រែន​បាន​ទាយ​ទុក​ថា​រុស្ស៊ី​នឹង​ធ្វើ​ការវាយប្រហារ​ថ្មី​មួយ​នៅ​ដើម​ឆ្នាំ​ក្រោយ និង​អាច​ជា​ការប៉ុនប៉ង​លើក​ទី​ពីរ​ដើម្បី​ដណ្តើម​កាន់កាប់​រដ្ឋធានី​គៀវ​នៅពេល​សម្ព​​ន្ធមិត្ត​លោកខាងលិច​បង្កើនការ​គាំទ្រ​មូលនិធិ គ្រឿង​សម្ភារ​សឹក​និង​ការហ្វឹកហាត់​បន្ថែម​។​

​ប្រធានាធិបតី​អ៊ុយ​ក្រែនលោក​ហ្សេ​ឡេន​ស្គី ឧត្តមសេនីយ៍ វ៉ា​ឡេរី ហ្សា​លូ​ហ្ស៍​នី​(Valery Zaluzhniy)​និង​ឧត្តមសេនីយ៍ អូ​ឡេកសាន់​ដ្រ៍ សៀ​ស្គី​(Oleksandr Syrskiy)​បាន​និយាយ​ប្រាប់​ទស្សនា​វ​​ដ្តី​The Economist​កាលពី​ថ្ងៃ​ព្រហស្បតិ៍​ថា ការវាយប្រហារ​ថ្មី​របស់​រដ្ឋាភិបាល​ទីក្រុង​មូ​ស្គូ អាច​នឹង​កើតឡើង​ឆាប់ៗ​នៅ​ខែ​មករា​ខាងមុខ ។​ការវាយប្រហារ​អាច​ចេញពី​តំបន់​ដុន​បាស​ភាគ​ខាងកើត​​ចេញ​ពី​ខាងត្បូង​ឬ​ចេញ​ពី​ប្រទេស​ក្បែរ​ខាង​បេឡា​រូស ។​វា​អាច​រួម​មាន​ការវាយប្រហារ​ជើងគោក​មួយលើកទៀត​លើ​រដ្ឋធានី​គៀវ ដែល​រដ្ឋាភិបាល​ទីក្រុង​មូ​ស្គូ​បាន​បរាជ័យ​ក្នុង​ការ​ចូល​កាន់​កាន់កា​លពី​ដើម​​ប្រតិបត្តិការ​ឈ្លានពាន​របស់ខ្លួន​។​

​លោក​ហ្សា​លូ​ហ្ស៍​នី បាន​និយាយា​ថ​« រុស្ស៊ី​កំពុង​ត្រៀម​ទាហាន​ថ្មី​២០០.០០០​នាក់​។​វា​គ្មាន​អី​ត្រូវ​មន្ទិល​ទៀត​ទេ​ថា​ពួកគេ​នឹង​ធ្វើ​ការវាយប្រហារ​ធំ​ជា​ថ្មី​លើ​ទីក្រុង​គៀវ​»​។​

​ចំណែក​រដ្ឋមន្ត្រីការបរទេស​អ៊ុ​យក្រែន ក៏​បាន​និយាយថា មាន​ភស្តុ​ង​តាង​កាន់តែ​ច្រើន​ឡើង​បង្ហាញថា រុស្ស៊ី​មាន​ផែនការ​វាយប្រហារ​ធំ​ជាថ្មី​។​លោក​ថា វា​អាច​កើត​ឡើង​នៅ​ខែ​កុម្ភៈ​នៅ​ពេល​ពាក់កណ្តាល​នៃ​​ទាហាន​រុស្ស៊ី​ទើប​រើស​ថ្មី​ចំនួន​៣០០.០០០​នាក់​នឹង​បញ្ចប់​ការហ្វឹកហាត់​។​ទាហាន​ថ្មី​១៥០.០០០​នាក់​ទៀត នឹង​ធ្វើ​ការហ្វឹកហាត់​ត្រៀ​ម​ខ្លួន​យ៉ាង​តិច​បី​ខែ មានន័យថា​ពួកគេ​ប៉ុនប៉ង​ធ្វើ​ការវាយប្រហារ​ថ្មី​ប្រហែល​​ជា​នៅ​ខែ​កុម្ភៈ​…»​។​

​សូមបញ្ជាក់​ថា​ភាគី​ទាំងពីរ​បាន​ច្រាន​ចោល​ការផ្អាក​ប្រយុទ្ធ​គ្នា​ក្នុងអំឡុងពេល​អូ​អែល​និង​ក៏​មិន​មាន​ការពិភាក្សា​បញ្ចប់​ជម្លោះ​ដែរ ។​

​ក្នុងពេល​ជាមួយគ្នា មេដឹកនាំ​អាល្លឺម៉ង់​បាន​និយាយថា​«ការប្តេជ្ញា​ចិត្ត​របស់​យើង​ដើម្បី​គាំទ្រ​អ៊ុយ​ក្រែន​ទាំង​ខាង​នយោបាយ ហិរញ្ញវត្ថុ យោធា​និង​មនុស្សធម៌​នៅ​តែ​រឹងមាំ​ដដែល​ដរាបណា​អ៊ុយ​ក្រែន​នៅតែ​​ត្រូវការ​»​។​

​នៅ​ទីក្រុង​វ៉ាស៊ីនតោន យោធា​អាម៉េរិក​បានប្រកាសថា​ខ្លួន​នឹង​ពង្រីក​ការ​បង្វឹក​ទាហាន​អ៊ុយ​ក្រែន​នៅ​អាល្លឺម៉ង់ ដោយ​ចាប់ពី​ខែ​មករា​ទៅ​។​ទាហាន​៥០០​នាក់​នឹង​ទទួល​ការបណ្តុះបណ្តាល​ក្នុង​មួយខែ​បន្ថែម​​លើ​ទាហាន​អ៊ុ​យក្រែន​១៥.០០០​នាក់​ដែល​អាម៉េរិក​និង​សម្ពន្ធមិត្ត​បាន​ជួយ​បណ្តុះបណ្តាល​ចាប់តាំងពី​ខែ​មេសា​មក​៕

​អ៊ុយ​ក្រែន​អះអាងថា មាន​ភស្តុតាង​កាន់តែ​ច្រើន​បង្ហាញថា រុស្ស៊ី​រៀបចំ​កម្លាំង​ដើម្បី​ធ្វើ​ការវាយប្រហារ​ធំ​ជា​ថ្មី​