​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ រដ្ឋាភិបាល​ជប៉ុន​បាន​អនុម័ត​លើ​ការរុះរើ​គោលនយោបាយ​ការពារ​ជាតិ​ដ៏​សំខាន់​កាលពី​ថ្ងៃ​សុក្រ​ទី​១៦​ធ្នូ រួម​ទាំង​ការបង្កើន​ការចំណាយ​ដ៏​សំខាន់​ខណៈ​ប្រទេស​​នេះ​ព្រមាន​ថា ចិន “​បង្ក​បញ្ហា​ប្រឈម​ជា​យុទ្ធសាស្ត្រ​ធំ​បំផុត​មិន​ធ្លាប់​មាន​” ចំពោះ​សន្តិសុខ​របស់​ខ្លួន​។​

​នៅក្នុង​ការរុះរើ​វិស័យ​ការពារ​ជាតិ​ដ៏​ធំ​បំផុត​របស់​ខ្លួន​ក្នុង​រយៈពេល​ជាច្រើន​ទសវត្សរ៍​មក​នេះ ជប៉ុន​បាន​ប្តេជ្ញា​បង្កើន​ការចំណាយ​ផ្នែក​សន្តិសុខ​ដល់​ពីរ​ភាគរយ​នៃ​ផលិតផល​ក្នុងស្រុក​សរុប (GDP)ដល់ចំនួន៣២០ពាន់លានដុល្លារនៅ​ឆ្នាំ ២០២៧ ផ្លាស់ប្តូរ​ទម្រង់​ទីបញ្ជាការ​យោធា​របស់​ខ្លួន និង​ទិញ​កាំជ្រួច​ថ្មី​ដែល​អាច​វាយ​ដល់​ទីតាំង​បាញ់រ​បស់​សត្រូវ​ដែល​នៅ​ឆ្ងាយៗ​។​

​នាយករដ្ឋមន្ត្រី ហ្វ៊ុយ​មី​អូ គី​ស៊ី​ដា បាន​និយាយ​កាលពី​សប្តាហ៍​មុន​ថា “​ការពង្រឹង​សមត្ថភាព​ការពារជាតិ​របស់​យើង​ជា​មូលដ្ឋាន​គឺជា​បញ្ហា​ប្រឈម​បន្ទាន់​បំផុត​នៅក្នុង​បរិយាកាស​សន្តិសុខ​ដ៏​ធ្ងន់ធ្ងរ​នេះ​”​។​

​ការស្ទង់មតិ​បានបង្ហាញ​ថា​សាធារណជន​របស់​ជប៉ុន​ភាគច្រើន​គាំទ្រ​ការរុះរើ​នេះ ដែល​បង្កឡើង​ដោយ​ការព្រួយបារម្ភ​ចំពោះ​ការកើនឡើង​អំណាច​យោធា​ចិន​និង​ការ​វិត្ត​ន៍​ភូមិសាស្ត្រ​នយោបាយ​ដូចជា​​សង្គ្រាម​នៅ​អ៊ុ​យក្រែន​។​

​ប៉ុន្តែ​ការរុះរើ​នេះ​នៅតែ​អាច​មាន​ភាពចម្រូងចម្រាស ដោយសារ​តែ​រដ្ឋធម្មនុញ្ញ​ក្រោយ​សង្គ្រាមលោកលើកទី​២​របស់​ជប៉ុន​មិន​ទទួល​ស្គាល់​ជា​ផ្លូវការ​នូវ​យោធា​ទេ​ហើយ​កំណត់​ជប៉ុន​នៅ​ត្រឹម​សមត្ថភាព​​ការពារ​ខ្លួន​ធម្មតា​ប៉ុណ្ណោះ​។​

​ចំណាត់ការ​នេះ​ត្រូវ​បាន​គូសបញ្ជាក់​ក្នុង​ឯកសារ​ការពារជាតិ​និង​សន្តិសុខ​ចំនួន​បី ដែល​បាន​អនុម័ត​ដោយ​គណៈរដ្ឋមន្ត្រី​កាលពី​ថ្ងៃ​សុក្រ​។​

​ឯកសារ​ទាំងនោះ​ពណ៌នា​រដ្ឋាភិបាល​ក្រុង​ប៉េកាំង​ថា​ជា “​បញ្ហា​ប្រឈម​ជា​យុទ្ធសាស្ត្រ​ដ៏​ធំ​បំផុត​មិន​ធ្លាប់មាន ក្នុង​ការធានា​សន្តិភាព​និង​ស្ថិរភាព​របស់​ជប៉ុន​” ក៏ដូចជា “​ការព្រួយបារម្ភ​យ៉ាង​ធ្ងន់ធ្ងរ​” សម្រាប់​ជប៉ុន​និង​សហគមន៍​អន្តរជាតិ​។​

​ជា​ការឆ្លើយតប រដ្ឋាភិបាល​គ្រោង​នឹង​បង្កើន​ការចំណាយ​លើ​វិស័យ​ការពារជាតិ​របស់​ខ្លួន​ដល់​ពីរ​ភាគរយ​នៃ​ផលិតផល​ក្នុងស្រុក​សរុប​នៅ​ឆ្នាំសារពើពន្ធ ២០២៧​ដោយ​នាំ​ជប៉ុន​ឱ្យ​ដើរ​ស្រប​ជាមួយ​​គោលការណ៍​ណែនាំ​របស់​សមាជិក​ណា​តូ​៕

​ជប៉ុន​សម្រេច​រុះរើ​គោលនយោបាយ​ការពារជាតិ​របស់​ខ្លួន​ដោយ​បង្កើន​ចំណាយ​យោធា​ដល់​៣២០​ពាន់​លាន​ដុល្លារ​