​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ឥណ្ឌា​គ្រោង​នឹង​ក្លាយជា​ប្រទេស​សេដ្ឋកិច្ច​ធំ​ដែល​រីកលូតលាស់​លឿន​បំផុត​របស់​ពិភពលោក​ក្នុង​ឆ្នាំ​ខាង​មុខ​ដោយសារ​ការរីកដុះដាល​នៃ​ការ​លក់រាយ​ក្រោយ​ជំងឺ​​រាតត្បាត​និង​ការជួសជុល​តារាង​តុល្យការ​ធនាគារ​នាពេល​ថ្មីៗ​នេះ​បាន​ទាក់ទាញ​ការវិនិយោគ​ថ្មី ដែល​ជំរុញ​ឱ្យមាន​តម្រូវការ​ខ្លាំង​សម្រាប់​អ្វីៗ​គ្រប់យ៉ាង​រាប់​ចាប់​ពី​រថយន្ត​រហូត​ដល់​ទូរទស្សន៍ ធ្យូងថ្ម​និង​​ក្រុមហ៊ុន​អាកាសចរណ៍​។​

​យោង​តាម​ការ​ស្ទាបស្ទង់​របស់​ធនាគារ​កណ្តាល​ឥណ្ឌា​បានឱ្យដឹងថា សេដ្ឋកិច្ច​ធំ​បំផុត​ទី​ប្រាំ​របស់​ពិភពលោក​ត្រូវ​គេ​រំពឹងថា​នឹង​កើនឡើង ៦ ភាគរយ​ក្នុង​ឆ្នាំ​សារពើពន្ធ​ដែល​បញ្ចប់​នៅ​ថ្ងៃទី ៣១ ខែ​មីនា ឆ្នាំ ២០២៤​។​

​ខណៈ​ទាប​ជាង​ការព្យាករណ៍​ក្នុង​ឆ្នាំសារពើពន្ធ​បច្ចុប្បន្ន​៦,៨ ភាគរយ ទស្សនវិស័យ​នេះ​គឺ​ផ្ទុយស្រឡះ​នឹង​ការព្យាករណ៍ ២០២៣ ដ៏​អាប់អួរ​នៅ​សហរដ្ឋ​អាម៉េរិក អឺរ៉ុប និង​គួរឱ្យ​កត់សម្គាល់​បំផុត​គឺ​ប្រទេស​ចិន ដែល​ជា​គូប្រជែង​សេដ្ឋកិច្ច​អាស៊ី​ដ៏​សំខាន់ ដែល​ការកើនឡើង​នា​ពេល​ថ្មីៗ​នេះ​នៃ​ការឆ្លង​កូ​វីដ​ត្រូវគេ​រំពឹងថា​នឹង​ធ្វើឱ្យ​រាំងស្ទះ​សកម្មភាព​សេដ្ឋកិច្ច​ក្នុង​ឆ្នាំ ២០២៣​។​

​អ្វី​ដែល​សំខាន់​គឺថា លក្ខខណ្ឌ​គឺ​ប្រសើរ​ជាង​មុន​ផងដែរ នោះ​គឺ​ដោយសារ​ការថយចុះ​វិបត្តិ​ក្នុងអំឡុង​ការកើនឡើង​ករណី​កូវី​ដ​១៩​ដ៏​សាហាវ​របស់​ឥណ្ឌា​ក្នុង​ឆ្នាំ ២០២១​ក៏ដូចជា​ការថយចុះ​វិបត្តិ​បំណុល​​ពី​ទសវត្សរ៍​មុន​ផងដែរ​។​

​អារម្មណ៍​ធូរស្រាល​បែបនេះហើយ​ទើប​ជំរុញ​ឱ្យ​មាន​ការចំណាយ​និង​ការវិនិយោគ​ក្នុង​ប្រទេស​ឥណ្ឌា​កាន់តែ​ខ្លាំង​ឡើង បើទោះបីជា​ការ​ស្ទុះ​ងើប​ឡើង​វិញ​ត្រូវ​គេ​រំពឹងថា​នឹង​មាន​ភាព​មិន​ស្មើ​គ្នា​ក៏​ដោយ ដែល​វា​នឹង​ផ្តល់​អត្ថប្រយោជន៍​ដល់​វិស័យ​នានា​តាម​ទីក្រុង​ជាង​ជនបទ​។​

​លោក ស្រី​ដា ស៊ី​វ៉ា​រ៉ា​ម (Sridhar Sivaram) នាយក​ផ្នែក​វិនិយោគ​នៅ​ក្រុមហ៊ុន Enam Holdings ជា​ក្រុម​វិនិយោគ​គ្រប់គ្រង​ដោយ​ឯកជន បាន​និយាយថា “​ប្រសិនបើ​ឥណ្ឌា​ធ្វើ​អ្វីៗ​បាន​ត្រឹមត្រូវ យើង​អាច​ឃើញ​លំហូរ​ចូល​ទុន​ពី​បរទេស​ដ៏​សំខាន់​ក្នុង​រយៈពេល​ពី​មួយ​ទៅ​ពីរ​ឆ្នាំ​ខាងមុខ​”​។​

​លោក​មាន​សុទិដ្ឋិនិយម​បំផុត​លើ​ធនាគារ​ឥណ្ឌា ដែល​កំពុង​មាន “​ពេល​វេលា​ដូច​ក្នុង​រឿង Cinderella” ជា​ឃ្លា​ពេញ​និយម​ប្រើ​ដោយ​មហាសេដ្ឋី​ធនាគារ លោក អូ​ដាយ កូតា​ក់ (Uday Kotak) ដោយសារ​តែ​តម្រូវការ​ឥណទាន​ខ្ពស់ និង ការថយចុះ​បំណុល​ស្អុយ​៕

​អារម្មណ៍​ធូរស្រាល​បាន​ជំរុញ​ឱ្យ​មាន​ការចំណាយ​និង​ការវិនិយោគ​ក្នុង​ប្រទេស​ឥណ្ឌា​កាន់តែ​ខ្លាំង​ឡើង​