​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ រដ្ឋាភិបាល​នូវែល​សេឡ​ង់​កាលពី​ថ្ងៃ​ពុធ​ទី​២១​ធ្នូ​បាន​គូសបញ្ជាក់​ពី​ការផ្លាស់ប្តូរ​ចំពោះ​ផែនការ​ដ៏​ចម្រូងចម្រាស​ក្នុង​ការយកពន្ធ​លើ​ផោម​និង​ភើ​របស់​គោ​ប៉ុន្តែ​​ក្រុម​កសិករ​ឈានមុខ​មួយ​បាន​និយាយថា ខ្លួន​នៅតែ​ប្រឆាំង​នឹង​គម្រោង​ការកាត់បន្ថយ​ការបំភាយ​ឧស្ម័ន​នេះ​។​

​នូវែ​លសេ​ឡង់​កំពុង​រៀបចំ​ផែនការយ​កព​ន្ធលើ​ការបំភាយ​ឧស្ម័ន​មេតា​ននិង​នីត្រា​តអុកស៊ីត​លើក​ដំបូង​បំផុត ដែល​ផលិត​ដោយ​សត្វ​គោ​ចំនួន ៦ លាន​ក្បាល និង​ចៀម ២៦ លាន​ក្បាល​របស់​ប្រទេស​នេះ ជា​ជំហាន​មួយ​ឆ្ពោះទៅរក​ការដោះស្រាយ​ការប្រែប្រួល​អាកាសធាតុ​។​

​នៅក្រោម​គម្រោង​ដែល​បាន​ស្នើ​ឡើង​នេះ កសិករ​នឹង​ត្រូវ​ចំណាយ​សម្រាប់​ការបំភាយ​ឧស្ម័ន​ពី​សត្វ​របស់​ពួកគេ​។​

​ផែនការ​នេះ​បាន​បង្ក​ឱ្យមាន​ភាពចលាចល​នៅក្នុង​សហគមន៍​កសិកម្ម​រប​ស់​នូវែ​លសេ​ឡង់ និង​បង្ក​ឱ្យមាន​ការតវ៉ា​ទូទាំង​ប្រទេស​។​

​កសិករ​បាន​ទាមទារ​ឱ្យ​រដ្ឋាភិបាល​ឆ្វេងនិយម​របស់​នាយករដ្ឋមន្ត្រី ចា​ស៊ីន​ដា អា​ឌឺ​ន (Jacinda Ardern) លុបចោល​ពន្ធ​នេះ ដែល​ពួកគេ​ព្រមាន​ថា​នឹង​ធ្វើឱ្យ​អាហារ​មាន​តម្លៃ​ថ្លៃ​ជាង​មុន និង អាច​បង្ក​ហានិភ័យ​ដល់​ជីវភាព​រស់នៅ​។​

​ការផ្លាស់ប្តូរ ដែល​បាន​គូសបញ្ជាក់​នៅ​ថ្ងៃ​ពុធ​នេះ រួម​មាន​ការអនុញ្ញាត​ឱ្យ​កសិករ​ប្រើប្រាស់​ព្រៃឈើ​មិនមែន​កសិដ្ឋាន​ដើម្បី​ទូទាត់​ចំពោះ​ការបំភាយ​កាបូន​របស់​ពួកគេ និង​ការសន្យា​ដើម្បី​រក្សា​​តម្លៃ​នៃ​ការបំភាយ​ឧស្ម័ន​ឱ្យ​នៅទាប​។​

​លោកស្រី​អា​ឌឺ​ន​បាន​និយាយ​នៅក្នុង​សេចក្តីថ្លែងការណ៍​មួយ​ថា “​គោលដៅ​រួម​របស់​យើង​គឺ​គាំទ្រ​កសិករ​ឱ្យ​បង្កើន​ការនាំចេញ​របស់​ពួកគេ កាត់បន្ថយ​ការបំភាយ​ឧស្ម័ន​និង​រក្សា​បាននូ​វ​ការប្រ​កួតប្រ​​ជែង​ជា​អន្តរជាតិ​របស់​វិស័យ​កសិកម្ម​របស់​យើង​”​។​

​លោកស្រី​បាន​ព្រមាន​ថា “​ទោះ​មាន​ឬ​គ្មាន​សំណើ​របស់​រដ្ឋាភិបាល​ក៏ដោយ ក៏​នូវែល​សេឡ​ង់​នៅ​តែ​ត្រូវ​នៅ​ជួរ​មុខ​គេ ដើម្បី​រក្សា​ការប្រកួតប្រជែង​នៅក្នុង​ទីផ្សារ​ដែល​ទាមទារ​ផលិតផល​ដែល​ផលិត​ប្រកប​​ដោយ​និរន្តរភាព​”​។​

​លោកស្រី​អា​ឌឺ​ន​សង្ឃឹម​ថា​គណៈរដ្ឋមន្ត្រី​របស់​លោកស្រី​នឹង​ធ្វើ​ការសម្រេចចិត្ត​ចុងក្រោយ​លើ​ការកំណត់​តម្លៃ​សម្រាប់​គម្រោង​ការបំភាយ​ឧស្ម័ន​កសិកម្ម​នៅ​ដើមឆ្នាំ​២០២៣​ដោយ​គម្រោង​កំណត់​តម្លៃ​រយៈ​​ពេល​ប្រាំ​ឆ្នាំ​នឹង​ចាប់ផ្តើម​ពី​ឆ្នាំ ២០២៥​។​

​លោក អាន់​ឌ្រូ ហុក​ហ្គាដ (Andrew Hoggard) ប្រធាន​ក្រុម​តស៊ូ​មតិ​ផ្នែក​កសិកម្ម​ឈានមុខ​មួយ​របស់​នូវែ​លសេ​ឡង់​បាន​និយាយថា ផែនការ​ដែល​បាន​ធ្វើ​កែសម្រួល​នេះ​នៅតែ​មាន​ក្លិនស្អុយ ហើយ​បាន​រិះគន់ “​តារាង​ពេលវេលា​មិន​ប្រាកដប្រជា​” របស់​រដ្ឋាភិបាល​។​

​លោក​ហុក​ហ្គាដ ជា​ប្រធាន​សហព័ន្ធ​កសិករ​នូវែ​លសេ​ឡង់ បាន​និយាយ​នៅក្នុង​សេចក្តីថ្លែងការណ៍​មួយ​ថា “​ប្រទេស​ផ្សេង​ទៀត​កំពុង​និយាយ​អំពី​សន្តិសុខ​ស្បៀង​និង​ធ្វើការ​ជាមួយ​កសិករ​ដើម្បី​បង្កើត​ដំ​ណោះ​​ស្រាយ​ជាក់ស្តែង​នៅ​តាម​កសិដ្ឋាន​។​មានតែ​នូវែល​សេឡ​ង់​ប៉ុណ្ណោះ​ដែល​ចាត់​វិធានការ​ដាក់​ទណ្ឌកម្ម​ពន្ធ​លើ​ការផលិត​ស្បៀងអាហារ​ប្រកបដោយ​ប្រសិទ្ធភាព​និង​មិន​មាន​ឧបត្ថម្ភ​ធន​ទោះបីជា​វា​បង្ក​​ការខាតបង់​ធំ​ក៏​ដោយ​”៕

រដ្ឋាភិបាល​នូវែល​សេឡ​ង់​បាន​កែប្រែ​ផែនការ​ដ៏​ចម្រូងចម្រាស​ដើម្បី​យក​ពន្ធ​លើ​ការបំភាយ​ឧស្ម័ន​ផ្ទះ​កញ្ចក់​ពី​សត្វ​នៅ​តាម​កសិដ្ឋាន​