​ដោយៈ សៅ​វ៉ាន់ឌី / ​ព្រះ​វិហារៈ នៅ​ថ្ងៃទី​២០ ខែធ្នូ ឆ្នាំ​២០២២ នៅ​សាលប្រជុំ​សាលា ស្រុក​រវៀង ស្ថិតក្នុង​ឃុំ​របៀប បានរៀបចំ​សិក្ខាសាលា​សមាហរណកម្ម កម្មវិធី​វិនិយោគ បី​ឆ្នាំ​រំកិល​របស់​ឃុំ សង្កាត់ នៅ​ថ្នាក់ស្រុក ក្រោម​អធិបតីភាព​លោក អ៊ុក គឹម​សាន អភិបាលរង​នៃ​គណៈ​អភិបាលខេត្ត​ព្រះវិហារ និង​ដោយមាន​ការអញ្ជើញ​ចូលរួម ពី​សំណាក់ អង្គការ​ដៃគូ​អភិវឌ្ឍន៍ គ្រឹះស្ថាន​មីក្រូហិរញ្ញវត្ថុ ធនាគារ ថ្នាក់ដឹកនាំ​មន្ទីរ អង្គភាព​ពាក់ព័ន្ធ និង​អាជ្ញាធរ​ដែនដី គ្រប់លំដាប់​ថ្នាក់ ។​

​លោក សេង ប៊ុន​រឿន ប្រធាន​មន្ទីរ​ផែនការ​ខេត្តព្រះវិហារ បាន​ឲ្យ​ដឹងថាៈ គោលបំណង នៃ​ការរៀបចំ​សិក្ខាសាលា នាពេលនេះ គឺ​ដើម្បីឱ្យ​គម្រោង​សកម្មភាព​អភិវឌ្ឍន៍ ដែល​ស្នើ ឡើង​ដោយ ក្រុមប្រឹក្សាឃុំ ទាំង​១២ ក្នុងស្រុក​រវៀង ដោយ​ផ្តោតទៅលើ​គោល នយោបាយ​យុទ្ធ​សា​ស្រ​ចតុកោណ​របស់​រាជរដ្ឋាភិបាល និង​គោលនយោបាយ​របស់​ខេត្ត ព្រមទាំង​សកម្មភាព​នានា​របស់​បណ្តា​មន្ទីរ​វិស័យ អង្គភាព​ជំនាញ និង​អង្គការ​ជា​ដៃគូ​  ដើម្បី​ប្រមូលផ្តុំ​នូវ​ធនធាន សម្រាប់​គាំទ្រ​កិច្ចអភិវឌ្ឍន៍​នៅ​មូលដ្ឋាន ។​

​លោក អ៊ុក គឹម​សាន បាន​មានប្រសាសន៍​ឲ្យ​ដឹងថាៈ សិក្ខាសាលា​សមាហរណកម្ម កម្ម វិធី​វិនិយោគ បី​ឆ្នាំ​រំកិល​របស់​រដ្ឋបាល​ស្រុក​រវៀង មាន​សារៈ​សំខាន់បំផុត គឺ​ដើម្បី​បំរើ​ដល់ បងប្អូន​ប្រជាពលរដ្ឋ អំពី​តម្រូវការ​អភិវឌ្ឍន៍​មូលដ្ឋាន​ទូទាំង​ស្រុក ហើយ​គម្រោង​ដែល បានលើកឡើង គឺ​សុទ្ធសឹងតែ​គម្រោង​អាទិភាព ដែលមាន​ការចូលរួម​ពី​ប្រជាពលរដ្ឋ​។​

​លោក បាន​បន្ថែមថាៈ ការធ្វើ​កម្មវិធី​វិនិយោគ គឺ​ឈរលើ​មូលដ្ឋាន​ច្បាស់លាស់ ផ្អែកទៅលើ​សុ​ក្រិត​ភាព តម្លាភាព ត្រឹមត្រូវ នៅ​ទូទាំង​ឃុំ​ទាំង​១២ ក្នុងស្រុក​រវៀង ។

​លោក​ក៏បាន​អំពាវនាវ ដល់​អង្គការ​សង្គម​ស៊ីវិល ដៃគូ​អភិវឌ្ឍន៍ វិស័យ​ឯកជន និង បណ្តា​មន្ទីរ អង្គភាព សូម​បន្ត​គាំទ្រ និង​ជ្រើស​រើសយក​គម្រោង​ជា​អាទិភាព ដាក់បញ្ចូល ក្នុង​ផែនការ​គាំទ្រ​របស់ខ្លួន សម្រាប់​ឆ្នាំ​២០២៣ បន្តទៀត ដើម្បី​ជាការ​ចូលរួមចំណែក អភិវឌ្ឍន៍​នៅ​ថ្នាក់មូលដ្ឋាន សំដៅ​ជួយ​កាត់បន្ថយ​ភាពក្រីក្រ របស់​ប្រជាពលរដ្ឋ ស្របតាម​គោលនយោបាយ ជា​យុទ្ធសាស្ត្រ​ចតុកោណ របស់​រាជរដ្ឋាភិបាល​កម្ពុជា ។​

​តាម​របាយការណ៍​រប​ស់លោក ហោ ប៊ុនហួរ អភិបាលស្រុក​រវៀង បានបញ្ជាក់​ថាៈ ការ អនុវត្ត​លើ​គម្រោង​ចុះ​កិច្ចព្រមព្រាង​បណ្តោះអាសន្ន ក្នុង​ឆ្នាំ​២០២២ មាន​ចំនួន​សរុប ២០៣ គម្រោង ក្នុងនោះ​គម្រោង​អនុវត្តបាន​ចំនួន ៨៣ គម្រោង គម្រោង​កំពុង​អនុវត្ត មាន​ចំនួន ៦៦ គម្រោង គម្រោង​មិនទាន់បាន​អនុវត្ត មាន​ចំនួន ១៦ គម្រោង និង គម្រោង​អនុវត្តបាន ដោយ​ពុំមាន​ចុះ​កិច្ចព្រមព្រៀង បណ្តោះអាសន្ន ក្រោយពេល សិក្ខាសាលា​សមាហរណកម្ម ផែនការ​នៅ​ថ្នាក់ស្រុក មាន​ចំនួន ៣៨ គម្រោង ។

​គម្រោង​អាទិភាព​ឃុំ ដែល​បាន​ស្នើឡើង មាន​ចំនួន ៤៨៦ គម្រោង ក្នុងនោះ គម្រោង ដែល​បាន​គាំទ្រ ចុះ​កិច្ចព្រមព្រៀង​បណ្តោះអាសន្ន លើ​គម្រោង​អាទិភាព​សំណើ​របស់​ឃុំ ក្នុង​ឆ្នាំ​២០២២ សម្រាប់​អនុវត្ត​ឆ្នាំ​២០២៣ នាពេល​សិក្ខាសាលា​សមាហរណកម្ម កម្មវិធី​វិនិយោគ​បី​ឆ្នាំ​រំកិល មាន​ចំនួន ៤៤៣ គម្រោង ៕/V​.mara