​ប្រែ​សម្រួលៈ​បំណង​(​ដេល្លី​ម៉េល​,​ស្ត្រេត​ថែមស៍​)៖​ចិន​នៅ​ថ្ងៃ​ចន្ទ​នេះ​បាន​រាយការណ៍​មនុស្ស​ស្លាប់​ពីរ​នាក់​ដោយ​ជំងឺ​កូវី​ដ​១៩​ដែល​នាំ​អោយ​ចំនួន​ស្លាប់​សរុប​ដោយកូវី​ដ​នៅពេលបី​ឆ្នាំ​មក​នេះ​ឡើងដ​ល់​៥.២៣៧​នាក់ នេះ​បើ​តាម​ការប្រកាស​របស់​គណៈកម្មាធិការ​សុខាភិបាល​ជាតិ​។​

​គណៈកម្មាធិការ​ខាងលើ​ក៏​បាន​ប្រកាស​អ្នក​ឆ្លង​ចេញ​រោគ​សញ្ញា​ថ្មី​ចំនួន​១.៩៩៥​នាក់​សំរាប់​ថ្ងៃ​១៨​ធ្នូ បន្ទាប់​ពី​ឆ្លង​២.០៩៧​នាក់​កាល​ពី​មួយ​ថ្ងៃមុន​។​

​សូមបញ្ជាក់​ថា គិត​ត្រឹម​ថ្ងៃ​១៨​ធ្នូ ចិន​មាន​អ្នក​ឆ្លងកូវី​ដ​១៩​ចេញ​រោគសញ្ញា​សរុប​ត្រឹម​៣៨០.៤៥៣​នាក់​ប៉ុណ្ណោះ គឺ​ទាប​ជាង​ចំនួន​ឆ្លង​របស់​ប្រទេស​ដទៃ​ទៀត​ភាគច្រើន​នៅក្នុង​លោក​។​

​យោងតាម​របាយការណ៍​សារព័ត៌មាន ចំនួន​អ្នក​ស្លាប់​ដោយកូវី​ដ​១៩​ត្រូវបាន​គេ​ឃើញ​នៅ​តាម​សាល​តម្កល់​សព​និង​កន្លែង​បូជាសព​កាន់តែច្រើន​នៅ​ក្រុង​ប៉េកាំង​ទោះជា​ចិន​មិនបាន​ផ្សាយ​តួលេខ​ស្លាប់​​ដោយ​ជំងឺ​នេះ​អស់​ពេល​ពីរ​សប្តាហ៍​មក​ហើយ​ក្តី​។​

​បុគ្គលិក​នៅ​កន្លែង​បូជ្ញា​សព​នៅ​ក្រុង​ប៉េកាំង​មួយ​បាន​ប្រាប់​សារព័ត៌មាន​Financial Times​ថា ពួកគេ​បាន​ដុត​សព​កូវី​ដ​១៩​យ៉ាងតិច​៣០​កាលពី​ថ្ងៃ​ពុធ​នៅពេល​សាច់ញាតិ​របស់​សព​ម្នាក់​បាន​​និយាយថា​សមាជិក​គ្រួសា​រ​របស់​គេ​បាន​ឆ្លងកូវី​ដ​។​ក្នុងពេល​ជាមួយគ្នា ទីភ្នាក់ងារ​សារព័ត៌មាន​រ៉​យ​ទ័របាន​និយាយថា ផ្ទះ​បុណ្យ​សព​នៅ​ក្រុង​ប៉េកាំង​កំពុង​ជោរជន់​ដោយ​សាកសព​។​

​ផ្ទះ​បុណ្យសព​The Beijing Dongjiao Funeral Home បាន​បូជាសព​១៥០​កាលពី​ថ្ងៃ​ពុធ ក្នុងនេះ​៣០​ទៅ​៤០​ជា​សព​អ្នក​កើតកូ​វីដ​១៩ នេះ​បើ​តាម​បុគ្គលិក​សុំ​មិន​បញ្ចេញ​ឈ្មោះ​ម្នាក់​ប្រាប់​Financial Times​។​

​ចិន​មិន​បាន​រាយការណ៍​មនុស្ស​ស្លាប់​ដោយកូវី​ដ​ចាប់តាំងពី​ថ្ងៃ​៤​ធ្នូ ពេល​ដែល​មនុស្ស​២​នាក់​ត្រូវបាន​រាយការណ៍​ថា​ស្លាប់​ដោយ​ជំងឺ​នេះ​។​អ្នក​ស្លាប់​ដោយកូវី​ដ​១៩​ចុងក្រោយ​ដែល​ត្រូវបាន​រាយការណ៍​នៅ​ក្រុង​​ប៉េកាំង​គឺ​នៅ​ថ្ងៃ​២៣​វិច្ឆិកា ។​វា​កើត​លើ​ស្ត្រី​វ័យ​៨៧​ឆ្នាំ​ម្នាក់ ដែល​អាជ្ញាធរ​ថា​មាន​ជំងឺ​បេះដូង​រ៉ាំរ៉ៃ​។​

​សូមបញ្ជាក់​ថា​ចិន​កាលពី​សប្តាហ៍​មុន​បាន​ឈប់​រាយការណ៍​ចំនួន​ឆ្លង​កូ​វីដមិន​ចេញ​រោគសញ្ញា ដែល​វា​ធ្លាប់​តែ​ជា​ចំណែក​ធំជាងគេ​នៃ​ការឆ្លង​ប្រចាំថ្ងៃ​នៅ​ចិន​៕