​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ ប៉ុន្មាន​ខែ​បន្ទាប់​ពី​ទីក្រុង​សៀង​ហៃ​ស៊ូទ្រាំ​ជាមួយនឹង​ការបិទ​ខ្ទប់​យ៉ាង​តឹងរ៉ឹង​ដើម្បី​បញ្ឈប់​ការរីក​រាលដាល​នៃ​កូវី​ដ​១៩​ឥឡូវ​មេរោគ​នេះ​កំពុង​ចាប់ផ្តើម​ឆ្លង​រាល​​ដាល​ដល់​មនុស្ស​២៥​លាន​នាក់​ក្នុង​ទីក្រុង​ដ៏​ធំ​មួយ​នេះ​ដោយ​គ្មាន​វិធានការ​គ្រប់គ្រង​តឹងរឹង​ដូច​មុន​។​

​មន្ទីរពេទ្យ​នានា​កំពុង​តស៊ូ​ទប់ទល់​នឹង​ជំនន់​អ្នក​ឆ្លង​ជំងឺ ឱសថស្ថាន​នានា​ពុំ​មាន​ថ្នាំ​លក់​ឱ្យ​អតិថិជន អាជីវកម្ម​នានា​ត្រូវ​បិទទ្វារ​ដោយសារតែ​បុគ្គលិក​ឈឺ សាលារៀន​ភាគច្រើន​បាន​បិទ​ហើយ​ការប្រើប្រាស់​​ការដឹកជញ្ជូន​សាធារណៈ​បាន​ធ្លាក់ចុះ​។​

​នៅ​មន្ទីរពេទ្យ​តុង​រេ​ន (Tongren)​ជា​មន្ទីរពេទ្យ​សាធារណៈ​ដ៏​ធំ​បំផុត​របស់​ទីក្រុង​សៀង​ហៃ​ក្រុមគ្រូពេទ្យ​នៅ​ក្នុង​អង្គភាព​សង្គ្រោះបន្ទាន់​កំពុង​ប្រើប្រាស់​ច្រកចូល​អគារ​ដើម្បី​ដោះស្រាយ​ជំនន់​អ្នកជំងឺ​ធ្ងន់​​ធ្ង​រកា​លពី​ថ្ងៃ​ពុធ​ទី​២១​ធ្នូ​។​

​នៅ​ខាងក្រៅ​គ្លីនិក​ព្យាបាល​គ្រុនក្តៅ​មួយ មនុស្ស​ឈឺ​ជាច្រើន​នាក់​ត្រូវ​ស៊ូទ្រាំ​រង់ចាំ​ទិញ​ថ្នាំ​ទាំង​ត្រជាក់​ញ័រញាក់​។ ឱសថស្ថាន​ជាច្រើន​នៅ​ជិត​មន្ទីរពេទ្យ​មិន​អនុញ្ញាត​ឱ្យ​មនុស្ស​ចូល​ទិញ​ថ្នាំ​ទៀត​ទេ​ដោយ​និ​​យាយ​ថា ពួកគេ​បាន​អស់​ថ្នាំ​ផ្តាសាយ​និង​គ្រុនក្តៅ​ហើយ​។​

​បុគ្គលិក​ថែទាំ​សុខភាព​បាន​ពណ៌នា​អំពី​ស្ថានភាព​កាន់តែ​ធ្ងន់ធ្ងរ​នៃ​អ្នកជំងឺ​និង​បុគ្គលិក​ជា​ច្រើន​ធ្លាក់ខ្លួន​ឈឺ​។ ករណី​ឆ្លង​ក៏​បាន​កើនឡើង​ផង​ដែរ​បន្ទាប់​ពី​ទីក្រុង​នេះ​បាន​បញ្ឈប់​ការតម្រូវ​ឱ្យ​មនុស្ស​​បង្ហាញ​លទ្ធផល​តេស្តិ៍ PCR អវិជ្ជមាន​មុនពេល​ចូល​មន្ទីរពេទ្យ​។​

​ដា​នី​យ៉ែល ជា​បុគ្គលិក​ពេទ្យ​នៅ​មន្ទីរពេទ្យ​សាធារណៈ​នេះ បាន​និយាយថា ទីក្រុង​មិន​បាន​ត្រៀម​ខ្លួន​ល្អ​ទេ​សម្រាប់​សេណា​រី​យ៉ូ​ធ្ងន់ធ្ងរ​បែប​នេះ​។​

​វេជ្ជបណ្ឌិត​នៅ​មន្ទីរពេទ្យ​ឯកជន​មួយ​ក្នុង​ទីក្រុង​សៀង​ហៃ ដែល​បាន​ប្រាប់​សារព័ត៌មាន​Bloomberg News​កាល​ពី​មួយ​សប្តាហ៍​មុន​ថា​អ្វីៗ​មាន​ភាពស្ងប់ស្ងាត់​នោះ បាន​និយាយ​ថា​ទស្សនវិស័យ​កាន់​​តែ​អាក្រក់​ទៅៗ​។ លោក​បាន​និយាយថា “​ទីក្រុង​សៀង​ហៃ​កំពុង​ចាប់ផ្តើម​មើល​ទៅ​ដូច​ទីក្រុង​ប៉េកាំង​យ៉ាងខ្លាំង​ទាក់ទង​នឹង​ករណី​ឆ្លង​”​។​

​រដ្ឋធានី​របស់​ចិន​បាន​រង​ការវាយប្រហារ​ខ្លាំង​ដំបូង​គេ ខណៈ​ចិន​បាន​ងាក​ចេញ​ភ្លាមៗ​ពី​គោលនយោបាយ​កូវី​ដ​សូន្យ​ដ៏​តឹងរ៉ឹង​របស់​ខ្លួន​ដើម្បី​អនុញ្ញាត​ឱ្យ​មនុស្ស​ដើរហើរ​សេរី​ដោយ​មិន​ចាំបាច់​ពិនិត្យ​​មើល​មេរោគ ក្រោយ​ផ្ទុះ​ការប្រឆាំង​តវ៉ា​នឹង​ការអនុវត្ត​វិធា​ការគ្រប់គ្រង​កូវី​ដ​ដ៏​តឹងតែង​៕
​អ្នកជំងឺ​ធ្ងន់​កំពុង​ចាល់​តាម​មន្ទីរពេទ្យ​នានា​នៅ​សៀង​ហៃ

អាជីវកម្ម​នានា​ត្រូវ​បិទទ្វារ​ដោយសារតែ​បុគ្គលិក​ឈឺ សាលារៀន​ភាគច្រើន​បាន​បិទ​ហើយ​ការប្រើប្រាស់​​ការដឹកជញ្ជូន​សាធារណៈ​បាន​ធ្លាក់ចុះ​