​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ សហរដ្ឋ​អាម៉េរិក​បាន​និយាយ​កាលពី​ថ្ងៃ​ពុធ​ទី​២១​ធ្នូ​ថា ខ្លួន​នឹង​ផ្តល់​ឱ្យ​អ៊ុយ​ក្រែន​នូវ​ប្រព័ន្ធ​ការពារ​ដែ​ន​អាកាស​កម្រិត​ខ្ពស់​ធុន​ភែទ​ធ្រៀ​ត​( Patriot)​ដើម្បី​ជួយ​​ទប់ទល់​នឹង​ការវាយប្រហារ​តាម​អាកាស​ដោយ​ឥតឈប់ឈរ​របស់​រដ្ឋាភិបាល​ក្រុង​មូ​ស្គូ​។​

​ប្រព័ន្ធ​នេះ​គឺជា​ផ្នែក​មួយ​នៃ​ជំនួយ​ផ្នែក​សន្តិសុខ​ចំនួន ១,៨៥ ពាន់​លាន​ដុល្លារ​ដែល​បាន​បង្ហាញ​ស្របគ្នា​ជាមួយនឹង​ដំណើរ​ទស្សនកិច្ច​ទៅ​កាន់​ទីក្រុង​វ៉ាស៊ីនតោន​របស់​ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀ ហ្សេ​លេន​ស្គី ដែល​ជា​ការធ្វើដំណើរ​ក្រៅប្រទេស​លើកដំបូង​របស់​គាត់ ចាប់តាំងពី​រុស្ស៊ី​បាន​ឈ្លានពាន​ក្នុង​ខែកុម្ភៈ​។​

​ការប្រកាស​នេះ​គឺជា​ជ័យជម្នះ​ដ៏​សំខាន់​មួយ​សម្រាប់​រដ្ឋាភិបាល​ក្រុង​គៀវ ដែល​បាន​ជំរុញ​ឱ្យ​រដ្ឋាភិបាល​ក្រុង​វ៉ាស៊ីនតោន​ម្តង​ហើយ​ម្តងទៀត​ផ្តល់​ប្រព័ន្ធ Patriot​និង​ជា​សញ្ញា​ដ៏​រឹងមាំ​នៃ​ការគាំទ្រ​របស់​​សហរដ្ឋ​អាម៉េរិក​សម្រាប់​អ៊ុ​យក្រែន​។​

​រដ្ឋមន្ត្រីការបរទេស​អាម៉េរិក​លោក អ៊ែន​ថូ​នី ប្លីង​កិន បាន​និយាយ​នៅក្នុង​សេចក្តីថ្លែងការណ៍​មួយ​ថា “​ជំនួយ​ថ្ងៃនេះ​រួមបញ្ចូល​ប្រព័ន្ធ​ការពារ​ដែនអាកាស Patriot ជា​លើកដំបូង​ដែល​មាន​សមត្ថភាព​​អាច​ទម្លាក់​មី​ស៊ី​ល​នាំ​ផ្លូវ មី​ស៊ី​ល​ផ្លោង​រយៈ​ចម្ងាយ​ខ្លី និង​យន្តហោះ​នៅ​កម្ពស់​ខ្ពស់​ជាង​ប្រព័ន្ធ​ការពារ​ដែនអាកាស​ដែល​បាន​ផ្តល់​ពី​មុន​”​។

​កញ្ចប់​ជំនួយ​ផ្នែក​សន្តិសុខ​នេះ​មាន​បំពាក់​រថយន្ត​ទ្រទ្រង់​ប្រព័ន្ធ Patriot មួយ ដែល​មាន​មជ្ឈមណ្ឌល​បញ្ជា ស្ថានីយ​រ៉ា​ដា​ដើម្បី​ស្វែងរក​ការគំរាមកំហែង​ដែល​ហោះ​ចូលមក​និង​ឧបករណ៍​ជ្រើង​ទ​ម្រ​បាញ់​មី​​ស៊ី​ល​។​កញ្ចប់​នេះ​ក៏​រួម​បញ្ចូល​ទាំង​កាំភ្លើង​ធំ គ្រាប់​រ៉ុក្កែត និង​រថក្រោះ​រាប់ម៉ឺន​គ្រាប់ ប្រព័ន្ធ​កាំភ្លើងត្បាល់ ឧបករណ៍​បាញ់​គ្រាប់បែកដៃ និង គ្រឿង​សឹក​ជាច្រើន​ទៀត​ផង​ដែរ​។​

​ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀ ហ្សេ​លេន​ស្គី បាន​សាទរ​ចំពោះ​សេចក្តី​ប្រកាស​អំពី​ប្រព័ន្ធ Patriot​នេះ ដោយ​និយាយថា ប្រព័ន្ធ​នេះ “​នឹង​ពង្រឹង​ការការពារ​ដែនអាកាស​របស់​យើង​យ៉ាងខ្លាំង​”​។​

​លោក​បាន​ប្រាប់​អ្នកកាសែត​តាមរយៈ​អ្នកបកប្រែ​ក្នុង​សន្និសីទ​កាសែត​ជា​មួយ​លោក​ប្រធានាធិបតី ចូ បៃ​ដិន នៅ​សេត​វិមាន​ថា “​នេះ​គឺជា​ជំហាន​ដ៏​សំខាន់​មួយ​ដើម្បី​បង្កើត​លំហ​អាកាស​សុវត្ថិភាព​សម្រាប់​អ៊ុ​យក្រែន​”​។​

​ខែល​ការពារ​ដែនអាកាស​រប​ស់អ៊ុយ​ក្រែន​បាន​ដើរតួនាទី​យ៉ាង​សំខាន់​ក្នុង​ការកា​រពារ​ប្រទេស​ពី​ការវាយប្រហារ និង​រារាំង​កងកម្លាំង​របស់​ទីក្រុង​មូ​ស្គូ​ពី​ការគ្រប់គ្រង​លើ​ផ្ទៃមេឃ​។​

​ប៉ុន្តែ​ខណៈ​រុស្ស៊ី​ប្រឈមមុខ​នឹង​បរាជ័យ​កាន់តែ​ខ្លាំង​ឡើង រុស្ស៊ី​បានចាប់ផ្ដើម​កំណត់​គោលដៅ​ជា​ប្រព័ន្ធ​លើ​ហេដ្ឋារចនាសម្ព័ន្ធ​សំខាន់ៗ​ក្នុងប្រទេស​អ៊ុយ​ក្រែន​ក្នុង​ការវាយប្រហារ​នានា ដែល​បាន​រំខាន​ដល់​អគ្គិសនី ទឹក និង​កម្តៅ​ដល់​មនុស្ស​រាប់លាន​នាក់​៕

ប្រព័ន្ធ​ការពារ​ដែនអាកាស Patriot​របស់​អាម៉េរិក