​ប្រែ​សម្រួលៈ​បំណង​(​ដេល្លី​ម៉េល​)៖ ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀ ហ្សេ​ឡេន​ស្គី បាន​និយាយ​កាលពី​ថ្ងៃអាទិត្យ​ថា​ការការពារ​ព្រំដែន​អ៊ុយ​ក្រែនជា​«​អាទិភាព​ខ្ជាប់ខ្ជួន​»​មួ​យ​និង​ថា​ប្រទេស​របស់​លោក​​ត្រៀម​ជា​ស្រេច​សំរាប់​គ្រប់​សេណា​រី​យ៉ូ​ជាមួយ​រុស្ស៊ី និង​សម្ពន្ធមិត្ត​របស់​រុស្ស៊ី គឺ​បេឡា​រូ​ស​។​

​ក្នុង​សុន្ទរកថា​ជា​វីដេអូ​ពេលយប់ លោក​ហ្សេ​ឡេន​ស្គី បាន​និយាយថា​«ការពារ​ព្រំដែន​របស់​យើងទាំង​ជាមួយ​រុស្ស៊ី​និង​បេឡា​រូស ជា​អាទិភាព​ខ្ជាប់ខ្ជួន​របស់​យើង​។​យើង​កំពុង​ត្រៀម​គ្រប់​សេណា​រី​យ៉ូ​ដែល​អាច​​កើត​មាន​ទាំងអស់​»​។​

​លោក​បាន​និយាយ​ដូច្នេះ​នៅ​មួយ​ថ្ងៃមុន​ដំណើរ​ទស្សនកិច្ច​ទៅកាន់​បេឡា​រូស​ពី​សំណាក់​ប្រធានាធិបតី​រុស្ស៊ី​លោក​វ្ល៉ា​ឌី​មៀ ពូ​ទីន ចំ​ពេល​មាន​ការ​រំពឹងថា​រុស្ស៊ី​នឹង​បើក​ការវាយលុក​ធំ​ជា​ថ្មី​នៅ​​ឆ្នាំ​ក្រោយ​ហើ​​យ​ប្រហែលជា​ចេញពី​បេឡា​រូស​ផង​។​

​ក្នុង​សុន្ទរកថា លោក​ហ្សេ​ឡេន​ស្គី​បានចេញ​ការអំពាវនាវ​ជា​ថ្មី​អោយ​បណ្តា​ប្រទេស​លោកខាងលិច​ផ្តល់អោយ​អ៊ុយ​ក្រែន​នូវ​សព្វាវុធ​ការពារ​ដែ​នអាកាស​។​លោក​ក៏​បាន​និយាយ​ថា​កងកម្លាំង​របស់​លោក​កំពុង​​កាន់កាប់​ទីប្រជុំជន​បាក់​មុត​នៅ​អ៊ុយ​ក្រែន​ខាងកើត កន្លែង​មាន​ការប្រយុទ្ធ​គ្នា​យ៉ាងខ្លាំង​។​

​ប្រធានាធិបតី​អ៊ុយ​ក្រែនក៏​បាន​បន្ថែមថាច​រ​ន្ត​អគ្គិសនី​ត្រូវបាន​ស្តារឡើងវិញ​សំរាប់​ប្រជាជន​អ៊ុយ​ក្រែន​ប្រមាណ​៣​លាន​នាក់​បន្ថែម​លើ​៦​លាន​នាក់​កាល​ពី​មួយ​ថ្ងៃមុន​ក្រោយ​ការវាយប្រហារ​របស់​រុស្ស៊ី​មួយ​​ប្រាវ​ចុងក្រោយ​លើ​ហេដ្ឋារចនាសម្ពន្ធ​ថា​ម​ពល ដែល​បណ្តាលអោយ​ដាច់​ភ្លើង​សំរាប់​ប្រជាជន​អ៊ុ​យក្រែន​៩​លាន​នាក់​អស់​ពេល​ពីរ​ថ្ងៃ​។​

​សូមបញ្ជាក់​ថា រុស្ស៊ី​បាន​បាញ់​កាំជ្រួច​ស្រោច​លើ​បណ្តាញ​ចែកចាយ​និង​ផ្គត់ផ្គង់​ចរន្តអគ្គិសនី​កាលពី​ថ្ងៃ​សុក្រ ដោយ​បាន​សម្លាប់​មនុស្ស​យ៉ាង​តិច​បីនាក់ និង​បំផ្លាញ​ទីតាំង​ថាមពល​ចំនួន​ប្រាំបួន​៕

​ហ្សេ​ឡេន​ស្គី​បាន​អះអាង​ថា អគ្គិសនី​ត្រូវ​បាន​ស្តារឡើងវិញ​សំរាប់​ប្រជាជន​អ៊ុ​យក្រែន​៩​លាន​នាក់​នៅ​រយៈពេល​តែ​ពីរ​ថ្ងៃ​បន្ទាប់ពី​ការវាយប្រហារ​បំផ្លាញ​ហេដ្ឋារចនាសម្ពន្ធ​ថា​ម​ពលពី​សំណាក់​កងកម្លាំ​ង​រុស្ស៊ី​