​ដោយៈ ទេ​ពក​ង្រី / កំពង់ឆ្នាំងៈ នៅ​ព្រឹក​ថ្ងៃទី ២១ ខែធ្នូ ឆ្នាំ​២០២២ សមត្ថកិច្ច​ចម្រុះ រួមមាន មន្ត្រីនគរបាល​ប្រឆាំង​បទល្មើស​សេដ្ឋកិច្ច នៃ​ស្នងការដ្ឋាន​នគរបាល​ខេត្ត និង​មន្ត្រីជលផល ដឹកនាំ​ដោយ​លោក តាត សីហៈ បាន​ចេ​ុះ​ពិនិត្យ​ស្រាវជ្រាវ និង​បង្ក្រាប បទល្មើស​នេសាទ តាម​គោលដៅ ដែល​បាន​គ្រោងទុក ដោយបាន​ចាប់បាន​កាណូត និង​ជនល្មើស ចំនួន ១៣ នាក់ ប្រគល់ជូន​សមត្ថកិច្ច​ជលផល ចាត់ការ​តាម​នីតិវិធី ។​

​មន្ត្រី​ម្នាក់​ក្នុងចំណោម​សមត្ថកិច្ច​ចម្រុះ ដែល​ចុះ​ប្រតិបត្តិការ​នោះ បាន​ឲ្យ​ដឹងថាៈ នៅវេលា​ម៉ោង ៩ និង ៤៥ នាទី ព្រឹក​ថ្ងៃទី​២១ ខែធ្នូ នេះ នៅ​ចំណុច​ទន្លេ ក្នុងភូមិ​ដូន​វៀត ស្ថិតក្នុង​ឃុំ​ពាម​ឆ្កោក ស្រុក​ជល​គិរី សមត្ថកិច្ច​ចម្រុះ បាន​ប្រទះឃើញ​កាណូត​អូស​នាម សម័យ​ត​កន្ទុយ ខុសច្បាប់ ចំនួន ៣​គ្រឿង មាន​មនុស្ស​ចំនួន ១៣ នាក់ កំពុង​ធ្វើ សកម្មភាព អូស​នាម​សម័យ​។ ខណៈនោះ សមត្ថកិច្ច​ចម្រុះ បាន​ចាប់​ឃាត់ អូស​យក មក​រក្សាទុក នៅ​សង្កាត់​នេសាទ​កំពង់ ឆ្នាំង ក្រុង​កំពង់ឆ្នាំង ដើម្បី​សុំ​គោលការណ៍ ថ្នាក់លើ ចាត់ការ​តាមផ្លូវ​ច្បាប់​។​

​លោក តាត សីហៈ មន្ត្រី​ផ្នែក​រដ្ឋបាល​ជលផល​កំពង់​ឆ្នាំង បានបញ្ជាក់​ថាៈ កាណូត​អូស នាម​សម័យ ខាងលើនេះ​ ២ គ្រឿង មាន​ទីលំនៅ​ស្រុក​ពញាឮ ខេត្តកណ្ដាល ដោយ​ពួកគេ បាន​ប្រាប់​ក្រុម​សមត្ថកិច្ច​ចម្រុះ​ថា ពួកគេ​មាន​គ្នា​សរុប​ចំនួន ៧ គ្រឿង ដោយឡែក ថ្ងៃនេះ មក​នេសាទ​តែ ៣ គ្រឿង​នេះ​ទេ ដែលមាន​មេការ ឈ្មោះ ដេ​ប ជា​អ្នក​រត់ការ ។ ដោយឡែក កាណូត ១ គ្រឿង​ទៀត ជា​របស់​ខ្មែរឥស្លាម ទីលំនៅ​ស្រុក កំពង់ត្រឡាច ខេត្តកំពង់ឆ្នាំង តាម​ដឹង ពួកគេ​មាន​ទូក​ចំនួន ៤ គ្រឿង តែ​ចេញមក នេសាទ ថ្ងៃនេះ តែមួយ​គ្រឿង​ប៉ុណ្ណោះ​។​

​សូមបញ្ជាក់ថា ទូក​អុស​នាម​សម័យ​ទាំងអស់​ខាងលើនេះ តែងតែ​ធ្វើ​សកម្មភាព ជា​រៀងរាល់ឆ្នាំ ចាប់ពី​ក្បាលកោះ​លង្វែក រហូតមកដល់​ចំណុច ដែល​ត្រូវ​សមត្ថកិច្ច បង្ក្រាប​នេះ ខណ​:​សមត្ថកិច្ច​ជំនាញ ក្នុង​តំបន់​នេះ មិន​អើពើ​ធ្វើការ​បង្ក្រាប​សោះ ។​
​កាណូត​អូស​នាម​សម័យ ទាំង ៣ គ្រឿង និង​អ្នកនេសាទ ចំនួន ១៣ នាក់ ខាងលើនេះ ត្រូវបាន​សមត្ថកិច្ច​ជលផល អូស​យកមក​រក្សាទុក នៅ​សង្កាត់​នេសាទ​កំពង់ឆ្នាំង ដើម្បី​ក សាង​សំណុំរឿង ឆ្លង​យោបល់​ថ្នាក់ លើ​ចាត់ការ តាម​នីតិវិធី ៕/V​.mara