​ប្រែ​សម្រួលៈ​បំណង​(​ដេល្លី​ម៉េល​)៖ ប្រធានាធិបតី​រុស្ស៊ី​លោក​វ្ល៉ា​ឌី​មៀ ពូ​ទីន បាន​ជួបប្រជុំ​ជាមួយ​មេៗ​ទ័ព​របស់​លោក​នៅ​ចំ​ថ្ងៃ​ដែល​កងកម្លាំង​រុស្ស៊ី​បាញ់​កាំជ្រួច​មួយ​ប្រាវ​ទៀត​ទៅលើ​បណ្តា​ទីក្រុង​អ៊ុ​យក្រែន​។​កាលពី​ថ្ងៃ​សុក្រ​លោកពូ​ទីន បាន​ចំណាយពេល​ច្រើន​ម៉ោង​​នៅ​បញ្ជា​ដ្ឋា​ន​របស់​«​ប្រតិបត្តិការ​យោធា​ពិសេស​»​ដើម្បី​ពិភាក្សា​អំពី​វិធានការ​ត្រូវ​អនុវត្ត​បន្ទាប់​។​

​វា​បាន​កើតឡើង​នៅពេល​មន្ត្រី​យោធា​អ៊ុយ​ក្រែនខ្លះ​បាន​អះអាងថា រុស្ស៊ី​មាន​ផែនការ​វាយប្រហារ​ធំ​មួយ ប្រហែល​ជា​នៅ​ដើម​ឆ្នាំ​ក្រោយ​។​

​ការវាយប្រហារ​របស់​រុស្ស៊ី​មួយ​ប្រាវ​ទៀត​លើ​បណ្តាញ​ចែក​ចាញ​ចរន្តអគ្គិសនី​អ៊ុយ​ក្រែន​នាំ​អោយ​ប្រជាជន​អ៊ុយ​ក្រែន​រាប់លាន​នាក់​គ្មាន​អគ្គិសនី​ប្រើ​។​

​រូបភាព​ចេញពី​កិច្ចប្រជុំ​កាលពី​ថ្ងៃ​សុក្រ​បានបង្ហាញ​លោកពូ​ទីន​អម​ដោយ​រដ្ឋមន្ត្រី​ការពារជាតិ សឺ​ហ្គេ សយ​ហ្គូ និង​ប្រមុខ​កងកម្លាំងប្រដាប់អាវុធ វ៉ា​ឡេរី ហ្គេ​រ៉ា​ស៊ីម៉ូ​វ​(Valeriy Gerasimov)​។​

​រដ្ឋមន្ត្រី​ការពារជាតិ សឺ​ហ្គេ សយ​ហ្គូ និង​ប្រមុខ​កងកម្លាំងប្រដាប់អាវុធ វ៉ា​ឡេរី ហ្គេ​រ៉ា​ស៊ីម៉ូ​វ មាន​វត្តមាន​ក្នុង​កិច្ចប្រជុំ​

​តាម​កញ្ចក់​ទូរទស្សន៍​មេដឹកនាំ​វិមាន​ក្រឹម​ឡាំង​រូបនេះ​ត្រូវបាន​គេ​ឃើញ​និយាយប្រាប់​ពួក​នាយទាហាន​របស់លោក​ថា «​យើង​នឹង​ស្តាប់​ពួក​មេ​បញ្ជា​តាម​ទិស​ប្រតិបត្តិការ​នី​មួយៗ ហើយ​ខ្ញុំ​ចង់​ស្តាប់​សំណើ​​របស់​អ្នក​អំពី​សកម្មភាព​បន្ទាន់​និង​រយៈពេល​មធ្យម​របស់​យើង​»​។​

​វត្តមាន​របស់​លោក វ៉ា​ឡេរី ហ្គេ​រ៉ា​ស៊ីម៉ូ​វ បានបញ្ចប់​ពាក្យ​ចចាមអារ៉ាម​តាម​បណ្តាញ​សង្គម​ដែលថា លោក​ត្រូវ​ពូ​ទីន​បណ្តេញចេញ​ពី​តំណែង​។​

​ឧត្តមសេនីយ៍កងទ័ព​អាកាស លោក​សឺ​ហ្គេ ស៊ូ​រ៉ូវី​គីន​(Sergei Surovikin)​ដែល​ត្រូវបាន​តែងតាំង​ជា​មេបញ្ជាការ​រុស្ស៊ី​ប្រចាំ​អ៊ុយ​ក្រែន​កាលពី​ខែ​តុលា ក៏​មាន​វត្តមាន​នៅ​កិច្ចប្រជុំ​។​

​សូមបញ្ជាក់​ថា កងកម្លាំង​អ៊ុយ​ក្រែន​បាន​វាយ​ដណ្តើម​យក​ទឹកដី​មក​វិញ​ជា​បន្តបន្ទាប់​នៅ​ប៉ុន្មាន​ខែ​ចុងក្រោយ​នេះ រួម​ទាំង​ទីក្រុង​ឃើ​សុន ដែល​ជា​ទីក្រុង​ធំ​តែមួយគត់​ដែល​កងកម្លាំង​រុស្ស៊ី​បាន​វាយ​កាន់កាប់​​តាំងពី​ដើម​នៃ​ប្រតិបត្តិការ​យោធា​របស់​ខ្លួន​ចូល​អ៊ុយ​ក្រែន​មក​។​ការបាត់បង់​ទឹកដី​ដែល​ខ្លួន​បាន​វាយ​កាន់កាប់​ទៅ​វិញ​បង្ក​អោយ​មាន​ការរិះគន់​ពី​ក្រុម​សារព័ត៌មាន​គាំទ្រ​វិមាន​ក្រឹម​ឡាំង​។​

​កិច្ចប្រជុំ​នេះ​កើតឡើង​ចំពេល​មេបញ្ជាការ​យោធា​អ៊ុ​យក្រែន ឧត្តមសេនីយ៍ វ៉ា​ឡេរី ហ្សា​លូ​ហ្ស៍​ន្យី​(Valerii Zaluzhnyi)​បាន​អះអាង​ថា រដ្ឋាភិបាល​ទីក្រុង​មូ​ស្គូ​អាច​ប៉ុនប៉ង​បើក​ការវាយប្រហារ​ថ្មី​មួយ​​នៅ​ដើមឆ្នាំ​២០២៣​។​លោក​បាន​ព្រមាន​ថា រុស្ស៊ី​ត្រៀម​ទាហាន​ប្រមាណ​២០០.០០០​នាក់​សំរាប់​ការវាយប្រហារ​នេះ​៕

​ប្រធានាធិបតី​អ៊ុយ​ក្រែន​បាន​និយាយ​កាលពី​ថ្ងៃ​សៅ​រ៍ថា ចរន្តអគ្គិសនី​ត្រូវបាន​ស្តារឡើងវិញ​សំរាប់​ប្រជាជន​ជិត​៦​លាន​នាក់​ក្រោយ​ការវាយប្រហារ​របស់​រុស្ស៊ី​មួយលើកទៀត​