​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រធាន​ក្រុម​អា​ហ្សង់​ទីន លី​អូ​នែ​ល ម៉េស​ស៊ី នឹង​មិន​ទាន់​ចូល​និវត្តន៍​ពី​អាជីព​អន្តរជាតិ​របស់​គាត់​នៅឡើយ​ទេ ខណៈ​ការ​ល្បួង​ឱ្យ​”​ទទួល​បទពិសោធន៍​ពីរ​បី​​ប្រកួត​ទៀត​ក្នុងនាម​ជា​ម្ចាស់​ជើងឯក​ពិភពលោក​” ពិតជា​អស្ចារ្យ​ពេក​ហើយ​។​

​ខ្សែប្រយុទ្ធ​ក្រុម Paris St Germain វ័យ ៣៥ ឆ្នាំ​រូប​នេះ​បាន​ស៊ុត​បាល់​បញ្ចូល​ទី​ពីរ​គ្រាប់​ក្នុង​ការប្រកួត​វើល​ខាប់​ផ្តាច់ព្រ័ត្រ​ទល់​នឹង​ក្រុមបារាំង ដែល​ឈាន​ដល់​ការ​ស៊ុត​បាល់​ប៉េណាល់​ទី​បន្ទាប់ពី​​កាយ​លៀន អឹម​បា​ប៉េ (Kylian Mbappe) ស៊ុត​បាន​បី​គ្រាប់​ដើម្បី​ដាក់​ក្រុម​របស់​ម៉េស​ស៊ីនៅ​មាត់ជ្រោះនៃ​បរាជ័យ​។​

​ដោយ​គ្មានអ្វី​សំខាន់​ដើម្បី​ឈ្នះ​ទៀត​នៅលើ​ពិភពលោក ឆាក​អឺរ៉ុប ឬ​ក្នុងស្រុក មាន​ការរំពឹង​ទុក​ថា ម៉េស​ស៊ី​អាច​នឹង​សម្រេច​ចិត្ត​ចូលនិវត្តន៍​ក្រោម​ការ​បង្ហាញខ្លួន ១៧២ ដង​របស់​គាត់​ជាមួយ​អា​ហ្សង់​ទីន ដែល​គាត់​ក៏​បាន​ឈ្នះ​ពាន Copa America កាលពី​ឆ្នាំមុន​ជាមួយ​គ្នា​ផង​ដែរ​។​

​ប៉ុន្តែ​បន្ទាប់ពី​ពិធី​ប្រគល់ពាន គាត់​បាន​ធានា​ដល់​អ្នកគាំទ្រ​ថា​គាត់​គ្រោង​នឹង​បន្ត​ជា​ផ្នែក​មួយ​នៃ​ក្រុម​ជម្រើស​ជាតិ ដោយ​ប្រាប់​ស្ថានីយ​ទូរទស្សន៍​អា​ហ្សង់​ទីន TyC Sports ថា “​ជាក់ស្តែង​ខ្ញុំ​ពិត​​ចង់​បិទ​អាជីព​របស់​ខ្ញុំ​ជាមួយ​ការប្រកួត​នេះ​មែន ហើយ​ខ្ញុំ​មិនអាច​សុំ​អ្វី​លើសពីនេះ​ទៀត​ទេ​”​។​

“​តើ​នឹង​មាន​អ្វី​កើតឡើង​បន្ទាប់​ពី​នេះ​? ខ្ញុំ​បាន​ឈ្នះ​ពាន Copa America និង World Cup សឹងតែ​នៅ​ចុងបញ្ចប់​នៃ​អាជីព​របស់​ខ្ញុំ​…”​។​

“​ខ្ញុំ​ស្រលាញ់​បាល់ទាត់ វា​ជា​អ្វី​ដែល​ខ្ញុំ​ធ្វើ​។ ខ្ញុំ​រីករាយ​ក្នុង​ការជាប់​ជម្រើសជាតិ ហើយ​ចង់​បន្តទៀត ដើម្បី​ទទួលបាន​បទពិសោធន៍​ការប្រកួត​មួយចំនួនទៀត​ក្នុងនាម​ជា​ម្ចាស់​ការពារ​តំណែង​ជើងឯក​ពិភពលោក​”៕

ម៉េស​ស៊ីចង់​ភ្លក្ស​រសជាតិ​ក្នុងនាម​ជា​អ្នកការពារ​តំណែង​ជើងឯក​វើល​ខា​ប់ ដូច្នេះ​មិន​ទាន់​ចូលនិវត្តន៍​ទេ