​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រធានាធិបតី វ្ល៉ា​ឌី​មៀ ពូ​ទីន បាន​បដិសេធ​ផែនការ​លេប​ត្របាក់​យក​ប្រទេស​បេឡា​រូស​ខណៈ​រូបលោក​បាន​ទៅ​បំពេញ​ទស្សនកិច្ច​ដ៏​កម្រ​មួយ​កាលពី​ថ្ងៃ​ចន្ទ​ទី​១៩​ធ្នូ​ទៅកាន់​ប្រទេស​ដែល​បុរស​ខ្លាំង​របស់​ពួកគេ​បាន​ជួយ​ដល់​ការ​លុកលុយ​របស់​ពូ​ទីន​ក្នុង​ប្រទេសជិតខាង​អ៊ុ​យក្រែន​។​

​លោកពូ​ទីន​បាន​ហោះ​ទៅ​ទីក្រុង​មីនខ៍ (Minsk)​ជាមួយនឹង​រដ្ឋមន្ត្រី​ការពារជាតិ និង​រដ្ឋមន្ត្រី​ការបរទេស​របស់​គាត់​គឺ​តែ​ប៉ុន្មាន​ម៉ោង​ប៉ុណ្ណោះ​បន្ទាប់​ពី​កងកម្លាំង​រុស្ស៊ី​បាន​បើក​ការវាយប្រហារ​ដោយ​ដ្រូ​ន​​ទាំង​ហ្វូងៗ​ទៅលើ​ហេដ្ឋារចនាសម្ពន្ធ​សំខាន់ៗ​ក្នុង​ទីក្រុង​គៀវ ដែល​បង្ក​ឱ្យ​មាន​ការ​ដាច់​ភ្លើង​យ៉ាង​អាសន្ន​នៅក្នុង​តំបន់​រាប់សិប​។​

​លោកពូ​ទីន​បាន​និយាយថា រុស្ស៊ី​និង​បេឡា​រូស ដែល​រង​ទណ្ឌកម្ម​ថ្មី​ពី​លោកខាងលិច​ចាប់តាំងពី​ប្រធានាធិបតី អា​ឡិច​សាន់​ឌឺ លូ​កា​សិន​កូ (Alexander Lukashenko)​ត្រូវបាន​ប្រកាស​ជា​អ្នក​​ឈ្នះ​អាណត្តិ​ទី​ប្រាំមួយ​ក្នុង​ឆ្នាំ ២០២០ ត្រូវបាន “​រួបរួម​ដោយ​ប្រវត្តិសាស្ត្រ​រួម​និង​តម្លៃ​ខាង​ស្មារតី​”​។​

​លោកពូ​ទីន​បាន​ហៅ​ប្រទេស​ទាំងពីរ​ថា​ជា “​សម្ពន្ធមិត្ត​និង​ដៃគូ​យុទ្ធសាស្ត្រ​ជិតស្និទ្ធ​បំផុត​” ប៉ុន្តែ​និយាយថា ពាក្យ​ចចាមអារ៉ាម​ដែល​ថា​រុស្ស៊ី​ចង់​កាន់កាប់​បេឡា​រូស​គឺ​ចេញ​មកពី​មាត់ “​មនុស្ស​អគតិ​”​។​

​លោកពូ​ទីន​បាន​និយាយថា “​រុស្ស៊ី​មិនមាន​ចំណាប់អារម្មណ៍​ក្នុងការ​លេប​ត្របាក់​ប្រទេស​ណាមួយ​ទេ នោះ​មិន​សម​ហេតុផល​ឡើយ​”​។​

​នៅ​ទីក្រុង​វ៉ាស៊ីនតោន អ្នកនាំពាក្យ​ក្រសួងការបរទេស​លោក ណេ​ត ប្រា​យ (Ned Price)​បាន​ចម្អក​ដាក់​ការលើកឡើង​របស់​លោក​ពូ​ទីន​។​

​លោក​ប្រាយ​បាន​និយាយថា “​ខ្ញុំ​គិតថា​សេចក្តីថ្លែងការណ៍​បែបនេះ​ត្រូវតែ​ចាត់​ទុក​ថា​ជា​ចំណុច​កម្ពស់​បំផុត​នៃ​រឿង​ហួសចិត្ត​ពី​មេដឹកនាំ​ម្នាក់​ដែល​ឥឡូវនេះ​កំពុង​ព្យាយាម​លេប​ត្របាក់​អ្នកជិតខាង​​ដ៏​សន្តិភាព​មួយ​ផ្សេង​ទៀត​របស់​គាត់​”​។​

​លោក​ប្រាយ​បាន​និយាយថា “​យើង​បាន​ឃើញ​របប​លូ​កា​សិនកូ​ប្រគល់​អធិបតេ​យ្យ​ភាព​របស់ខ្លួន ប្រគល់​ឯករាជ្យ​របស់​ខ្លួន​ឱ្យទៅ​រុស្ស៊ី​”​។​

​សូមបញ្ជាក់​ថា បេឡា​រូស​បានអនុញ្ញាត​ឱ្យ​កងកម្លាំង​រុស្ស៊ី​ប្រើប្រាស់​ទឹកដី​របស់​ខ្លួន និង​ប៉ុន្មាន​ម៉ោង​មុន​ពេល​លោកពូ​ទីន​ចុះ​ដល់​ទីក្រុង​មីនខ៍ រដ្ឋាភិបាល​ក្រុង​មូ​ស្គូ​បានបញ្ចេញ​វីដេអូ​នៃស​ម​យុទ្ធ​ជាមួយ​​កងកម្លាំង​បេឡា​រូ​ស រួម​ទាំង​សមយុទ្ធ​រថក្រោះ និង​ការ​បាញ់កាំភ្លើង​ស៊ី​ប​នៅ​ទីលាន​ហ្វឹកហាត់​ពោរពេញ​ដោយ​ព្រិល​ទឹកកក​។​

​លោក​លូ​កា​សិនកូ​បាន​ជំរុញ​កិច្ចសហប្រតិបត្តិកា​រយោ​ធា​ឱ្យ​កាន់តែ​ជិតស្និទ្ធ ហើយ​បាន​និយាយថា រុស្ស៊ី​និង​បេឡា​រូស “​បើកចំហ​សម្រាប់​ការសន្ទនា​ជាមួយ​រដ្ឋ​ផ្សេងទៀត រួម​ទាំង​ប្រទេស​អឺរ៉ុប​ផង​ដែរ​”​។​

​លោក​លូ​កា​សិនកូ​បាន​និយាយថា “​ខ្ញុំ​សង្ឃឹមថា​ឆាប់ៗ​នេះ​ពួកគេ​នឹង​ស្តាប់​សំឡេង​នៃ​ហេតុផល​”​។​

​ការរំពឹង​ទុក​បាន​កើត​ឡើង​មុន​ដំណើរ​ទស្សនកិច្ច​របស់​មេដឹកនាំ​រុស្ស៊ី​ថា លោក​នឹង​ដាក់​សម្ពាធ​លើ​លោក​លូ​កា​សិនកូ​ឱ្យ​បញ្ជូន​កងទ័ព​ទៅកាន់​អ៊ុ​យក្រែន ដើម្បី​ប្រយុទ្ធ​ជាមួយ​រុស្ស៊ី​បន្ទាប់​ពី​រដ្ឋាភិបាល​ក្រុង​​មូ​ស្គូ​បាន​រង​បរាជ័យ​ជា​បន្តបន្ទាប់​ក្នុង​រយៈពេល​ជិត ១០ ខែ​នៃ​ការប្រយុទ្ធ​គ្នា​។​

​យ៉ាងណាក៏ដោយ អ្នកនាំពាក្យ​វិមាន​ក្រឹម​ឡាំង លោក ឌី​មី​ទ្រី ប៉េ​ស្កូវ បាន​ច្រានចោល​របាយការណ៍​នេះ​ថា “​ជាការ​ប្រឌិត​រឿង​ឆោតល្ងង់ និង​គ្មាន​មូលដ្ឋាន​ច្បាស់លាស់​”​។​

​ក្នុង​ខែតុលា បេឡា​រូស​បាន​ប្រកាស​បង្កើត​ក​ង​កម្លាំង​ក្នុង​តំបន់​រួមជាមួយ​នឹង​រដ្ឋាភិបាល​ក្រុង​មូ​ស្គូ ដោយ​ទាហាន​រុស្ស៊ី​រាប់ពាន់​នាក់​បាន​មកដល់​អតីត​ប្រទេស​សូ​វៀត​មួយ​នេះ​៕

ពូ​ទីន​និង​លូ​កា​សិនកូ​មក​ដល់​វិមាន​រដ្ឋាភិបាល​ក្នុង​ទីក្រុង​មីនខ៍​កាលពី​ថ្ងៃ​ចន្ទ