​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អ្នកនាំពាក្យ​ក្រសួងការបរទេស​អាម៉េរិក​លោក ណេ​ត ប្រា​យ (Ned Price)​បាន​និយាយ​កាលពី​ថ្ងៃ​អង្គារ​ទី​២០​ធ្នូ​ថា​ក្រុម​តា​លី​បង់​បាន​ដោះលែង​ជន​​ជាតិ​អាម៉េរិក​ពីរ​នាក់ ដែល​ត្រូវបាន​ឃុំខ្លួន​នៅក្នុង​ប្រទេស​អា​ហ្វ​ហ្គានី​ស្ថាននៅក្នុង​អ្វី​ដែល​ហាក់ដូចជា “​កាយវិការ​សុច្ឆន្ទៈ​”​។​

​លោក​បាន​ប្រាប់​អ្នកយកព័ត៌មាន​ថា ការដោះលែង​នេះ​មិនមែន​ជា​ផ្នែក​នៃ​ការដោះដូរ​អ្នកទោស​ហើយក៏​គ្មាន​ការដោះដូរ​ប្រាក់​ស្អី​នោះដែរ​។​

​មន្ត្រីរដ្ឋបាល​ជាន់ខ្ពស់​ម្នាក់​បាន​និយាយថា រដ្ឋាភិបាល​អាម៉េរិក​បច្ចុប្បន្ន​កំពុង​ជួយ​អ្នក​ទាំង​ពីរ ហើយ​ថា​ពួកគេ​នឹង​បាន​ជួបជុំ​គ្រួសារ​របស់​ពួកគេ​វិញ​ក្នុងពេល​ឆាប់ៗ​នេះ​។​

​មន្ត្រី​រូប​នេះ​មិន​ត្រូវបាន​អនុញ្ញាត​ឱ្យ​និយាយ​ជា​សាធារណៈ​អំពី​បញ្ហា​នេះ​ទេ ហើយ​និយាយ​ក្នុង​លក្ខខណ្ឌ​អនាមិក​។​

​ទាំង​លោក​ប្រាយ​និង​មន្ត្រី​ជាន់​ខ្ពស់​នោះ​មិនបាន​កំណត់​អត្តសញ្ញាណ​ជនជាតិ​អាម៉េរិក​ទាំង​ពីរ​នាក់​នោះ​ទេ​។​

​សហរដ្ឋ​អាម៉េរិក​មិន​ទទួលស្គាល់​ជា​ផ្លូវការ​នូវ​ក្រុម​តា​លី​បង់​ដែល​កំពុងកាន់​អំណាច​នៅ​ប្រទេស​អា​ហ្វ​ហ្គានី​ស្ថានទេ ដែល​បាន​ឡើង​កាន់​អំណាច​ពី​រដ្ឋាភិបាល​គាំទ្រ​ដោយ​សហរដ្ឋ​អាម៉េរិក​បន្ទាប់​ពី​កងកម្លាំង​​អាម៉េរិក​បាន​ដកចេញ​ក្នុង​ឆ្នាំ ២០២១៕

​អ្នកនាំពាក្យ​ក្រសួងការបរទេស​អាម៉េរិក​លោក ណេ​ត ប្រា​យ​