ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ លោកស្រី អ៊ែន​ជេ​លីណា ចូ​លី និង​ទីភ្នាក់ងារ​ជនភៀសខ្លួន​របស់​អង្គការសហប្រជាជាតិ បាន​ចែក​ផ្លូវ​គ្នា​បន្ទាប់​ពី​ធ្វើការ​ជាង​ពីរ​ទសវត្សរ៍​ជាមួយគ្នា​។​

​នៅក្នុង​សេចក្តីថ្លែងការណ៍​រួម​ដែល​បាន​ចេញផ្សាយ​កាលពី​ថ្ងៃ​សុក្រ​ទី​១៦​ធ្នូ តារា​សម្តែង​អាម៉េរិក​និង​ទីភ្នាក់ងារ​នេះ​បាន​ប្រកាសថា លោកស្រី “​ចាកចេញ​” ពី​តួនាទី​របស់​លោកស្រី​ជា​បេសកជន​ពិសេស​របស់​ទីភ្នាក់ងារ​នេះ “​ដើម្បី​ចូលរួម​ក្នុង​បញ្ហា​មនុស្សធម៌​និង​សិទ្ធិ​មនុស្ស​កាន់តែ​ទូលំ​ទូលាយ​ជាង​នេះ​”​។​

​លោកស្រី​ចូលី​ត្រូវបាន​ដកស្រង់​សម្តី​ដោយ​និយាយ​នៅក្នុង​សេចក្តីថ្លែងការណ៍​ថា “​ខ្ញុំ​នឹង​បន្ត​ធ្វើ​អ្វី​គ្រប់យ៉ាង​នៅក្នុង​អំណាច​របស់​ខ្ញុំ​ក្នុង​រយៈពេល​ប៉ុន្មាន​ឆ្នាំ​ខាង​មុខ ដើម្បី​គាំទ្រ​ជនភៀសខ្លួន​និង​ជន​ផ្លាស់​ទីលំនៅ​ផ្សេងទៀត​” ដោយ​បន្ថែម​ថា លោកស្រី​មាន​អារម្មណ៍​ថា​វា​ដល់ពេល “​ដើម្បី​ធ្វើ​ការងារ​ផ្សេង​” ដោយ​ចូលរួម​ដោយ​ផ្ទាល់​ជាមួយ​ជនភៀសខ្លួន​និង​អង្គការ​ក្នុងស្រុក​។​

​លោកស្រី​ចូលី​បាន​ចាប់ផ្តើម​ធ្វើការ​ជា​លើកដំបូង​ជាមួយ​ទីភ្នាក់ងារ​ជនភៀសខ្លួន​របស់​អ​.​ស​.​ប​ក្នុង​ឆ្នាំ ២០០១ ហើយ​ត្រូវបាន​តែងតាំង​ជា​បេសកជន​ពិសេស​របស់​ខ្លួន​ក្នុង​ឆ្នាំ ២០១២​។ សេចក្តីថ្លែងការណ៍​បាន​ពណ៌នា​តារា​ពហុ​ជំនាញ​នេះ​ថា “​បាន​បំពេញ​បេសកកម្ម​ចុះ​ដល់​កន្លែង​ជាង ៦០ ធ្វើ​ជា​សាក្សី​អំពី​រឿងរ៉ាវ​នៃ​ទុក្ខលំបាក​ក៏ដូចជា​ក្តីសង្ឃឹម​និង​ការតស៊ូ​”​។​

​ស្នងការ​ជាន់ខ្ពស់​អ​.​ស​.​ប​ទទួលបន្ទុក​ជនភៀសខ្លួន លោក ហ្វី​លីប​ប៉ូ ហ្គ្រា​ន​ឌី (Filippo Grandi) ត្រូវបាន​ដកស្រង់​សម្តី​ថា “​បន្ទាប់​ពី​រយៈពេល​ដ៏​យូរ​និង​ភាពជោគជ័យ​ជាមួយ​អង្គការ UNHCR ខ្ញុំ​ពេញចិត្ត​ចំពោះ​បំណងប្រាថ្នា​របស់​លោកស្រី​ក្នុង​ការផ្លាស់ប្តូរ​ការចូល​រួម​របស់​លោកស្រី និង​គាំទ្រ​ការសម្រេចចិត្ត​របស់​លោក​ស្រី​។ ខ្ញុំ​ដឹង​ថា​បុព្វហេតុ​ជនភៀសខ្លួន​នឹង​នៅតែ​ស្ថិតក្នុង​បេះដូង​របស់​លោកស្រី ហើយ​ខ្ញុំ​ប្រាកដ​ថា​លោកស្រី​នឹង​នាំមក​យក​បំណងប្រាថ្នា​និង​ការយកចិត្តទុកដាក់​ដូចគ្នា​នេះ​ដាក់​ចំពោះ​គុណ​តម្លៃ​មនុស្សធម៌​កាន់តែ​ទូលំទូលាយ​”​។​

​នៅក្នុង​អត្ថបទ​អត្ថាធិប្បាយ​មួយ​ដែល​ចុះផ្សាយ​ក្នុង​កាសែត The Guardian កាលពី​ខែ​មុន លោកស្រី​ចូលី​បាន​និយាយ​អំពី​ការខកចិត្ត​ចំពោះ​កង្វះ​ការរីកចម្រើន​ជា​សកល​ក្នុងការ​បញ្ចប់​អំពើ​ហិង្សា​ផ្លូវភេទ​នៅ​ក្នុង​ជម្លោះ​៕

​លោកស្រី​ចូលី​ថ្លែង​សុន្ទរកថា​ក្នុង​កិច្ចប្រជុំ​ស្តីពី​ការរក្សា​សន្តិភាព​របស់​អ​.​ស​.​ប​នៅ​ទីស្នាក់ការ​កណ្តាល​អ​.​ស​.​ប​កាលពី​ថ្ងៃទី ២៩ ខែ​មីនា ឆ្នាំ ២០១៩