​ដោយៈ ជា សីហៈ​/​ភ្នំពេញៈ នៅ​ថ្ងៃទី ២២ ខែ ធ្នូ ឆ្នាំ​២០២២ នេះ ធនាគារអភិវឌ្ឍន៍អាស៊ី (ADB) និង ក្រសួង​សេដ្ឋកិច្ច​និង​ហិរញ្ញវត្ថុ​កម្ពុជា បាន​ចុះហត្ថលេខា​លើ​កិច្ចព្រមព្រៀង​ប្រាក់កម្ចី និង ជំនួយ ឥត​សំណង សម្រាប់​គម្រោង​ចំនួន​ប្រាំមួយ ដែលមាន​តម្លៃ​សរុប ៣៦១,៤ លាន​ដុល្លារ ដែល​នាំ​ឲ្យ​ប្រាក់កម្ចី​និង​ជំនួយឥតសំណង​ដែល​កម្ពុជា​និង​ស្ថាប័នហិរញ្ញវត្ថុ​អាស៊ី​នេះ​បាន​ចុះ​កិច្ចព្រមព្រៀង​ក្នុង​ឆ្នាំ​២០២២​មាន​ទឹកប្រាក់​ដល់​ទៅ​៥៧៦,៣ លាន​ដុល្លារ ដែល​ក្នុងនោះ ១៦៣,៧ លាន​ដុល្លារ​ជា​សហ​ហិរញ្ញប្បទាន​ពី​ដៃគូ​អភិវឌ្ឍន៍​ផ្សេងទៀត​។

​លោក អូន ព័ន្ធមុនីរ័ត្ន ឧបនាយករដ្ឋមន្ត្រី និង​ជា​រដ្ឋមន្ត្រីក្រសួង​សេដ្ឋកិច្ច និង​ហិរញ្ញវត្ថុ កម្ពុជា និង នាយិកា​ធនាគារអភិវឌ្ឍន៍អាស៊ី​ប្រចាំ​ប្រទេស​កម្ពុជា លោកស្រី យុ​ត​សា​ណា វ៉ា​ម៉ា (Jyotsana Varma) បាន​ចុះហត្ថលេខា​លើ​កិច្ចព្រមព្រៀង​នេះ​នៅក្នុង​ពិធី​ផ្លូវការ​មួយ​នៅ​រាជធានី​ភ្នំពេញ​។​

​លោកស្រី មានប្រសាសន៍ថា «​គម្រោង​ទាំង​ប្រាំមួយ​ដែល​បាន​ចុះហត្ថលេខា​ថ្ងៃនេះ នឹង​គាំទ្រ​ដល់​អាទិភាព​នានា ក្នុងការ​អភិវឌ្ឍ​សេដ្ឋកិច្ចសង្គម​របស់​ប្រទេស​កម្ពុជា ស្របតាម​យុទ្ធសាស្ត្រ​ចតុកោណ ដំណាក់កាល​ទី​៤ របស់​រាជរដ្ឋាភិបាល​។ គម្រោង​ទាំងនេះ​នឹង​គាំទ្រ​ប្រព័ន្ធ​សុខាភិបាល និង​ការអប់រំ​របស់​កម្ពុជា​ក្នុងការ​ពង្រឹង​ធនធានមនុស្ស ឆ្លើយតប​នឹង​ការប្រែប្រួល​អាកាសធាតុ តាមរយៈ​ដំណោះស្រាយ​កាត់បន្ថយ និង​បន្សាំ ព្រមទាំង​លើកកម្ពស់​សមត្ថភាព​ប្រកួតប្រជែង​របស់​ប្រទេស​។​»

​គម្រោង​វិទ្យាសាស្ត្រ និង​បច្ចេកវិទ្យា​ក្នុងការ​អប់រំ​មធ្យមសិក្សា​ទុតិយភូមិ ដែលមាន​ទឹកប្រាក់​៧០ លាន​ដុល្លារ នឹង​ជួយ​កម្ពុជា​អភិវឌ្ឍ​ធនធានមនុស្ស​ប្រកបដោយ​គុណភាព​ខ្ពស់ ជាពិសេស​ក្នុង​វិស័យ STEM ខណៈដែល​ប្រទេស​ប្រាថ្នា​ចង់​ប្រែក្លាយ​ខ្លួន​ទៅជា​សេដ្ឋកិច្ច​ដែល​ជំរុញ​ដោយ​បច្ចេកវិទ្យា ជាមួយនិង​ចំណេះ ដឹង​ជា​មូលដ្ឋាន​។ គម្រោង​នេះ​មាន​គោលបំណង​បង្កើន​ប្រសិទ្ធភាព​ការអប់រំ​កម្រិត​មធ្យមសិក្សា​ទុតិយភូមិ និង សំដៅ​ជំរុញឱ្យមាន​ការចុះឈ្មោះ​ចូលរៀន​ខ្ពស់​នៅក្នុង​សាលា​ជំនាន់​ថ្មី ជាពិសេស​ក្នុងចំណោម​កុមារី​។​

​គម្រោង​សុខភាព​តំបន់​ព្រំដែន​នៃ​មហា​អនុតំបន់​មេគង្គ​(GMS)​កម្ពុជា ដែលមាន​ទឹកប្រាក់ ៣២,៥ លាន​ដុល្លារ នឹង​ពង្រីក​សេវា​សុខភាព​ឱ្យបាន​ដល់​ពលករ​ចំណាកស្រុក​ជាច្រើន​ពាន់​នាក់​ដែល​ងាយ​រងគ្រោះ នឹង​ហានិភ័យ​សុខភាព​ទូទៅ និង​សម្រាប់​ប្រជាពលរដ្ឋ​នៅតាម​តំបន់​ព្រំដែន​។ ហើយ​គម្រោង​នេះ​ក៏​នឹងធ្វើ ការសាកល្បង​គម្រោង​ធានារ៉ាប់រង​សុខភាព​ដែលមាន​តម្លៃ​ទាប សម្រាប់​ពលករ​ចំណាកស្រុក និង ពង្រឹង ការប្រើប្រាស់​សេវា​សុខាភិបាល​ក្នុងចំណោម​អ្នកជំងឺ​ដែល​មិនត្រូវ​សម្រាក​ពេទ្យ នៅ​មន្ទីរពេទ្យបង្អែក​ប៉ោយប៉ែត​ផងដែរ​។​

​កម្មវិធី​អភិវឌ្ឍន៍​តាម​វិស័យ​សម្រាប់​អន្តរ​កម្ម​ថាមពល​ដែលមាន​ទឹកប្រាក់ ៧៣ លាន​ដុល្លារ​មាន​រួមបញ្ចូល​នូវ​កំណែទម្រង់​គោលនយោបាយ និង​ការវិនិយោគ​គម្រោង ដែល​នឹង​គាំទ្រ​គ្នា​ទៅវិញទៅមក​ដើម្បី​បង្កើន​ផលចំណេញ និង​ត្រួស​ត្រាយផ្លូវ​សម្រាប់​ការវិនិយោគ​ពី​វិស័យ​សាធារណៈ​និង​ឯកជន​ក្នុង​បច្ចេកវិទ្យា​ថ្មី​សំខាន់ៗ​ដូចជា​ប្រសិទ្ធភាព​ថាមពល​និង​ថ្ម​ផ្ទុក​។ កម្មវិធី​នេះ​ក៏​នឹង​កំណត់​គោលដៅ​ថាមពល​ស្អាត​សម្រាប់​ប្រទេស និង​រួមបញ្ចូល​ផែនការអភិវឌ្ឍន៍​ថាមពល​និង​ប្រើប្រាស់​ថាមពល​ប្រសើរ​ជាង​មុន​ទៅក្នុង​វិស័យ​នានា រួមទាំង​ហេដ្ឋារចនាសម្ព័ន្ធ​ចម្បងៗ​ដែល​ធន់​នឹង​អាកាសធាតុ​ផងដែរ​។​

​កម្មវិធី​ពាណិជ្ជកម្ម និង​សមត្ថភាព​ប្រកួតប្រជែង​ដែលមាន​ទឹកប្រាក់ ៥០ លាន​ដុល្លារ​នឹង​គាំទ្រ​ដល់​កិច្ចខិតខំ​ប្រឹងប្រែង​រប​ស់រាជ​រដ្ឋាភិបាល​ក្នុង​ការស្តារ​សេដ្ឋកិច្ច​ក្រោយ​ជំងឺ​រាតត្បាត​នៅ​កម្ពុជា ដើម្បី​ធ្វើកំណែទម្រង់​ការវិនិយោគ និង​បរិយាកាស​ធុរកិច្ច ជំរុញ​កំណើន​សហគ្រាស​ខ្នាតតូច និង​មធ្យម និង​កែលម្អ​គោលនយោបាយ​ពាណិជ្ជកម្ម និង​កិច្ច​សម្រួល​ពាណិជ្ជកម្ម​។ កម្មវិធី​នេះ​នឹង​គាំទ្រ​សហគ្រាស​ខ្នាតតូច និង​មធ្យម​ថ្មី​ចំនួន ៥0.000 ដើម្បី​ចុះបញ្ជី​ពាណិជ្ជកម្ម​តាម​ប្រព័ន្ធ​ស្វ័យប្រវត្តិកម្ម​។​

​គម្រោង​កែលម្អ​សុខភាព និង​ខ្សែសង្វាក់​តម្លៃ​បសុសត្វ​ឆ្លង​ព្រំដែន​ក្នុង​មហា​អនុតំបន់​មេគង្គ​(GMS)​ដែលមាន​ទឹកប្រាក់ ៦២,៩ លាន​ដុល្លារ នឹង​ជួយ​លើកកម្ពស់​ផលិតកម្ម​បសុសត្វ​ប្រកបដោយ​អាកាសធាតុ ឆ្លាត​វៃ និង កែលម្អ​និរន្តរភាព​ខ្សែសង្វាក់​តម្លៃ​បសុសត្វ​។ គម្រោង​នេះ​មាន​គោលដៅ​បង្កើន​ពាណិជ្ជកម្ម ផ្លូវការ​ក្នុង​តំបន់​សម្រាប់​ផលិតផល​បសុសត្វ​និង​បសុសត្វ ជាមួយ​ប្រទេសជិតខាង​។​

​គម្រោង​ជលផល​ឆ្នេរ​និង​សមុទ្រ​ប្រកបដោយ​និរន្តរភាព​ដែលមាន​ទឹកប្រាក់ ៧៣ លាន​ដុល្លារ​សំដៅលើ​ខេត្ត​ជាប់មាត់​សមុទ្រ​ចំនួន​៤​ក្នុងប្រទេស​កម្ពុជា ដើម្បី​ទប់ទល់​នឹង​ការធ្លាក់ចុះ​យ៉ាងគំហុក នៃ​វិស័យ​ជលផល លើកកម្ពស់​ការចិញ្ចឹម​ជលផល​សមុទ្រ​ប្រកបដោយ​និរន្តរភាព និង​កែលម្អ​ទីតាំង​ប្រមូល​ទុក​ផល នេសាទ ដើម្បី​ធ្វើឱ្យ​ប្រសើរឡើង​នូវ​សុវត្ថិភាព​អាហារ​សមុទ្រ​។ គម្រោង​នេះ​ត្រូវបាន​គេ​រំពឹងថា​នឹង​បង្កើត​ឡើងវិញ​នូវ​ជលផល​ក្បែរ​ឆ្នេរសមុទ្រ​ប្រមាណ ៤0% ទៅជា​សហគ្រាស​ប្រកបដោយ​ផលិតភាព និង និរន្តរភាព និង​បង្កើន​ប្រាក់ចំណូល​សម្រាប់​សមាជិក​សហគមន៍​ឆ្នេរសមុទ្រ​ប្រហែល ២00.000 នាក់​៕.mara