ដោយៈ ប​.​ជ័យ / បន្ទាយ​មាន​ជ័​យៈ កម្លាំង​នគរបាល​ព្រហ្មទណ្ឌ​កម្រិតធ្ងន់ នៃ​ស្នងការដ្ឋាន ខេត្តបន្ទាយមានជ័យ សហការ​ជាមួយ កម្លាំង​អធិការដ្ឋាន​នគរបាល ស្រុក​ព្រះនេត្រព្រះ បាន​ឃាត់ខ្លួន​ជនសង្ស័យ ១​នាក់ ជាប់ចោទ​ពីបទ​ឃាតកម្ម កាលពី​ជាង ២ ឆ្នាំមុន នៅ​ស្រុក​ព្រះនេត្រព្រះ​។​

​មន្ត្រីនគរបាល​អនុវត្ត​ច្បាប់ បានឱ្យដឹង​នៅ​ថ្ងៃទី​១៦ ខែធ្នូ ឆ្នាំ​២០២២ ថាៈ ក្រោយ​ទទួល បាន​បទបញ្ជា​ពី​លោក ឧ​ត្ត​ម​សេនីយ៍​ទោ សិទ្ធិ ឡោះ ស្នងការ​នគរបាល ខេត្តបន្ទាយមានជ័យ និង​មានការ​សម្របសម្រួល​នីតិវិធី ពី​លោក កើត សុវណ្ណ​រ៉េត ព្រះរាជអាជ្ញា​អម​សាលាដំបូង​ខេត្ត​នោះ លោក​ឧ​ត្ត​ម​សេនីយ៍​ត្រី នូ ជី​វ័​ន្ត ស្នងការរង ផែន​ការងារ​ព្រហ្មទណ្ឌ បាន​ដឹកនាំ​កម្លាំង​នគរបាល​ក្រោម​ឱវាទ សហការ​ជាមួយ កម្លាំង​នគរបាល ស្រុក​ព្រះនេត្រព្រះ បើក​ការស្រាវជ្រាវ និង​បាន​ឈានដល់​ឃាត់ខ្លួន ជនសង្ស័យ ១​នាក់ ឈ្មោះ ហុក វាសនា ហៅ​ស្តៅ ហៅ​កូនង៉ា ភេទ​ប្រុស អាយុ ២៤ ឆ្នាំ ជនជាតិខ្មែរ សព្វថ្ងៃ នៅ​ភូមិ​ភ្នំ​ជញ្ជាំង ឃុំ​ជប់​វា​រី ស្រុក​ព្រះនេត្រព្រះ ។​

​មន្ត្រីនគរបាល​ដដែល បានឱ្យដឹងថាៈ ការឃាត់ខ្លួន​ជនសង្ស័យ គឺ​អនុវត្តតាម​ដីកា​បង្គាប់ ឱ្យ​ចាប់ខ្លួន លេខ​៦៧ ចុះ​ថ្ងៃទី​១១ ខែមិថុនា ឆ្នាំ​២០២០ ចុះហត្ថលេខា​ដោយ​លោក អាំង ចិន្តា ចៅក្រម​ស៊ើបសួរ នៃ​សាលាដំបូង ខេត្តបន្ទាយមានជ័យ (​ពីបទ​ឃាតកម្ម​) ប្រព្រឹត្ត​នៅ​ភូមិ​-​ឃុំ​ព្រះនេត្រព្រះ ស្រុក​ព្រះនេត្រព្រះ ខេត្តបន្ទាយមានជ័យ តាំងពី​ថ្ងៃទី​៤ ខែមិថុនា ឆ្នាំ​២០២២ កន្លងមក ។​

​កម្លាំង​ជំនាញ​នៃ​ការិយាល័យ នគរបាល​ព្រហ្មទណ្ឌ​កម្រិតធ្ងន់ ស្នងការដ្ឋាន​នគរបាល ខេត្តបន្ទាយមានជ័យ បានប្រគល់​ជនសង្ស័យ និង​សំណុំរឿង ឱ្យ​តុលាការ​ចាត់ការ​បន្ត តាម​នីតិវិធី​ហើយ ៕/V​