​ប្រែ​សម្រួលៈ​បំណង​(​ដេល្លី​ម៉េល​)៖​ពួក​សកម្មប្រយុទ្ធ​មកពី​ក្រុម​តា​លី​បង់​ប៉ា​គី​ស្ថាន​ជាង​៣០​នាក់​កំពុង​ចាប់​ប៉ូលីស​និងយោធាជាច្រើន​នាក់​ធ្វើ​ជា​ចំណាប់ខ្មាំង​កាលពី​ថ្ងៃ​ចន្ទ ក្រោយ​ពួកគេ​សំរុក​ចេញ​​ពី​កន្លែង​ឃុំខ្លួន​និង​កាន់កាប់ប៉ុស្តិ៍​ប៉ូលីស​។​

​សមាជិក​ក្រុមតេ​រីក​-​អ៊ី​-​តា​លី​បង់ ប៉ា​គី​ស្ថាន​(TTP)​ដែល​ផ្សេង​ពី​ក្រុម​តា​លី​បង់​អា​ហ្វា​ហ្គានី​ស្ថានតែ​មាន​មនោគមវិជ្ជា​អ៊ីស្លាម​ប្រកាន់​តឹង​ត្អឹង​ស្រដៀង​គ្នា បាន​យក​ឈ្នះ​លើ​អ្នក​ឃុំខ្លួន​ពួកគេ​ដោយសារ​​មាន​គ្នា​ច្រើន​ជាង​និង​បាន​ប្រមូល​ដក​យក​អាវុធ​ពី​ប៉ូលីស​។​

​ពួក​សកម្មប្រយុទ្ធ​ទាំងនេះ ត្រូវបាន​ចាប់ឃុំខ្លួន​ពី​បទ​ប្រព្រឹត្ត​អំពើ​ភេរវកម្ម និង​ឥឡូវ​កំពុង​ទាមទារ​ច្រក​ភៀសខ្លួន​ដោយ​សុវត្ថិភាពទៅកាន់ប្រទេសអាហ្វហ្គានីស្ថាន។​

​មន្ត្រី​រដ្ឋាភិបាល​ម្នាក់​នៅ​នៅ​ទីក្រុង​បាន​នូ​(Bannu)ក្បែរកន្លែងកើតហេតុនៅក្បែរព្រំដែនអាហ្វហ្គានីស្ថាន បាន​និយាយថា​ចំណាប់ខ្មាំងកំពុងនៅ​ក្រោម​ការ​ឃុំគ្រង​របស់​ពួក​សកម្មប្រយុទ្ធ​នៅឡើយ​បន្ទាប់ពី​បើក​ប្រតិបត្តិការ​រំដោះ​ពួកគេ​មួយ តែ​បរាជ័យ​។​

លោក​បាន​​អោយដឹងថា​«​ក្នុងអំឡុងពេល​សួរចម្លើយ ជនសង្ស័យ​ខ្លះ​បាន​ដណ្តើម​កាំភ្លើង​ពី​ប៉ូលីស​និង​ក្រោយ​មក​ចាប់​ប៉ូលីស​ក្នុង​ស្ថានីយ​នោះ​ទាំងអស់​ធ្វើ​ជា​ចំណាប់ខ្មាំង​។​ពួក​វា​ចង់អោយ​ប៉ូលីស​ដោះលែងពួកគេ​នៅ​​ព្រំដែន​អា​ហ្វ​ហ្គានី​ស្ថានឬ ខាងក្នុង​ប្រទេស​អា​ហ្វ​ហ្គានី​ស្ថាន​​។​​ចំណាប់ខ្មាំង​រួមមាន​ប៉ូលីស​និង​ទាហាន​ចំនួន​ប្រាំ​បីនាក់​»។​

​ប៉ូលីស​ឈរ​យាម​តាម​ផ្លូវ​មួយ​ដែល​ត្រូវ​បាន​បិទ​ក្រោយ​ពួក​សកម្មប្រយុទ្ធ​ចាប់​ប៉ូលីស​និង​គ្រប់គ្រង​ប៉ុស្តិ៍ប៉ូលីស​នៅបាន​នូ​របស់ ប៉ា​គី​ស្ថាន​

​ក្រុម TTP​បាន​អះអាង​ទទួលខុសត្រូវ​ច​ពោះ​ហេតុការណ៍​នេះ​និង​ទាមទារ​អោយ​អាជ្ញាធរ​ផ្តល់​ច្រក​សុវត្ថិភាព​ទៅកាន់​តំបន់​ព្រំដែន​សំរាប់​សមាជិក​របស់​គេ​។សូមបញ្ជាក់ថា​ក្រុម​នេះ​បាន​លេច​វត្តមាន​ឡើង​នៅ​ឆ្នាំ​២០០៧​និង​​បាន​អនុវត្ត​អំពើ​ហិង្សា​ជា​បន្តបន្ទាប់​នៅក្នុង​ប្រទេស​ប៉ា​គី​ស្ថាន​និង​អា​ហ្វ​ហ្គានី​ស្ថាន​៕