​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ចិត្តវិទូ​ពិការ​ភ្នែក​ម្នាក់ ដែល​ទាយ​យ៉ាង​ត្រឹមត្រូវ​នូវ​ការវាយប្រហារ ៩/១១​ហើយ​បាន​អះអាង​ថា​ទីក្រុង​នានា​នឹង​ប្រឈម​មុខ​នឹង​ការខ្វះខាត​ទឹក​ពី​គ្រោះរាំងស្ងួត​​នៅ​ឆ្នាំ ២០២២ បាន​អះអាង​គួរ​អោយ​ព្រឺ​សម្បុរ​ជា​ថ្មី​ថា ពិភពលោក​យើង​អាច​នឹង​ជួប​ការសាកល្បង​អាវុធ​ជីវសាស្ត្រ​នៅ​ឆ្នាំក្រោយ​។​

​ត្រូវ​គេ​ល្បី​ហៅ​ថា​គ្រូទាយ Nostradamus នៃ​តំបន់​បាល់​កង់ លោកយាយ បា​បា វ៉ាន់ហ្គា (Baba Vanga) ដែល​ស្លាប់​កាលពី ២៥ ឆ្នាំ​មុន​ក្នុង​ឆ្នាំ ១៩៩៦ ក្នុង​អាយុ ៨៤ ឆ្នាំ​បាន​ធ្វើ​ការព្យាករណ៍​​ដ៏​គួរឱ្យ​ភ័យខ្លាច​ចំនួន ៥ សម្រាប់​ឆ្នាំ ២០២៣ មុនពេល​លោកយាយ​លាចាក​លោក​។​

​ស្ត្រី​អាថ៌កំបាំង​ប៊ុលហ្គារី​រូបនេះ ដែល​បាន​បន្សល់​ទុក​រាល់​ការ​ទស្សន៍ទាយ​ប្រចាំ​ឆ្នាំ​រហូត​ដល់​ឆ្នាំ ៥០៧៩ បាន​ស្រមៃ​ឃើញ​ព្យុះ​ព្រះអាទិត្យ​ដ៏​មហន្តរាយ ការសាកល្បង​អាវុធ​ជីវសាស្ត្រ​លើ​មនុស្ស គន្លង​របស់​ផែន​​ដី​នឹង​ត្រូវ​ប្រែប្រួល ការផ្ទុះ​អាវុធ​នុយក្លេអ៊ែ​រ និង ការបញ្ចប់​កំណើត​ធម្មជាតិ​នៅ​ត្រឹម​ឆ្នាំ ២០២៣​។​

​លោកយាយ​វ៉ាន់ហ្គា​បាន​ព្យាករណ៍​ថា “​ប្រទេស​ធំ​មួយ​” នឹង​ធ្វើ​ការសិក្សា​អំពី​អាវុធ​ជីវសាស្ត្រ​លើ​មនុស្ស ដែល​នឹង​បណ្តាល​ឱ្យ​មនុស្ស​រាប់ពាន់​នាក់​ស្លាប់​។​

​ទោះយ៉ាងណា អនុសញ្ញា​អាវុធ​ជីវសាស្ត្រ​របស់​អង្គការសហប្រជាជាតិ​បាន​ហាម​មិន​ឱ្យ​អនុវត្ត​ប្រភេទ​នៃ​ការពិសោធន៍​បែបនេះ​ទេ​។​

​លោកយាយ​បា​បា ដែល​បាន​ទស្សន៍ទាយ​យ៉ាង​ត្រឹមត្រូវ​អំពី​គ្រោះមហន្តរាយ​នុយគ្លេអ៊ែរ​នៅ​ឆែរ​ណូ​ប៊ី​ល (Chernobyl)​ក៏​បាន​ព្រមាន​អំពី​ការផ្ទុះ​រោងចក្រ​ថាមពលនុយក្លេអ៊ែរ​ដ៏​មាន​សក្តានុពល​នៅ​ឆ្នាំ ២០២៣ ផងដែរ​។​

​ការ​ទស្សន៍ទាយ​ដ៏​គួរ​ឱ្យ​ភ័យខ្លាច​បែបនេះ​កើត​ឡើង​នៅ​ពេល​ដែល​មេដឹកនាំ​ពិភពលោក​ព្រួយបារម្ភ​អំពី​គ្រោះមហន្តរាយ​នុយក្លេអ៊ែរ​នៅក្នុង​ប្រទេស​អ៊ុ​យក្រែន​។​

​ទើប​តែ​កាលពី​ខែ​មុន ការផ្ទុះ​ដ៏​ខ្លាំងក្លា​មួយ​បាន​អង្រួន​តំបន់​ជុំវិញ​រោងចក្រ​ថាមពលនុយក្លេអ៊ែ​រហ្សា​ផូ​រី​ហ្ស​ហ្សា (Zaporizhzhia) របស់​អ៊ុយ​ក្រែន​ដោយ​ប្រធាន​ថាមពលបរមាណូ​របស់​អ​.​ស​.​ប​​បាន​ហៅ​សង្គ្រាម​រុស្ស៊ី​លើ​អ៊ុយ​ក្រែនថា “​គួរឱ្យ​ព្រួយបារម្ភ​បំផុត​”​។​

​លោកយាយ​បា​បា​ក៏បាន​ទស្សន៍ទាយ​ដែរ​ថា នៅ​ឆ្នាំក្រោយ ផែនដី​នឹង​ជួបប្រទះ​នឹង​ការផ្លាស់ប្តូរ​គន្លង​របស់​វា ទោះ​យ៉ាងណា​ព័ត៌មាន​លម្អិត​មិន​ត្រូវបាន​ផ្តល់​ឱ្យ​ទេ​៕

ការ​ទស្សន៍ទាយ​ប្រចាំឆ្នាំ​២០២៣​របស់​លោកយាយ​បា​បា​មើលឃើញ​ពិភពលោក​ប្រឈម​នឹង​ការផ្ទុះ​អាវុធ​នុយក្លេអ៊ែរ​និង​អាវុធ​ជីវសាស្ត្រ