​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រធានាធិបតី​អាម៉េរិក ចូ បៃ​ដិន បាន​ស្វាគមន៍​មេដឹកនាំ​អ៊ុយ​ក្រែនលោក វ៉ូ​ឡូ​ឌី​មៀ ហ្សេ​លេន​ស្គី​មកកាន់​សេត​វិមាន​កាលពី​ថ្ងៃ​ពុធ​ទី​២១​ធ្នូ​ជាមួយនឹង​ការ​​ធានា​ជាថ្មី​អំពី​ការគាំទ្រ​របស់​អាម៉េរិក​សម្រាប់​ការការពារ​អ៊ុយ​ក្រែន​ប្រឆាំងនឹង​ការវាយលុ​ករបស់​រុស្ស៊ី​។​

​ក្រោយ​មក​ដល់​តាម​សួន​ខាងត្បូង​របស់​សេត​វិមាន​តាម​រថយន្ត​ម៉ាក Chevrolet​ពណ៌​ខ្មៅ និង​ពាក់​អាវយឺត​ពណ៌​បៃតង​អូ​លីវ និង​ខោ​វែង​ពណ៌​ក្រ​ម៉ៅ​ប្រចាំត្រកូល​របស់គាត់ លោក​ហ្សេ​លេន​ស្គី​បាន​​ប្រាប់​លោកបៃ​ដិន​ក្នុង​កិច្ចប្រជុំ​មួយ​នៅ​ការិយាល័​យ​ពងក្រពើ​ថា “​ជាបឋម​ខ្ញុំ​សូម​អរគុណ​។ វា​ជា​កិត្តិយស​ដ៏​អស្ចារ្យ​ដែល​បាន​មក​ទី​នេះ​”​។​

​លោកបៃ​ដិន​ពាក់​ឈុត​ធំ​ពណ៌​ខៀវ​និង​ក្រវាត់ក​ពណ៌​ខៀវ​និង​លឿង ដែល​ជា​ពណ៌​នៃ​ទង់ជាតិ​អ៊ុ​យក្រែន​។​

​ប្រធានាធិបតី​អ៊ុ​យក្រែន ដែល​និយាយថា​លោក​ចង់​មក​សហរដ្ឋ​អាម៉េរិក​ឱ្យបាន​ឆាប់​ជា​ង​នេះ បានផ្តល់​ការកោតសរសើរ​ដល់​លោកបៃ​ដិន សភា​អាម៉េរិក និង​ប្រជាជន​អាម៉េរិក​ចំពោះ​ការគាំទ្រ​របស់​ពួកគេ ចាប់តាំងពី​រុស្ស៊ី​បាន​ឈ្លានពាន​ប្រទេស​របស់​លោក​កាលពី​ចុងខែ​កុម្ភៈ​។​

​លោក​បាន​ផ្តល់ឱ្យ​លោកបៃ​ដិន​នូវ​មេដាយ​អ៊ុ​យក្រែន​សម្រាប់​គុណសម្បត្តិ​ខាង​យោធា ដែល​បាន​ផ្តល់ជូន​ដោយ​មេបញ្ជាការ​ក្រុម​រ៉ុក្កែត HIMARS​។​

​ប្រព័ន្ធ​រ៉ុក្កែត HIMARS ដែល​ផ្គត់ផ្គង់​ដោយ​សហរដ្ឋ​អាម៉េរិក បាន​បង្ហាញ​ឱ្យឃើញ​ពី​សារៈសំខាន់​ចំពោះ​ការវាយលុក​របស់​អ៊ុយ​ក្រែន​ក្នុង​ខែសីហា ដែល​បាន​បណ្តេញ​រុស្ស៊ី​ចេញពី​ទីក្រុង​ខា​គី​វ (Kharkiv) និង​បន្ទាប់មក​គឺ​ទីក្រុង​ឃើ​សុន (Kherson)​កាលពី​ខែ​មុន ដោយ​បាន​ជំរុញ​ដល់​យុទ្ធសាស្ត្រ​របស់​អ៊ុយ​ក្រែន​ក្នុង​ការវាយ​លុកទីប​ញ្ជា ផ្លូវ​ដឹកជញ្ជូន និង​ឃ្លាំង​គ្រាប់​របស់​រុស្ស៊ី​។​

​សេត​វិមាន​បាន​និយាយថា មន្ត្រី​មេបញ្ជាការ​នោះ​បាន​ជួប​លោក​ហ្សេ​លេន​ស្គី​នៅ​ទីក្រុង​បាក់​មុត (Bakhmut) ជា​ទីក្រុង​ជួរមុខ​របស់​អ៊ុយ​ក្រែន​នៅ​ភាគ​ខាងកើត​កាលពីដើម​សប្តាហ៍​នេះ ហើយ​បាន​សុំ​ឱ្យ​គាត់​ប្រគល់​មេដាយ​របស់​គាត់​ដល់​លោកបៃ​ដិន ជា​សញ្ញា​នៃ​ការដឹងគុណ​របស់គាត់​។​

​មន្ត្រី​រូប​នោះ​ក៏​បាន​សរសេរ​សំបុត្រ​ឱ្យ​លោកបៃ​ដិន​ផងដែរ​ដើម្បី​បង្ហាញ​ពី​ការដឹងគុណ​របស់​អ៊ុយ​ក្រែន​ចំពោះ​ជំនួយ​របស់​អាម៉េរិ​ក ដែល​បាន​ជួយ​មនុស្ស​ជាច្រើន​នៅ​អ៊ុយ​ក្រែន​ឱ្យ​នៅរ​ស់ នេះ​បើ​យោង​តាម​សេត​វិមាន​។​

​លោកបៃ​ដិនបាន​និយាយថា “​ពិតជា​មិន​ស័ក្តិសម​ទេ ប៉ុន្តែ​សូម​កោតសរសើរ​” ខណៈ​លោក​ទទួល​យក​មេដាយ​ពី​លោក​ហ្សេ​លេន​ស្គី ដោយ​សន្យាថា​នឹង​ផ្តល់​កាក់​បញ្ជាការ​មួយ​ឱ្យ​ទៅ​មេបញ្ជាការ​អ៊ុយ​ក្រែន​រូបនោះ​ពី​សមរភូមិ​អាម៉េរិក​ក្នុង​ប្រទេស​អ៊ីរ៉ាក់ ដែល​កូនប្រុស​ស្លាប់​ទៅ​របស់​គាត់ គឺ​លោក​ប៊ូ (Beau) បាន​ប្រយុទ្ធ​។​

​សេត​វិមាន​បាន​និយាយថា ក្រោយមក​លោកបៃ​ដិនបាន​ប្រគល់​កាក់​បញ្ជាកា​រចំ​នួន​ពីរ​ដល់​លោក​ហ្សេ​លេន​ស្គី មួយ​គឺ​សម្រាប់​លោក​មេបញ្ជាការ​រូបនោះ និង​មួយទៀត​សម្រាប់​ប្រធានាធិបតី​អ៊ុ​យក្រែន​៕

​លោក​ហ្សេ​លេន​ស្គី​ប្រគល់​មេដាយ​យោធា​របស់​មេ​បញ្ជាការ​អ៊ុយ​ក្រែន​ដល់​លោកបៃ​ដិន​នៅ​សេត​វិមាន​កាលពី​ថ្ងៃ​ពុធ