ប្រែ​សម្រួលៈ​បំណង​(​ដេល្លី​ម៉េល​)៖ កូរ៉េ​ខាងជើង​កាលពី​ថ្ងៃ​អង្គារ​ទី​២០​ធ្នូ បាន​ថ្កោលទោស​ការបង្កើន​កម្លាំង​យោធា​ជប៉ុន​ក្នុង​យុទ្ធសាស្ត្រ​សន្តិសុខ​ថ្មី​មួយ ដោយ​ហៅ​ថា​ថា​គ្រោះថ្នាក់​ហើយ​បាន​ប្តេជ្ញា​ត​តប ។​របប​​ដឹកនាំ​របស់​គីម ជុង​អ៊ុន នេះ​ក៏​បាន​ព្រមាន​អំពី​ការសាកល្បង​កាំជ្រួច​ផ្លោង​ឆ្លង​ទ្វីប​មួយទៀត​ក្នុងពេល​ឆាប់ៗ​។​

​ជប៉ុន​កាលពី​សប្តាហ៍​មុន​បាន​ប្រកាស​ការបង្កើន​ចំណាយ​យោធា​ធំ​បំផុត​របស់​ខ្លួន​ចាប់តាំងពី​សង្គ្រាមលោកលើកទី​ពីរ នៅពេល​មាន​ភាព​តានតឹង​ទាំង​ជាមួយ​ចិន​និង​កូរ៉េខាងជើង គួបផ្សំ​នឹង​សង្គ្រាម​​ឈ្លានពាន​របស់​រុស្ស៊ី​នៅ​អ៊ុ​យក្រែន ។​

​ក្រសួងការបរទេស​កូរ៉េខាងជើង បាន​និយាយ​ថា​ជប៉ុន​បាន​ធ្វើអោយ​លេចចេញទំរង់​«​សមត្ថភាព​វាយប្រហារ​បង្ការ​ទុកជាមុន​»​ជាមួយនឹង​យុទ្ធសាស្ត្រ​ថ្មី​របស់​ខ្លួន ដែល​នឹង​នាំ​ដល់​ការផ្លាស់ប្តូរ​យ៉ាង​គំហ៊ុក​មួយ​​ចំពោះ​បរិយាកាស​សន្តិសុខ​នៅ​អាស៊ី​បូ​ព៌ា​។​ក្រសួង​ក៏​រិះគន់​អាម៉េរិក​ចំពោះ​«​ការអន្ទង​ទាក់ទាញ​និង​ពន្យុះ​អោយ​ជប៉ុន​បំពាក់អាវុធ​ ហើយ​បង្កើត​គំរោង​ផែនការ​ឈ្លានពាន​ឡើងវិញ​» ។​

​វា​បាន​បន្ថែម​ដា កូរ៉េ​ខាងជើង​នឹង​សម្តែង​ការ​មិន​សប្បាយចិត្ត​របស់​ខ្លួន​ជាមួយនឹង​សកម្មភាព​ដើម្បី​រំលេច​អំពី​ការសំរេចចិត្ត​«​ខុសឆ្គង​និង​គ្រោះថ្នាក់​ណាស់​»​របស់​ជប៉ុន​។​

​សូមបញ្ជាក់​ថា នៅ​ឆ្នាំ​នេះ​កូរ៉េ​ខាងជើង​បាន​ធ្វើការ​សាកល្បង​កាំជ្រួច​រាប់សិប​ដើម រួម​មាន​កាំជ្រួច​ផ្លោង​ឆ្លង​ទ្វីប (ICBM)​ដែល​អាច​ហោះ​ដល់​ដីគោក​អាម៉េរិក ដោយ​ផ្គើន​នឹង​ទណ្ឌកម្ម​របស់​អន្តរជាតិ​។​

​ក្នុង​សេចក្តីថ្លែងការណ៍​ដាច់ដោយឡែក​មួយ ប្តូនស្រីដ៏​មាន​ឥទ្ធិពល​របស់​គីម ជុង​អ៊ុន បាន​ព្រលយ​អំពី​ភាពជឿនលឿន​ខាង​វិទ្យាសាស្ត្រ​នៅក្នុង​ប្រព័ន្ធ​ICBM​របស់​កូរ៉េ​ខាងជើងនិងបានព្រមាន«ចាត់វិធានការយោធាដាច់ខាតនិងមោះមុតដើម្បីការពារអធិបតេយ្យភាពនិងផលប្រយោជន៍ជាតិរបស់យើង»ដោយសារតែភាពស្មុគស្មាញសន្តិសុខបង្កឡើងដោយយុទ្ធសាស្រ្តសន្តិសុខរបស់ជប៉ុន។

កូរ៉េ​ខាងជើង​បាន​បាញ់​​កាំជ្រួច​ផ្លោង​ចម្ងាយ​មធ្យម​ពីរ​ដើម​កាលពី​ថ្ងៃអាទិត្យ ដោយ​ហៅ​វា​ថា​ជា​ការសាកល្បង​សំរាប់​ការអភិវឌ្ឍ​ផ្កាយរណប​ស៊ើបការណ៍​មួយ​។​

​នៅ​ពេល​តែ​ប៉ុន្មាន​ម៉ោង​បន្ទាប់​ពី​កូរ៉េខាងជើង​ចេញ​សេចក្តីថ្លែងការណ៍ កងទ័ពអាកាស​អាម៉េរិក​បាន​បញ្ជូន​យន្តហោះ​ទម្លាក់​គ្រាប់បែក​យុទ្ធសាស្ត្រ​B-52​និង​យន្តហោះ​ទម្លាក់​គ្រាប់​អាច​បំបាំង​កាយ​​ពី​រ៉ា​ដា​ធុន​F-22​មកកាន់​កូរ៉េខាងត្បូង ដើម្បី​ចូលរួម​សមយុទ្ធ​ជាមួយ​យន្តហោះ​F-35 និង F-15K​របស់​កូរ៉េ​ខាងត្បូង ។​វា​ជា​ការ​សម្ញែង​កម្លាំង​ចុង​ក្រោយ​ទល់នឹង​កូរ៉េខាងជើង​។​

​ការចូលរួម​របស់​យន្តហោះ​ទម្លាក់គ្រាប់​ចម្ងាយ​ឆ្ងាយ​ជំនាន់​ទី​ប្រាំ​F-22 Raptor​ដែល​បច្ចុប្បន្ន​តាំងនៅ​ជប៉ុន ជា​ការបង្ហាញ​ខ្លួន​លើ​ឧបទ្វីប​កូរ៉េ​លើកដំបូង​ចាប់តាំងពី​ខែ​ឧសភា ឆ្នាំ​២០២៨ នៅពេល​​សម្ពន្ធមិត្ត​ធ្វើ​សមយុទ្ធ​រួមគ្នា​នៅ​កូរ៉េ​ខាងត្បូង​៕