លោក អ៊ិត​សុធា ប្រមូលទិញសត្វស្លាប ដែលអ្នកប្រមាញ់ ទាក់យកមកលក់ តាមដងផ្លូវជាតិលេខ៥ ដើម្បីលែងវិញ

ដោយៈ ទេពកង្រី / កំពង់ឆ្នាំងៈ​ លោក អុិត​សុធា ព្រះរាជអាជ្ញាអមសាលាដំបូង ខេត្តកំពង់ឆ្នាំង បានប្រមូលទិញសត្វស្លាប ជាច្រើន ដែលអ្នកប្រមាញ់ ដើរទាក់ចាប់យក មកដាក់លក់ តាមដងផ្លូវជាតិលេខ៥ ដើម្បីលែងសត្វទាំងនោះ ឱ្យទៅរស់នៅ​តំបន់ ព្រៃធម្មជាតិវិញ ក្នុងគោលបំណងចូលរួមអភិរក្សសត្វស្លាប ដើម្បីបរិស្ថានធម្មជាតិ និងលើកស្ទួយវិស័យទេសចរណ៍។

នៅក្នុងឱកាសលែងសត្វ ឱ្យទៅរស់នៅ​តំបន់ព្រៃធម្មជាតិ បឹងសម្រែក​ស្ថិតនៅក្នុងភូមិ ដំបូកកកោះ ឃុំក្រាំងដីមាស ស្រុករលាប្អៀរ នៅព្រឹកថ្ងៃទី២២​ ខែធ្នូ ឆ្នាំ២០២២​ នេះ លោក អុិត សុធា​ បានឱ្យដឹងថាៈ សត្វស្លាបដែលបានយកមកលែង ឲ្យរស់នៅមាន សេរីភាព តាមតំបន់ព្រៃបឹងធម្មជាតិ នៅពេលនេះ​ មានចំនួន ៤ ប្រភេទ មានសត្វត្លុម សត្វដុំដោល មាន់ទឹក​ និងសត្វកុក​ដែលមានចំនួនប្រមាណ ២០០ ក្បាល។ ការទិញ សត្វយកមកលែងវិញនេះ​ ដោយសារតែសេចក្តីអាណិតអាសូរ ចំពោះសត្វស្លាបទាំង នោះ ដែលប្រទះឃេីញគេដាក់លក់​និងចង់ធ្វើការអប់រំ ឲ្យប្រជាពលរដ្ឋ រស់នៅតាម ជនបទ ដែលមិនបានយល់ដឹង ស្តីពីច្បាប់ ដេីរទាក់សត្វព្រៃ យកមកលក់ ដេីម្បីដោះស្រាយជីវភាពរស់នៅប្រចាំថ្ងៃ ។

លោក អុិត សុធា បានចំណាយថវិកាផ្ទាល់ខ្លួន ទិញពីអ្នកលក់សត្វ​នៅកំណាត់ផ្លូវជាតិ លេខ៥ នៅម្តុំភូមិទឹកហូត និងបាននាំយកមកលែង​ដេីម្បីឲ្យសត្វទាំងនោះ ទៅរស់នៅ តាមបឹងធម្មជាតិ និងដើម្បីបន្តពូជ ។

លោកព្រះរាជអាជ្ញា បានឱ្យដឹងបន្ថែមថាៈ​ ការដោះលែងសត្វស្លាបទាំងអស់នេះ ក្នុងគោលបំណងចូលរួមអភិរក្សសត្វស្លាប ឲ្យបាន កេីនឡេីងក្នុងតំបន់ព្រៃ បឹងធម្មជាតិ​នៃខេត្តកំពង់ឆ្នាំង​ដែលជាកត្តាមួយ អាចជួយទាក់ទាញភ្ញៀវទេសចរជាតិ និងអន្តរជាតិ ចូលមកលេងកម្សាន្ត​ទស្សនាសត្វស្លាប តាមដងទន្លេ និងបឹងធម្មជាតិ ដោយការចូលមក ទស្សនាសត្វស្លាប ហើយអាចផ្តល់នូវ មធ្យោបាយការពារ ប្រកបដោយចីរភាព ក្នុងសកម្មភាពបែបនេះ ប្រែក្លាយទៅជាឱកាសវិស័យអាជីវកម្ម ពិតប្រាកដមួយ សម្រាប់ការពង្រីកលើ វិស័យទេសចរណ៍ធម្មជាតិ នៅក្នុងភូមិសាស្ត្រខេត្ត ក៏ដូចជានៅក្នុងប្រទេស គ្រាដែលកំពុងអភិវឌ្ឍន៍។ អាជីវកម្មដែលរួមបញ្ចូលការការពារសត្វស្លាបនានា កាន់បង្កើនការទាក់ទាញ ភ្ញៀវទេសចរក្នុងតំបន់ និងអន្តរជាតិ ដែលចាប់អារម្មណ៍បញ្ហាបរិស្ថាន និងអេកូឡូស៊ី​ ស្របនឹងកត្តាភមិសាស្ត្រទឹកដី តាមមាត់ទន្លេ ខេត្តកំពង់ឆ្នាំង អំណោយផលដល់ វិស័យទេសចរណ៍យ៉ាងខ្លាំង​ ដោយហេតុតែទីតាំង ដែលបានលែងសត្វស្លាបទាំងនោះ​ មានបឹងធម្មជាតិ​ តែងតែមានសត្វស្លាប ចុះនិងរស់នៅជាប្រចាំ ហើយមានការគ្រប់គ្រង ល្អ ពីសមត្ថកិច្ច​និងអាជ្ញាធរមូលដ្ឋាន មានលក្ខណៈសម្បត្តិសមស្រប សម្រាប់ការលែង សត្វស្លាបទាំងអស់នេះ ហើយអាចនឹងបង្កើតភាពទាក់ទាញ ខាងផ្នែកទេសចរណ៍ សម្រាប់អ្នកស្រឡាញ់សត្វស្លាប នាពេលអនាគត ផងដែរ ។​

ក្នុងឱកាសនោះដែរ លោកបានអំពាវនាវ ដល់ប្រជាពលរដ្ឋទាំងអស់ បញ្ឈប់ការដាក់ អន្ទាក់ចាប់សត្វព្រៃ​ សត្វស្លាបគ្រប់ប្រភេទ​ដែលច្បាប់បានហាមឃាត់​ព្រោះសត្វស្លាប ជាប្រភពដ៏មានសារៈសំខាន់ សម្រាប់ភពដែនដី ក្នុងការរក្សាលំនឹង ហើយវាបានធ្វើ ឱ្យយើងដឹងពីការប្រែប្រួល នូវប្រព័ន្ធអេកូឡូស៊ី និងជីវៈចម្រុះ នៅក្នុងតំបន់ណាមួយ​ ដូច្នេះអ្នកជំនាញងាយស្រួល មានវិធានការទប់ស្កាត់ជាមុន​និងបញ្ឈប់ការកាប់បំផ្លាញ ព្រៃលិចទឹក ដែលជាជម្រកសត្វគ្រប់ប្រភេទ​និងជាបរិស្ថានធម្មជាតិ​ដែលជាហេតុនាំឲ្យ មានទោសទណ្ឌ​និងបាត់បង់ផលប្រយោជន៍ ដល់សង្គមជាតិ ក្រុមគ្រួសារខ្លួនឯង​ ។

សូមបញ្ជាក់ថា នេះជាលើកទីពីរហើយ គ្រាដែលសត្វស្លាប ចំនួនប្រមាណជា ៣០០ក្បាល ត្រូវបានទិញនាំយកមកលែង ឱ្យមានសេរីភាព រស់នៅក្នុងព្រៃបឹងធម្មជាតិ វិញ៕/V/R