ប្រែ​សម្រួល : កញ្ញា​ដា​លី​ស (The Drive) ៖ ការិយាល័យ​ថ្មី​របស់​មន្ទីរ​បញ្ច​កោ​ណ​ដែល​ទទួលបន្ទុក​តាមដាន​របាយការណ៍​យាន​UFO​បានឱ្យ​ដឹង​ក្នុង​សន្និសីទ​សារព័ត៌មាន​កាល​ពី​រសៀល​ថ្ងៃ​សុក្រ​​សប្តាហ៍​មុន​ថា​មិន​ទាន់​មាន​ភស្តុតាង​បង្ហាញថា មនុស្ស​ភព​ក្រៅ​កំពុង​មក​មើល​ឬ​បាន​ដល់​ផែនដី​នៅឡើយ​ទេ​។

​ក្រុមមន្ត្រី​បាន​ប្រាប់​អ្នកយក​ព័ត៌មាន​រួម​ទាំង​វេបសាយ The War Zone​ថា ប៉ុន្តែ​ក្នុងករណី​ថ្មីៗ​រាប់រយ​នៃ​បាតុភូត​ពីលើ​អាកាស​មិន​ស្គាល់​អត្តសញ្ញាណ (UAP)​ដែល​ការិយាល័យ​ដោះស្រាយ​ភាព​​មិន​ប្រក្រតី​នៃ​ដែន​ទាំងពួង (AARO)​កំពុង​ស៊ើបអង្កេត គឺ​មាន​ការបង្ហាញ​ពី​ការគំរាមកំហែង​ដែល​អាច​កើតមាន​ចំពោះ​ទីតាំង​យោធា​របស់​សហរដ្ឋ​អាម៉េរិក​និង​ការសង្កេត​លើ​វត្ថុ​មាន​សក្ដានុពល​ជា​​មួយ​ការហោះហើរ​យ៉ាង​លឿន ដែល​ត្រូវការ​ការស្រាវជ្រាវ​បន្ថែម​។​

​ការិយាល័យ AARO ត្រូវបាន​បង្កើតឡើង​ក្នុង​ខែ​កក្កដា​ដើម្បី​ដោះស្រាយ​ការស៊ើបអង្កេត​របស់​រដ្ឋាភិបាល​លើ​វត្ថុ​មិន​ស្គាល់អ​ត្ត​ស​ញ្ញាណ​នៅលើ​និង​ក្រោម​សមុទ្រ នៅលើ​អាកាស​ក៏​ដូចជា​ក្នុង​លំហ និង​វត្ថុ “​ឆ្លងកាត់​” រវាង​ដែន​ទាំងនោះ​។

​ការិយាល័យ​នេះ​ត្រូវបាន​ដាក់​ឱ្យ​ដំណើរការ​ចំពេល​មាន​ការព្រួយបារម្ភ​កាន់តែ​ខ្លាំង​ឡើង​អំពី​ការគំរាមកំហែង​ដល់​ទីតាំង​យោធា​របស់​អាម៉េរិក​និង​ទ្រព្យសម្បត្តិ​កងទ័ពជើងទឹក​និង​អាកាស​ពី​វត្ថុ​ដែល​មិន​​ស្គាល់​ប្រភពដើម និង​ជា​ការប្តូរឈ្មោះ​នៃ​កិច្ចខិតខំ​ប្រឹងប្រែង​ស៊ើបអង្កេត​របស់​មន្ទី​រប​ញ្ច​កោណ UAP​ពីមុន ដែល​ហៅថា ក្រុម​គ្រប់គ្រង​និង​កំណត់​អត្តសញ្ញាណ​វត្ថុ​តាម​អាកាស (AOIMSG)​ដើម្បី​ពង្រីក​​វិសាលភាព​ប្រតិបត្តិការ​របស់​ខ្លួន​។​

​សន្និសីទ​សារព័ត៌មាន​ដោយ​អនុរដ្ឋមន្ត្រី​ក្រសួងការពារជាតិ​លោក រ៉ូ​ណាល់ ម៉ូ​ល​ទ្រី (Ronald Moultrie)​និង​នាយក​ការិយាល័យ AARO លោក​បណ្ឌិត ស៊ីន កឺ​ក​ផា​ទ្រី​ក (Sean Kirkpatrick) បាន​ធ្វើ​ឡើង​មួយ​ថ្ងៃ​បន្ទាប់​ពី​ព្រឹទ្ធសភា​បាន​អនុម័ត​ច្បាប់​ស្តីពី​ការផ្តល់​អំណាច​ដល់​វិស័យ​ការពារ​ជាតិ​ក្នុង​ឆ្នាំសារពើពន្ធ ២០២៣ (NDAA) ដែល​រួម​បញ្ចូល​ភាសា​កូដ​អំពី​របៀប​ដែល​ការិយាល័យ AARO នឹង​ស៊ើបអង្កេត​វត្ថុ​ទាំងនេះ​និង​ការពារ​វិស័យ​ការពារជាតិ បុគ្គលិក​ក្រសួង និង​អ្នកម៉ៅការ ដែល​រាយការណ៍​ព័ត៌មាន​លម្អិត​អំពី​វត្ថុ​ទាំងនោះ​។ គេ​រំពឹងថា​ច្បាប់ NDAA នឹង​ត្រូវ​អនុម័ត​ដោយ​ប្រធានាធិបតី ចូ បៃ​ដិន​៕

​ការិយាល័យ​ដោះស្រាយ​ភាពមិនប្រក្រតី​នៃ​ដែន​ទាំងពួង (AARO)​នៅ​មន្ទីរ​បញ្ច​កោណ​អាម៉េរិក​