ប្រែ​សម្រួល : កញ្ញា​ដា​លី​ស (​ស៊ីនហួ​) ៖​ចិន​បាន​បង្វែរ​ការផ្តោត​សំខាន់​នៃ​យុទ្ធសាស្ត្រ​ឆ្លើយតប​កូវី​ដ​១៩​របស់​ខ្លួន​ពី​ការគ្រប់គ្រង​ការឆ្លង​ទៅ​ជា​ការព្យាបាល​ករណី​ឆ្លង​ជាមួយ​គោលបំណង​ទប់ស្កាត់​ករណី​​ធ្ងន់ធ្ងរ​។​ការផ្លាស់ប្តូរ​នេះ​ត្រូវបាន​ធ្វើឡើង​ស្រប​តាម​ការ​ចុះខ្សោយ​នៃ​ភ្នាក់ងារ​បង្ក​មេរោគ​កូរ៉ូណា​។ វា​មិន​ជំទាស់​ទៅ​នឹង​ការពិត​ដ៏​លំបាក​ដែល​ថា​ចិន​គឺ​ជា​អ្នកសម្រេច​សមិទ្ធផល​ដ៏​ល្អ​បំផុត​មួយ​របស់​ពិភព​​លោក​ទាក់ទង​នឹង​ការសង្គ្រោះ​ជីវិត​ពី​ជំងឺ​រាតត្បាត​កូ​វីដ​នោះ​ទេ​។​

​ក្នុង​រយៈពេល​បី​ឆ្នាំ​កន្លងមកនេះ ចិន​បាន​ទប់ទល់​នឹង​រលក​នៃ​ជំងឺ​រាតត្បាត​និង​បាន​ដោះស្រាយ​ដោយ​ជោគជ័យ​ជាមួយ​នឹង​ការផ្ទុះ​មេរោគ​ជាង ១០០ ចង្កោម​។ នៅក្នុង​ប្រទេស​មួយ​ដែល​មាន​ប្រជាជន​ជាង ១,៤ ពាន់​លាន​នាក់ ចំនួន​អ្នក​ស្លាប់​ដោយសារកូ​វីដ​១៩ គឺមាន​តែ​ប្រហែល ៥.០០០ នាក់​ប៉ុណ្ណោះ នេះ​បើ​យោង​តាម​អាជ្ញាធរ​សុខាភិបាល​។​

​នៅ​ទូទាំង​ពិភពលោក ជំងឺ​រាតត្បាត​បាន​បណ្តាលឱ្យ​មនុស្ស ៦,៦ លាន​នាក់​ស្លាប់​។ នៅ​ឆ្នាំ ២០២១ មនុស្ស​រាប់លាន​នាក់​បាន​បាត់បង់​ជីវិត​ដោយសារ​រដ្ឋាភិបាល​នៃ​ប្រទេស​ជាច្រើន​រារែក​ចិត្ត​រវាង​ការបិទ​ខ្ទប់​​និង​ការបើក​ប្រទេស​ឡើងវិញ​។​

​រឿង​មួយ​បានក្លាយ​ទៅ​រឿង​ច្បាស់​ដូច​ថ្ងៃ​នៅពេលនេះ គឺ ចិន​បាន​គោរព​នូវ​អ្វី​ដែល​ខ្លួន​តែងតែ​និយាយ​ថា​នឹង​ធ្វើ ដោយ​ដាក់​ប្រជាជន​និង​ជីវិត​របស់​ពួកគេ​លើស​ពី​អ្វីៗ​ទាំងអស់​។​

​ត្រឡប់​ទៅ​ដើមឆ្នាំ ២០២០ ដោយ​ប្រឈម​មុខ​នឹង​ការ​ផ្ទុះឡើង​មេរោគ​កូរ៉ូណា​ភ្លាមៗ ចិន​បាន​ប្រមូល​ធនធាន​នៅ​ទូទាំង​ប្រទេស​ដោយ​ចាប់ផ្តើម​ប្រតិបត្តិការ​មិន​ធ្លាប់​មាន​ពីមុន​មក​ដើម្បី​សង្គ្រោះ​ជីវិត​​នៅ​ទីក្រុង​អ៊ូ​ហាន ដែល​រងគ្រោះ​ខ្លាំង​បំផុត​ក្នុង​ខេត្ត​ហ៊ូ​ប៉ី​។​

​រាប់​ចាប់ពី​ទារក​ទើបនឹង​កើត​រហូត​ដល់​មនុស្ស​ចាស់​អាយុ ១០០ គឺ​គ្មាន​អ្នកជំងឺ​កូវី​ដ​១៩​ណា​ម្នាក់​ត្រូវ​បាន​បោះបង់ចោល​នោះឡើយ​។ អ្នកជំងឺ​ជាង ៣.៦០០ នាក់ ដែល​មាន​អាយុ​លើសពី ៨០ ឆ្នាំ​ត្រូវបាន​​ព្យាបាល​ជា​សះស្បើយ​។​

​ជោគជ័យ​ដំបូង​ក្នុងការ​ទប់ទល់​នឹង​វីរុស​នេះ​បាន​ជួយ​ឱ្យ​ចិន​ទទួលបាន​គំនិត​ផ្តួចផ្តើម​ក្នុងដំណាក់កាល​បន្តបន្ទាប់​នៃ​ការបង្ការ​និង​គ្រប់គ្រង​កូ​វីដជា​ប្រចាំ​ដែល​ក្នុងនោះ​ប្រទេស​បាន​ប្រណាំងប្រជែង​​នឹង​ពេល​វេលា​ដើម្បី​ចាក់​វ៉ាក់សាំង​ដល់​ប្រជាជន​របស់​ខ្លួន​និង​បង្កើត​ឧបករណ៍​ធ្វើតេស្តិ៍​រហ័ស​និង​ថ្នាំ​ព្យាបាល​។​

​ក្នុង​រយៈពេល​បី​ឆ្នាំ​កន្លងមកនេះ ចិន​បាន​បង្កើត​ជំនាញ​ការធ្វើ​រោគវិនិច្ឆ័យ​និង​ការព្យាបាល​និង​ថ្នាំ​កូវី​ដ​ប្រកបដោយ​ប្រសិទ្ធភាព ហើយ​បាន​បន្ត​ធ្វើ​ឱ្យ​ប្រសើរឡើង​នូវ​សមត្ថភាព​របស់​ខ្លួន​ទាក់ទង​នឹង​ការព្យាបាល​វេជ្ជសាស្ត្រ ការ​ស្វែង​ឃើញ​មេរោគ និង​ការស៊ើបអង្កេត​ជំងឺ​រាតត្បាត​។​

​រហូតមកទល់​ពេលនេះ ជាង ៩០ ភាគរយ​នៃ​ចំនួន​ប្រជាជន​របស់​ខ្លួន​ត្រូវបាន​ចាក់​វ៉ាក់សាំង​។ នេះ​បាន​ជួយ​ចិន​កម្ចាត់​រលក​នៃ​ការ​រាតត្បាត​នៃ​មេរោគ​បំប្លែង​រាប់​ចាប់ពី​អាល់​ហ្វា​រហូត​ដល់​ដែលតា​។​

​ការឆ្លើយតប​កូ​វីដ​ជាប្រចាំ​បាន​សង្កត់ធ្ងន់​ទៅលើ​តួនាទី​នៃ​វិទ្យាសាស្ត្រ​និង​សារៈសំខាន់​នៃ​ភាពជាក់លាក់​។ ចិន​បាន​តាមដាន​យ៉ាង​ដិតដល់​នូវ​ការវិវត្ត​នៃ​ជំងឺ​រាតត្បាត​នៅ​ខាងក្រៅ​ព្រំដែន​របស់​ខ្លួន ដោយ​បាន​វាយតម្លៃ​ប្រសិទ្ធភាព​នៃ​វិធានការ​ឆ្លើយតប​របស់​ខ្លួន និង​ធ្វើ​ការកែតម្រូវ​ជា​បន្តបន្ទាប់​ក្នុង​គោលបំណង​បង្កើន​ប្រសិទ្ធភាព​ការឆ្លើយតប​។​

​ជាមួយ​មេរោគ​កាន់តែ​ខ្សោយ​ទៅៗ និង​ពិចារណា​អំពី​អត្រា​នៃ​ការចាក់​វ៉ាក់សាំង​ក្នុងស្រុក​ដែល​ចេះ​តែ​កើនឡើង និង​ការប្រមូលផ្តុំ​បទពិសោធន៍​ក្នុង​ការប្រយុទ្ធប្រឆាំង​នឹង​កូវី​ដ​១៩ ចិន​ថ្មីៗ​នេះ​បាន​ធ្វើឱ្យ​ប្រសើរឡើង​នូវ​ប្រសិទ្ធភាព​វិធីសាស្ត្រ​ប្រឆាំង​មេរោគ​របស់ខ្លួន គឺ​អនុញ្ញាត​ឱ្យធ្វើ​ចត្តា​ឡីស័​កនៅ​ផ្ទះ​សម្រាប់​ករណី​គ្មាន​រោគសញ្ញា​និង​កម្រិត​ស្រាល និង​កាត់បន្ថយ​ការ​ធ្វើតេស្តិ៍​ទ្រង់ទ្រាយ​ធំ​ក្នុងចំណោម​ប្រជាជន​។​

​ប៉ុន្តែ​រដ្ឋាភិបាល​បាន​សង្កត់ធ្ងន់​លើ​កិច្ចខិតខំ​ប្រឹងប្រែង​បន្ថែមទៀត​លើ​ការត្រួតពិនិត្យ​សុខភាព​និង​សេវា​សម្រាប់​មនុស្ស​ចាស់​។ វា​បាន​ពន្លឿន​កិច្ចខិតខំ​ប្រឹងប្រែង​ដើម្បី​បង្កើត​គ្លីនិក​ជំងឺ​គ្រុនក្តៅ​បន្ថែមទៀត និង​សង្កត់​ធ្ងន់​លើ​ការចាក់ដូស​ជំរុញ​ទី​ពីរដ​ល់​ជន​ងាយ​រងគ្រោះ​។​

​ជំហាន​គោលនយោបាយ​ទាំងនេះ គ្មានអ្វី​ងឿងឆ្ងល់​ទេ គឺ​ផ្អែក​លើ​ការស្រាវជ្រាវ​ស៊ីជម្រៅ និង​កំណត់​គោលដៅ​ជា​ពិសេស​ទៅ​លើ​លក្ខណៈ​នៃ​ការ​បំប្លែង​របស់​មេរោគ​។​

​ប៉ុន្តែ​អ្វី​ដែល​សំខាន់​ជាងនេះទៅទៀត​នោះ គឺ គោល​ន​យោ​យ​បាយ​ទាំងអស់​នោះ​បាន​យកចិត្តទុកដាក់​លើ​ប្រជាជន​ជាមួយ​ក្រសែភ្នែក​ផ្តោតលើ​ការការពារ​សណ្តាប់ធ្នាប់​ការងារ​និង​ជីវភាព​រស់នៅ​​របស់​ប្រជាជន​ឱ្យ​កាន់តែ​ប្រសើរឡើង និង ការពារ​មនុស្ស​ចាស់ កុមារ និង​ក្រុម​មនុស្ស​សំខាន់ៗ​ដទៃទៀត​។​

​ចិន​អាច​រក្សា​ករណី​ធ្ងន់ធ្ងរ​នៃ​ជំងឺ​កូវី​ដ​១៩​និង​អត្រា​ស្លាប់​ក្នុងចំណោម​អត្រា​ទាប​បំផុត​ក្នុង​ពិភពលោក​។ អាយុ​សង្ឃឹម​រស់​ជា​មធ្យម​របស់​ប្រជាជន​ចិន​បាន​បន្ត​កើនឡើង​ក្នុងពេល​កំពុង​មាន​ជំងឺ​រាតត្បាត ដោយ​កើន​ពី ៧៧,៩៣ ឆ្នាំ​ក្នុង​ឆ្នាំ ២០២០ ដល់ ៧៨,២ ឆ្នាំ​ក្នុង​ឆ្នាំ ២០២១​។​

​និយាយ​រួម គេ​ត្រូវ​កត់សម្គាល់ថា ចិន​មិនដែល​ចាត់ទុក​កិច្ចខិតខំ​ប្រឹងប្រែង​ប្រឆាំង​មេរោគ​និង​កំណើន​សេដ្ឋកិច្ច​ជា​ជម្រើស​មួយ​អត់​មួយ​នោះ​ទេ​។ ផ្ទុយទៅវិញ ចិន​សង្កត់ធ្ងន់​លើ​សារៈសំខាន់​នៃ​ការសម្របសម្រួល​ចំណុច​ទាំង​ពីរ​តាមរបៀប​ប្រកបដោយ​ប្រសិទ្ធភាព​ខ្ពស់​។​

​ជា​លទ្ធផល ការអភិវឌ្ឍ​សេដ្ឋកិច្ច​បាន​ជួយ​លើកកម្ពស់​ជីវភាព​រស់​នៅ​របស់​ប្រជាជន​។​

​នៅ​ឆ្នាំ ២០២០ ចិន​គឺ​ជា​សេដ្ឋកិច្ច​ដ៏​សំខាន់​ដំបូង​គេ​នៅ​ទូទាំង​ពិភពលោក​ដែល​បាន​ចុះបញ្ជី​កំណើន​។ អត្រាកំណើន​ប្រចាំឆ្នាំ​ជា​មធ្យម​សម្រាប់​ឆ្នាំ ២០២០ និង​២០២១ បាន​ឈាន​ដល់ ៥,១ ភាគរយ​។ ប្រទេស​នេះ​ក៏​បាន​លុបបំបាត់​ភាពក្រីក្រ​ទាំងស្រុង​បាន​ដោយ​ជោគជ័យ​ផងដែរ ដែល​ជា​ជោគជ័យ​ដ៏​លំបាក​មួយ បើ​ពិចារណា​លើ​ការរំខាន​ដែល​បង្កឡើង​ដោយ​ជំងឺ​រាតត្បាត​។​

​បន្ទាប់​ពី​បី​ឆ្នាំ មេរោគ​កាន់តែ​ខ្សោយ ប៉ុន្តែ​យើង​កាន់តែ​រឹងមាំ​។ ឥឡូវ​នេះ​ប្រទេស​ចិន​មាន​ធនធាន​កាន់តែ​ច្រើន លក្ខខណ្ឌ​កាន់តែ​ល្អប្រសើរ និង​ទំនុកចិត្ត​កាន់តែច្រើន​ក្នុងការ​យកឈ្នះ​លើកូ​វីដ​១៩៕

​បុគ្គលិក​ពេទ្យ​ម្នាក់​ចាក់​វ៉ាក់សាំង​កូវី​ដដល់​អ្នកស្រុក​ម្នាក់​នៅ​សង្កាត់​អៅយុ​ន​ឃុន​ក្នុង​ខណ្ឌ​ចាវ​យ៉ាង ក្រុង​ប៉េកាំង កាលពី​ថ្ងៃទី​១៣ ខែកក្កដា ឆ្នាំ​២០២២