​ប្រែ​សម្រួលៈ​បំណង​(​ស្ត្រេត​ថែមស៍​)៖ យោធា​ថៃ​នៅ​ថ្ងៃ​ចន្ទ​នេះ​បាន​បញ្ជូន​នាវាចម្បាំង​ជាច្រើន​គ្រឿង​រួម​ទាំង​ឧទ្ធម្ភាគចក្រ​ទៅ​ស្វែងរក​ទាហាន​ម៉ា​រី​ន​៣១​នាក់​ដែល​កំពុង​បាត់​ខ្លួន​ក្រោយ​នាវាចម្បាំង​មួយ​លិច​​កាល​ពី​យប់មិញ​ក្នុង​សមុទ្រ​មាន​ខ្យល់​ខ្លាំង​និង​រលក​ធំៗ​នៅក្នុង​ឈូង​សមុទ្រ​ថៃ​។​

​អ្នកនាំពាក្យ​កងទ័ពជើងទឹក​ថៃ បាន​និយាយថា នាវា​បី​គ្រឿង​និង​ឧទ្ធម្ភាគចក្រ​ពីរ​របស់​កងទ័ពជើងទឹក ត្រូវបាន​បញ្ជូន​ទៅ​ស្វែងរក​ទាហាន​បាត់​ខ្លួន​នៅ​ឯនាយ​ឆ្នេរ​ខេត្ត គី​រី ខាន់​(Khiri Khan)​នៅ​​ខាងត្បូង​ក្រុង​បាងកក បន្ទាប់​ពី​នាវា HTMS Sukhothai​ជួប​បញ្ហា​ម៉ាស៊ីន​និង​លិច​នៅ​មុន​ពាក់កណ្តាល​យប់​ថ្ងៃអាទិត្យ នៅ​ចម្ងាយ​ប្រមាណ​៣០​គីឡូម៉ែត្រ​ពី​ឆ្នេរ​។​ប្រតិបត្តិការ​ជួយ​សង្គ្រោះ​និង​ស្វែងរក​​ទាំង​យប់​បាន​ជួយសង្គ្រោះ​បាន​ទាហាន​៧៥​នាក់​ក្នុងចំណោម​ទាហាន​១០៦​នាក់​នៅ​លើ​នាវា​កើតហេតុ ។​

​កងទ័ព​ជើង​ទឹក​បាន​ថត​បង្ហោះ​ក្នុង​បណ្តាញ​សង្គម​ដោយ​បង្ហាញ​បុគ្គលិក​ជួយសង្គ្រោះ​មួយ​ក្រុម​ក្នុង​ឈុត​អាវ​ពោង​ពណ៌​ទឹកក្រូច បើក​ចេញពី​នាវាចម្បាំង​តាម​ទូក​មួយ​ក្នុង​ភាព​ងងឹត​ចំ​ពេល​មាន​រលក​ធំៗ​។​

​នាវា HTMS Sukhothai​ផលិត​នៅ​អាម៉េរិក​និង​ដាក់​ដំណើរការ​តាំងពី​ឆ្នាំ​១៩៨៧​។​វា​ត្រូវ​ទឹករលក​ធំៗ​វាយប្រហារ​កាលពី​ថ្ងៃអាទិត្យ នាំ​អោយ​វា​ផ្អៀង​មុន​ទឹក​ហូរ​ចូល​និង​លិច​។​

​កងទ័ពជើងទឹក​ថៃ​បើក​ប្រតិបត្តិការ​ស្វែងរក​និង​សង្គ្រោះ​ទាំងយប់​ក្នុង​អាកាសធាតុ​អាក្រក់​ក្រោយ​ពី​នាវា​ជាមួយ​ទាហាន​១០៦​នាក់​បាន​លិច​

​របាយការណ៍​មួយ​អំពី​ប្រតិបត្តិការ​នេះ​បាន​និយាយថា ត្រឹម​ព្រឹក​ថ្ងៃ​ចន្ទ សមាជិក​៧៥​នាក់​ក្នុងចំណោម​១០៦​នាក់​របស់​នាវា​ត្រូវបាន​នាំ​មក​កាន់​កំពង់ផែ​មួយ​នៅ​ខេត្ត​គី​រី ខាន់ ដោយ​បី​នាក់​រងរបួស​ធ្ងន់​៕

​នាវា HTMS Sukhothai​មុនពេលលិច