​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ក្រូ​អាស៊ី​និង​ម៉ារ៉ុក​នឹង​ត្រូវ​បោស​ដីពី​ខ្លួន​ឱ្យ​ស្អាត​ហើយ​ងើប​មក​លេង​បាល់​ម្តង​ទៀត​ខណៈ​ពួកគេ​ត្រៀម​ខ្លួន​យ៉ាង​ល្អ​សម្រាប់​ការប្រកួត​ដណ្តើមយក​ចំណាត់​​ថ្នាក់​លេខ​៣​វើល​ខាប់​នៅ​ថ្ងៃស្អែក​។​

​បារាំង​និង​អា​ហ្សង់​ទី​ននឹង​ផ្តោត​លើ​វគ្គ​ផ្តាច់ព្រ័ត្រ​នៅ​ថ្ងៃអាទិត្យ​នៅ​កីឡដ្ឋាន Lusail ជា​កន្លែង​មិត្ត​រួម​ក្រុម Paris St Germain លី​អូ​នែ​ល ម៉េស​ស៊ី និង កាយ​លៀន អឹម​បា​ហ្វេ​នឹង​ជួប​ត​​ទល់មុខ​គ្នា​។​

​ក្រូ​អាស៊ី​នឹង​ជួប​ម៉ា​រ៉ុកក្នុងវ​គ្គ​ដណ្តើមយ​ក​លេខ​៣​នៅ​ថ្ងៃ​សៅរ៍​នៅ​កីឡដ្ឋាន​អន្តរជាតិ Khalifa​។​

​ខណៈ​ក្រុម​រង​ជើងឯក​ឆ្នាំ ២០១៨ បាន​បាក់អំនួត បន្ទាប់​ពី​បរាជ័យ​របស់​ពួកគេ​ក្នុង​លទ្ធផល ៣-០ ក្រោម​ស្នាដៃ​អា​ហ្សង់​ទីន​ក្នុងវ​គ្គ​ពាក់កណ្តាល​ផ្តាច់ព្រ័ត្រ​នោះ គ្រូបង្វឹក​លោក ស្លាតកូ ដា​លី​ក (Zlatko Dalic) បាន​និយាយថា ពួកគេ​នឹង​ចេញ​ប្រយុទ្ធ​ដើម្បី​បិទ​បញ្ចប់​វើល​ខាប់​ជាមួយ​ជ័យជម្នះ​។​

​លោក​បាន​បន្តថា “​ក្រូ​អាស៊ី​បាន​ធ្វើ​ការងារ​ដ៏​អស្ចារ្យ​ហួស​ពី​ការរំពឹងទុក​។ ការប្រកួត​នៅ​ថ្ងៃ​សៅរ៍​មិនមែន​ជា​វគ្គ​ផ្តាច់ព្រ័ត្រ​តូចតាច​សម្រាប់​ពួកយើង​នោះទេ វា​ជា​ការប្រកួត​ផ្តាច់ព្រ័ត្រ​ដ៏​ធំ​បំផុត​”​។​

“​វា​មាន​ភាពខុសគ្នា​យ៉ាង​សំខាន់​រវាង​ការបញ្ចប់​នៅ​លេខ​៣​ឬ​៤”​។​

​គ្រូបង្វឹក​ម៉ារ៉ុក​លោក វ៉ា​លី​ដ រី​ហ្គ្រា​ហ្គី (Walid Regragui) មាន​អារម្មណ៍​ថា​ក្រុម​របស់​គាត់​បាន​បញ្ចេញ​អស់​ហើយ​នៅ​លើ​ទីលាន​ខណៈ​ក្តី​សុបិន​វើ​ល​ខាប់​របស់​ពួកគេ​បាន​បញ្ចប់​ដោយ​បរាជ័យ​​ក្រោម​ស្នាដៃ​ក្រុម​បារាំង​កាលពី​ថ្ងៃ​ពុធ​។​

​ក្រុម​តោ​កំណាច​គឺជា​ប្រទេស​អាហ្វ្រិក​ដំបូង​គេ​ដែល​បាន​ឈាន​ដល់​វគ្គ​ពាក់កណ្តាល​ផ្តាច់ព្រ័ត្រ​វើល​ខាប់ ប៉ុន្តែ​បែរជា​ទន់ខ្សោយ​ភ្លាមៗ បន្ទាប់​ពី​បាត់បង់​ប្រធាន​ក្រុម រ៉ូ​មេន សា​អ៊ី​ស (Romain Saiss) ដោយសារ​របួស និង​ខ្សែការពារ ណា​យ៉េ​ហ្វ អា​ហ្គឺត (Nayef Aguerd) របស់ West Ham ត្រូវ​បង្ខំចិត្ត​ចាកចេញ​ដោយសារតែ​ជំងឺ​។​

​ទោះយ៉ាងណា លោក​រី​ហ្គ្រា​ហ្គី​នឹង​មិន​ចុះចាញ់​ឡើយ ខណៈ​ម៉ារ៉ុក​មាន​បំណង​បង្ហាញ​ថា ភាពខ្លាំង​របស់​ពួកគេ​ក្នុង​ប្រទេស​កាតា​មិនមែន​ចប់​ត្រឹមហ្នឹង​ទេ​។​

​លោក​បាន​និយាយថា “​មនុស្ស​បាន​គោរព​យើង​រួច​ហើយ ប៉ុន្តែ​ខ្ញុំ​គិត​ថា​ឥឡូវនេះ​ពួក​គេ​គោរព​យើង​ច្រើន​ជាង​មុន​”​។​

“​អ្នក​មិន​អាច​ឈ្នះ​វើល​ខាប់​ជាមួយ​អព្ភូតហេតុ​បានទេ អ្នក​ត្រូវ​ឈ្នះ​វា​តាមរយៈ​ការខិតខំ​ប្រឹងប្រែង ហើយ​នោះ​ជា​អ្វី​ដែល​យើង​នឹង​ធ្វើ យើង​នឹង​បន្ត​ធ្វើការ​”៕

ម៉ារ៉ុក​និង​ក្រូ​អាស៊ី​សុទ្ធតែ​ជឿជាក់ថា​ឈ្នះ​នៅ​ថ្ងៃ​សៅរ៍​រៀងៗ​ខ្លួន