​ប្រែ​សម្រួលៈ​បំណង​(​ប៊ី​ប៊ីស៊ី​)៖ ប៉ូលីស​អាល្លឺម៉ង់ និយាយថា ខ្លួន​បាន​រកឃើញ​គ្រឿងអលង្ការ​សម័យ​សតវត្សរ៍​ទី​១៨​មួយចំនួន​ដែល​ត្រូវបាន​ចោរលួច​ចេញពី​សារមន្ទីរ​ក្រុង​ដ្រេ​ស​ដិន​( Dresden )​មួយ​កាលពី​​ឆ្នាំ​២០២៩​។​

​ក្នុងចំណោម​ទ្រព្យសម្បត្តិ​ដែល​បាត់​តំលៃ​១១៩​លាន​ដុល្លារ អាជ្ញាធរ​កាលពី​យប់​ថ្ងៃ​សៅរ៍​បាន​ប្រគ​ល់​គ្រឿងអលង្ការ​៣១​មុខ​ទៅអោយ​សារមន្ទីរ​ហ្គ្រី​ន វ៉​ល​ធ៍​( Green Vault)​នៅ​ក្រុង​ប៊ែរ​ឡាំង​ដើម្បី​រក្សា​​ទុក​។​​ទ្រព្យសម្បត្តិ​មាន​តំលៃ​ទាំងនេះ​ត្រូវបាន​រកឃើញ​ក្រោយ​មាន​កិច្ចពិភាក្សា​ជាមួយ​មេធាវី​របស់​បុរស​ប្រាំមួយ​នាក់​ដែល​កំពុង​ឡើង​សវនាការ​អំពី​ចោរ​កម្មវត្ថុ​បុរាណ​នេះ​។​

​ក្នុងចំណោម​វត្ថុ​ដែល​ត្រូវបាន​រកឃើញ​មក​វិញ​រួមមាន​គ្រឿងអលង្ការ​ដាំ​ត្បូង​រាង​ផ្កាយ​។​

​បូ​ដាំ​ពេជ្យ​ដ៏​ធំ​មួយ​ស្ថិត​ចំណោម​វត្ថុ​ដែល​ចោរ​លួច​ចេញពី​សារមន្ទីរ​កាលពី​ឆ្នាំ​២០១៩

​ពួកចោរ​បាន​លួច​គ្រឿងអលង្ការ​ទាំងនេះ​ចេញពី​ទ្រព្យ​បុរាណ​ប្រមូល​ទុក​ដោយ​មេដឹកនាំ​នៃ​ព្រះរាជាណាចក្រ​សា​សូ​នី​(Saxony)​នៅ​ឆ្នាំ​១៧២៣​។​ពួក​វា​ត្រូវ​បាន​រក្សាទុក​ក្នុង​​សារមន្ទីរ​ក្រុង​ដ្រេ​ស​ដិន​​រហូតដល់​ពេល​មាន​ចោរប្លន់​នៅ​ឆ្នាំ​២០១៩​។​

​ពួក​មន្ត្រី​អាល្លឺម៉ង់​ជឿថា ការ​លួច​ប្លន់​នេះ​ត្រូវបាន​រៀបចំ​ទុកជាមុន​យ៉ាង​ល្អ​និង​អនុវត្ត​ដោយ​ចោរ​អាជីព​។​មុន​ទម្លុះ​ចូលក្នុង​សារមន្ទីរ ពួកចោរ​បាន​ដុត​ភ្លើង​អោយឆេះបន្ទប់ភ្លើងដាច់​ចរន្តអគ្គិសនី​នៅ​តាម​ដង​វិថី​ជុំវិញ​​សារមន្ទីរ​។​មនុស្ស​ពាក់​ម៉ាស់​មុខ​ជាច្រើន​នាក់​បាន​សំរុកចូល​សាល​តាំង​វត្ថុ​បុរាណ មុន​ពេល​វាយ​បំបែក​កញ្ចក់​ទូ​តាំង​និង​យក​គ្រឿងអលង្ការ​។​បន្ទា​ប់មក​ពួកគេ​បាន​ភៀសខ្លួន​តាម​រថយន្ត​អូ​ឌី​មួយ​ដែល​​ក្រោយមក​ប៉ូលីស​បាន​រកឃើញ​ត្រូវ​គេ​ដុត​ចោល​នៅ​កន្លែង​ចត​រថយន្ត​ក្រោមដីមួយ​។​ប្រតិបត្តិការ​ទាំងមូល​ចំណាយ​ពេល​ត្រឹមតែ​ជាង​ដប់​នាទី​ប៉ុណ្ណោះ​។​

​វត្ថុ​ដែល​រកឃើញ​មក​វិញ​ត្រូវបាន​អ្នកឯកទេស​ពិនិត្យ​ដើម្បី​បញ្ជាក់​ថា​វា​ជា​របស់​សុទ្ធ តែ​មិនមែន​វត្ថុ​បាត់​ទាំងអស់​ត្រូវបាន​រកឃើញ​មក​វិញ​ទេ​។​ត្បូង​មាន​តំលៃ​មួយ​គ្រាប់​ឈ្មោះថា ត្បូង​ស​ដ្រេ​ស​ដិន​(Dresden White Diamond)​នៅ​បាត់​នៅឡើយ​។​

​អាជ្ញាធរ​ផ្តល់ព័ត៌មាន​តិចតួច​អំពី​ថា​តើ​វត្ថុ​បុរាណ​ទាំងនេះ​ត្រូវបាន​រកឃើញ​មកវិញ​ដោយ​របៀប​ណា នៅពេល​សវនាការ​ពួក​ចោរ​ដែល​បាន​ចាប់ផ្តើម​តាំងពី​ខែ​មករា នឹង​ត្រូវ​បន្ត​ធ្វើ​នៅ​ថ្ងៃ​អង្គារ​ទី​២០​ធ្នូ​៕