ដោយ​:​បូកគោ​/​កំ​ពតៈ មន្ត្រី​ជំនាញ​បាន​បញ្ជាក់ថា​បន្ទាប់ពី​វិបត្តិ​កូ​វីដ​-១៩​បាន​ធូរស្បើយ​នោះ បានធ្វើ​ឲ្យ​ភ្ញៀវ​ជិត​ឆ្ងាយ​សម្រុក​ចូលមក​លម្ហែ​កម្សាន្ត​ក្នុង​ខេត្តកំពត​ជា​ហូរហែ​។ ភ្ញៀវ​ភាគច្រើន​បាន​ចាប់អារម្មណ៍​ទៅ​កម្សាន្ត​នៅ​បណ្តា​រមណីយដ្ឋាន​តាម​ដង​ព្រែក​កំចាយ​ដែលជា​បណ្តុំ​ទេសចរណ៍​តំបន់​ទឹកឈូ​ព្រោះតែ​កំណើន​នៃ​សេវា​កម្សាន្ត និង​ភាព​រាក់ទាក់​របស់​ប្រតិបត្តិ​ករ​។​

​លោក​សយ ស៊ី​ណុល ប្រធាន​មន្ទីរ​ទេសចរណ៍​ខេត្តកំពត​បានបញ្ជាក់​ថា​ក្រោម​កិច្ចខិតខំ​របស់​ថ្នាក់ដឹកនាំ​ខេត្ត ក៏ដូចជា​មន្ទីរ អង្គភាព​ពាក់ព័ន្ធ​បានធ្វើ​ឲ្យ​វិស័យ​ទេសចរណ៍​កាន់តែ​ល្អប្រសើរ​។ គោលដៅ​ទេសចរណ៍​ក្នុង​ខេត្ត​បាន​កើនឡើង​រហូតដល់​ជិត​៤០​កន្លែង​ដោយមាន​រមណីយដ្ឋាន​២៣​កន្លែង សហគមន៍​ទេសចរណ៍​បួន​កន្លែង គោលដៅ​ទាក់ទាញ​ទេសចរ​បួន​កន្លែង ទីតាំង​បោះតង់​ប្រាំ​កន្លែង និង​មណ្ឌល​កម្សាន្ត​ជាច្រើន​ទៀត​កំពុង​រៀបចំ​ជា​បន្តបន្ទាប់​។
​លោក​ប្រធាន​មន្ទីរ​បាន​បន្តថា​ក្នុង​ខេត្ត​មាន​ប៉ូល​ទេសចរណ៍​សំខាន់ៗ​ចំនួន​បី រួមមាន បណ្តុំ​ទេសចរណ៍​តំបន់​ទឹកឈូ ឧទ្យាន​ជាតិ​ព្រះមុនីវង្ស​បូកគោ និង​តំបន់​ទំនប់​ម្លិ​ច​។ បច្ចុប្បន្ន ភ្ញៀវ​ជិត​ឆ្ងាយ​មានការ​និយម​ចូលចិត្ត និង​ចាប់អារម្មណ៍​ទៅ​កម្សាន្ត​នៅ​រមណីយដ្ឋាន​ដងព្រែក​កំចាយ​ដែលជា​ផ្នែក​មួយ​នៃ​បណ្តុំ​ទេសចរណ៍​តំបន់​ទឹកឈូ​។ នៅ​ទីនោះ ប្រតិបត្តិ​ករ​ទេសចរណ៍​អនុវត្ត​បានល្អ​រាល់​គោលការណ៍​ណែនាំ​របស់​មន្ត្រី​ជំនាញ​ទាំង​ផ្នែកអនាម័យ​បរិស្ថាន គុណភាព​អាហារ ក៏ដូចជា​បដិសណ្ឋារកិច្ច ពិសេស​បាន​ប្រកាន់យក​ស្នាមញញឹម​ដែលជា​ទំនៀមទម្លាប់​ប្រពៃណីជាតិ​។​

​លោ​កន​រាជ ទេសចរ​មកពី​រាជធានី​ភ្នំពេញ​បាន​រៀបរាប់ថា​លោក​បាន​ខេត្តកំពត​ជា​ញឹកញយ តែ​សម្រាប់​រមណីយដ្ឋាន​តាម​ដងព្រែក​កំចាយ​នេះ​ជា​លើកដំបូង​។ ទីនេះ ទេស​ភាពល្អ​ត្រកាល ខ្យល់អាកាស​បរិសុទ្ធ អាច​គយគន់​ជួរ​ភ្នំ ដងព្រែក និង​តម្លៃ​សេវាកម្ម​គ្រប់យ៉ាង​សមរម្យ​អាច​ទទួលយកបាន​។ ចំណែក​អ្នកលក់ដូរ​មាន​ភាព​រាក់ទាក់​ដែល​ធ្វើឱ្យ​លោក​មានចិត្ត​ចង់​មក​កម្សាន្ត​បន្តបន្ទាប់​ទៀត​។​

​ប្រធាន​មន្ទីរ​ទេសចរណ៍ លោក​សយ ស៊ី​ណុល​បានបញ្ជាក់​ឱ្យដឹង​ផងដែរ​ថា រយៈពេល​១១​ខែ​នៃ​ឆ្នាំ​២០២២​នេះ ទេសចរ​បានមក​កម្សាន្ត និង​ស្នាក់អាស្រ័យ​ក្នុង​ខេត្តកំពត​មាន​ប្រមាណ​ជាង​១​លាន​៧​សែន​នាក់​។ បរិមាណ​នោះបាន​កើនឡើង​ជាង​១០០​ភាគរយ​បើ​ប្រៀបធៀប​ឆ្នាំ​២០២១ និង​កើនឡើង​ជាង​៥​ភាគរយ​បើ​ប្រៀបធៀប​ទៅនឹង​ឆ្នាំ​២០១៩​មុន​ដំណាក់កាល​នៃ​ការរីក​រាលដាល​ជំងឺ​កូ​វីដ​-១៩​។ ជាមួយនេះ​សេវាកម្ម​ទេសចរណ៍​ផ្សេងៗ​ក៏មាន​ការកើនឡើង​ផងដែរ​។ ជាក់ស្តែង​សេវា​ស្នាក់នៅ​រហូតដល់​មាន​ជាង​៤.៦០០​បន្ទប់​។ បើ​បូក​រួមទាំង​សេវា​បោះតង់​នោះ ខេត្តកំពត​មិនមាន​បញ្ហា​ខ្វះ​កន្លែង​ស្នាក់​នៅទេ​៕​/R