​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រធានាធិបតី​បារាំង​លោក អេម​ម៉ានុយ​អែល ម៉ា​ក្រុង កាលពី​ថ្ងៃ​អង្គារ​ទី​២០​ធ្នូ បាន​អបអរសាទរ​ប្រទេស​កាតា និង “​មិត្ត​របស់គាត់​” គឺ​ប្រធានាធិបតី​អេ​ហ្ស៊ី​ប លោក អាប់ឌែល ហ្វាត​តា អាល់ ស៊ី​ស៊ី (Abdel Fattah al-Sisi) សម្រាប់​ការធ្វើជា​ម្ចាស់ផ្ទះ​ព្រឹត្តិការណ៍​វើល​ខា​ប់ និង​កិច្ចប្រជុំ​អាកាសធាតុ COP27 ដោយ​ប្រថុយ​នឹង​ការរិះគន់​នៅក្នុង​ស្រុក​។​

​លោក​បាន​និយាយ​នៅ​ឯ​កិច្ចប្រជុំ​កំពូល​មជ្ឈិមបូព៌ា​នៅឯ​ភូមិ​ស្វៃ​មេ (Sweimeh) ដែល​ជា​រមណីយដ្ឋាន​មួយ​នៅ​ច្រាំង​សមុទ្រ​មរណៈ (Dead Sea) ក្នុងប្រទេស​ហ្ស៊កដានី​ថា​”​នៅពេល​យើង​បញ្ចប់​​ការប្រកួត​វើល​ខាប់ ដែល​ធ្វើ​ជា​លើកដំបូង​នៅ​ក្នុង​ពិភព​អារ៉ាប់​ហើយ​ដែល​បាន​ធ្វើឡើង​ក្នុង​ប្រទេស​កាតា ខ្ញុំ​សូម​អបអរសាទរ​ពួកគេ​”​។​

​លោក​ម៉ា​ក្រុង​បាន​និយាយ​ដោយ​សំដៅ​ដល់​សន្និសីទ​អាកាសធាតុ COP27​ថា “​ខ្ញុំ​សូម​អបអរសាទរ​មិត្ត​របស់​ខ្ញុំ​គឺ​លោក​ប្រធានាធិបតី​ស៊ី​ស៊ី ពីព្រោះ​ទីក្រុង​សាម​អែល​សេក (Sharm el-Sheikh) បាន​ទទួល​ជោគជ័យ​ក្នុង​ការនាំ​ពិភពលោក​រួបរួមគ្នា និង​ដោះស្រាយ​បញ្ហា​នៃ​ការបាត់បង់​និង​ការខូចខាត ដែល​ជា​គន្លឹះ​ពិតប្រាកដ​”​។​

​លោក​បាន​បន្ថែមថា “​កិច្ចប្រជុំ COP លើក​ក្រោយ​នឹង​ធ្វើឡើង​នៅក្នុង​ប្រទេស​អារ៉ាប់​រួម​អេ​មី​រ៉ា​ត ដែល​បង្ហាញ​ថា​តើ​តំបន់​នេះ​កំពុង​ក្លាយជា​ចំណុចកណ្តាល​នៃ​ការទូត​ខ្លាំង​កម្រិតណា​”​។​

COP27​បានបញ្ចប់​ជាមួយនឹង​ការអនុម័ត​អត្ថបទ​ចម្រូងចម្រាស​ខ្លាំង​ស្តីពី​ជំនួយ​ដល់​ប្រទេស​ក្រីក្រ​ដែល​រង​ផល​ប៉ះពាល់​ដោយ​ការប្រែប្រួល​អាកាសធាតុ​ប៉ុន្តែ​ក៏​បរាជ័យ​ក្នុង​ការកំណត់​មហិច្ឆតា​​ថ្មី​សម្រាប់​ការកាត់បន្ថយ​ការបំភាយ​ឧស្ម័ន​ផ្ទះ​កញ្ចក់​ផងដែរ​។​

​លោក​ម៉ា​ក្រុង​ត្រូវ​បាន​ក្រុមប្រឆាំង​បារាំង​រិះគន់​យ៉ាង​ខ្លាំង​ចំពោះ​ការ​ទៅ​ប្រទេស​កាតា​ពីរដង​ដើម្បី​គាំទ្រ​ក្រុម​ជម្រើសជាតិ​បារាំង និង សម្រាប់​ការសរសើរ​អ្នករៀបចំ​ព្រឹត្តិការណ៍​នេះ​។​

​ប្រទេស​កាតា​បាន​ប្រឈម​មុខ​នឹង​ការរិះគន់​ពី​អន្តរជាតិ​ជុំវិញ​កំណត់ត្រា​សិទ្ធិមនុស្ស​របស់​ខ្លួន និង​ផល​ប៉ះពាល់​បរិស្ថាន​នៃ​កីឡដ្ឋាន​ម៉ាស៊ីនត្រជាក់​ក្នុង​ព្រឹត្តិការណ៍វើ​លខាប់ ដែល​បាន​បញ្ចប់​កាលពី​ថ្ងៃអាទិត្យ​។​

​រដ្ឋ​ឈូង​សមុទ្រ​ពែ​ក្ស ដែល​សម្បូរ​ឧស្ម័ន​នេះ ក៏​ជា​ចំណុចកណ្តាល​នៃ​ការស៊ើបអង្កេត​លើ​ការចោទប្រកាន់​អំពើពុករលួយ​ដ៏​ល្បី​នៅ​សភា​អឺរ៉ុប​ផងដែរ​៕

លោក​ម៉ា​ក្រុង​ចូលរួម​កិច្ចប្រជុំ​កំពូល​មជ្ឈិមបូព៌ា​នៅ​ឯ​ភូមិ​ស្វៃ​មេ​របស់​ហ្ស៊កដានី​កាលពី​ថ្ងៃ​អង្គា​រ