​ប្រែ​សម្រួលៈ​បំណង​(​ស្ពុ​ត​និច​)៖ ប្រធានាធិបតី​ចិន​លោក ស៊ី ជីន​ភីង បាន​ទទួល​ជួប​និង​ពិភាក្សា​ការងារ​ជាមួយ​អនុប្រធាន​ក្រុមប្រឹក្សា​សន្តិសុខ​រុស្ស៊ី​លោក ឌី​មី​ទ្រី មេ​វ៉េ​ដេ​វ (Dmitry Medvedev )​នៅ​​ទីក្រុង​ប៉េកាំង​កាលពី​ថ្ងៃ​ពុធ ។​

​លោក មេ​វ៉េ​ដេ​វ ដែល​ជា​អតីត​ប្រធានាធិបតី​រុស្ស៊ី បាន​ពាំនាំ​សារ​របស់​ប្រធានាធិបតីវ្ល៉ា​ឌី​មៀ ពូ​ទីន មក​ជូន​លោក​ស៊ី និង​ថា​លោក​និង​លោក​ស៊ី​បាន​ពិភាក្សា​អំពី​ភាព​ជា​ដៃគូ​យុទ្ធសាស្ត្រ​ចិន​-​រុស្ស៊ី កិច្ច​សហ​​ការ​រវាង​ប្រទេស​ទាំង​ពីរ ព្រមទាំង​ជម្លោះ​នៅ​អ៊ុ​យក្រែន​។​

​ការិយាល័យ​របស់​មេ​វ៉េ​ដេ​វ បាន​និយាយថា «​លោក​មេ​វ៉េ​ដេ​វ បាន​ជូន​សារ​របស់​លោក​ពូ​ទីន​ចំពោះ​លោក​ស៊ី ដោយ​កត់សំគាល់​ជាពិសេស​ការចរចា​នយោបាយ​កំរិត​ខ្ពស់​មិន​ដែល​ធ្លាប់​មាន​រវាង​ចិន​និង​រុស្ស៊ី​ និង​កិច្ចសហការ​ជាក់ស្តែង ហើយ​សម្តែង​ជំនឿ​ចិត្ត​លើ​ការអភិវឌ្ឍ​ទំនាក់ទំនង​ថ្នាក់​រដ្ឋ​និង​បក្ស​ជា​មួយ​ក្រុម​មេដឹកនាំ​ថ្មី​របស់​បក្ស​កុំម្មុយនីស្ត​ចិន »​។​

​ការិយាល័យ​បាន​និយាយ​ក្នុង​សេចក្តីថ្លែងការណ៍​មួយ​ថា «​លោក​មេ​វ៉េ​ដេ​វ​និង​លោក​ស៊ី បាន​ផ្លាស់ប្តូរ​ទស្សនៈ​គ្នា​លើ​បញ្ហា​មួយចំនួន​ធំ​ក្នុងអំឡុង​ជំនួប​នៅ​ក្រុង​ប៉េកាំង​កាលពី​ថ្ងៃ​ពុធ​។​អ្នក​ទាំង​ពីរ​បាន​វាយ​​តំលៃ​ខ្ពស់​អំពី​ស្ថានភាព​និង​ទស្សនវិស័យ​នៃ​ទំនាក់ទំនង​ចិន​-​រុស្ស៊ី និង​បញ្ហា​ទ្វេភាគី​មួយចំនួនធំ​»​។​

​វា​បាន​បន្ថែមថា​ភាគី​ទាំងពីរ ក៏​បាន​ពិភាក្សា​អំពី​ស្ថាន​ការ​នៅ​ក្នុង​អតីត​រដ្ឋ​សូ​វៀត រួម​មាន​វិបត្តិ​នៅ​អ៊ុ​យក្រែន ព្រមទាំង​បញ្ហា​អន្តរជាតិ​សំខាន់​មួយចំនួន​។​លោក​ស៊ី​និង​មេ​វ៉េ​ដេ​វ ក៏បាន​សំរេច​កិច្ច​ព្រម​​ព្រៀង​មួយ​ដើម្បី​បង្កើន​កិច្ចសហការ​រវាង​បក្ស ដែល​កំពុង​ដឹកនាំ​ប្រទេស​នៃ​ប្រទេស​ទាំង​ពីរ​៕

​លោក​មេ​វ៉េ​ដេ​វ កំពុង​ដឹកនាំ​គណៈប្រតិភូ​បក្ស​United Russia​មក​ធ្វើ​ទស្សនកិច្ច​ចិន តាម​ការអញ្ជើញ​របស់​គណបក្ស​កុំម្មុយនីស្ត​ចិន​