​ប្រែ​សម្រួលៈ​បំណង​(​ដេល្លី​ម៉េល​)៖ ក្រុមប្រឹក្សាសន្តិសុខ​អង្គការសហប្រជាជាតិ​កាលពី​ថ្ងៃ​ពុធ​បាន​អំពាវនាវ​សុំ​អោយ​របប​យោធា​មី​យ៉ាន់​ម៉ា​ដោះលែង​អតីត​មេដឹកនាំ​ស៊ីវិល អ៊ុង​សាន ស៊ូ​ជី នៅ​ពេល​ខ្លួន​​អនុម័ត​ជា​លើកដំបូង​សេចក្តីសំរេចចិត្ត​ស្តីពី​ស្ថានការណ៍​នៅក្នុង​ប្រទេ​ស​អាស៊ី​អាគ្នេយ៍​ដែល​ជោគជាំ​ដោយ​ភាព​វឹកវរ​មួយ​នេះ​។​

​ក្រុមប្រឹក្សា​ដែល​មាន​១៥​ប្រទេស​មាន​ការបែកបាក់​គ្នា​អំពី​បញ្ហា​មី​យ៉ាន់​ម៉ា​អស់​ពេល​រាប់​ទសវត្សរ៍​និង​ពី​មុន​គ្រាន់តែ​បាន​យល់ព្រម​ចេញ​សេចក្តីថ្លែងការណ៍​ផ្លូវ​ការណ៍​មួយ​អំពី​ប្រទេស​ដែល​បាន​វិល​មក​នៅ​ក្រោម​ការគ្រប់គ្រង​យោធា​វិញ​ចាប់តាំងពី​រដ្ឋប្រហារ​ខែ​កុម្ភៈ​ឆ្នាំ​២០២១​។​

​ស៊ូជី អាយុ​៧៧​ឆ្នាំ ជា​អ្នកទោស​ម្នាក់ ចាប់តាំងពី​ក្រុម​យោធា​ទម្លាក់​រដ្ឋាភិបាល​របស់​លោកស្រី​និង​ការបង្ក្រាប​យ៉ាង​ហិង្សា​លើ​ក្រុមប្រឆាំងរដ្ឋប្រហារកាលពី​ជិត​ពីរ​ឆ្នាំមុន​។​

​សេចក្តីសំរេចចិត្ត​កាល​ពី​ថ្ងៃ​ពុធ​«​ទទូច​សុំ​»​របប​យោធា​អោយ​«​ដោះ​លែង​ជា​បន្ទាន់​អ្នកទោស​ដែល​ត្រូវបាន​ចាប់ឃុំខ្លួន​ទាំង​បំពាន​តាម​អំពើ​ចិត្ត​» រួមមាន​លោកស្រី ស៊ូ​ជី​និង​អតីត​ប្រធានាធិបតី វីន​ ​ម្យី​ន​(Win Myint)​។​វា​ក៏​ទាមទារ​អោយ​«​បញ្ចប់​ជា​បន្ទាន់​អំពើហិង្សា​គ្រប់​ទំរង់​»និង​ស្នើសុំ​អោយ​«​គ្រប់​ភាគី​គោរព​សិទ្ធិមនុស្ស សេរីភាព​ជា​មូលដ្ឋាន​និង​នីតិរដ្ឋ​»​។​

​ការអនុម័ត​សេច្តីសំរេចចិត្ត​នេះ​កត់សំគាល់​ឯកភាព​គ្នា​មួយ​នៅ​ក្រុមប្រឹក្សា​សន្តិសុខ ដែល​កំពុង​បែកបាក់​ដោយសារ​សង្គ្រាម​រុស្ស៊ី​នៅ​អ៊ុ​យក្រែន​។​

​អ្នកនាំពាក្យ​របស់​អគ្គ​លេខា​អង្គការសហប្រជាជាតិ​លោក​បាន​និយាយ​នៅ​មុន​ពេល​បោះឆ្នោត​ថា​« ឳ​កាស​ណាមួយ​សំរាប់​ក្រុមប្រឹក្សាសន្តិសុខ​និយាយ​ចេញ​ក្នុង​សម្លេង​ខ្លាំង​និងឯ​ក​ភាព​គ្នា​លើ​បញ្ហា​ណាមួយ​​និង​ជា​ពិសេស​បញ្ហា​មី​យ៉ាន់​ម៉ា នឹង​ត្រូវ​បាន​ការស្វាគមន៍​ខ្លាំងណាស់​»​។​

​អត្ថបទ​នៃ​សេចក្តីសំរេចចិត្ត​នេះ បាន​ទទួល​កាបោះឆ្នោត​គាំទ្រ​១២​សម្លេង ដោយ​ចិន ឥណ្ឌា​និង​រុស្ស៊ី​បោះ​អនុប្បវាទ ។​

ក្រោយការអនុម័ត ​រដ្ឋមន្ត្រីការបរទេស​អាម៉េរិក​លោក អ៊ែន​ថូ​នី ប្លីង​កិន បាន​និយាយថា សេចក្តីសំរេចចិត្ត​នេះ​បាន​«​បញ្ជូន​សារ​រឹងមាំ​»​មួយ​ពី​ពិភពលោកប្រាប់ទៅ​​«​របប​យោធា​ត្រូវតែ​បញ្ចប់​អំពើហិង្សា​របស់​ខ្លួន​នៅ​ទូ​ទាំងប្រ​​ទេស ហើយ​ដោះលែង​អ្នកទោស​។​តែ​នៅពេល​យើង​អបអរ​សេចក្តីសំរេចចិត្ត​នេះ ក្រុមប្រឹក្សា​នៅ​មាន​ការងារ​ច្រើន​ទៀត​ត្រូវធ្វើ​ដើម្បី​ជំរុញអោយមាន​សេចក្តីសំរេចចិត្ត​ត្រឹមត្រូវ​មួយ​ចំពោះ​វិបត្តិ​នេះ​»​។

​លោក​​បាន​អំពាវនាវ​អោយមាន​កិច្ចខិតខំ​បន្ថែមទៀត​ដើម្បី​ស្តារ​លទ្ធិប្រជាធិបតេយ្យ​នៅ​មី​យ៉ាន់​ម៉ា​៕

​សេចក្តីសំរេចចិត្ត​កាល​ពី​ថ្ងៃ​ពុធ​«​ទទូច​សុំ​»​របប​យោធា​អោយ​«​ដោះ​លែង​ជា​បន្ទាន់​អ្នកទោស​ដែល​ត្រូវបាន​ចាប់ឃុំខ្លួន​ទាំង​បំពាន​តាម​អំពើ​ចិត្ត​» រួមមាន​លោកស្រី ស៊ូ​ជី​(ស្តាំ)និង​អតីត​ប្រធានាធិបតី វីន​ ​ម្យី​ន​(ឆ្វេង)