​ប្រែ​សម្រួល : កញ្ញា​ដា​លី​ស (​ប៊ី​ប៊ីស៊ី​) ៖ ស្តេចត្រាញ់​គ្រឿងញៀន ដែល​គេ​តាម​ចាប់ខ្លួន​បំផុត​នៅ​អាស៊ី ត្រូវបាន​ធ្វើ​បត្យាប័ន​ទៅ​អូស្ត្រាលី​ជា​កន្លែង​ដែល​រូបគេ​ប្រឈមមុខ​នឹង​ការចោទប្រកាន់​និង​​ការ​ជាប់ពន្ធនាគារ​អស់​មួយ​ជីវិត​។​

​សែ ឈី ឡប់ (Tse Chi Lop) ត្រូវបាន​ចោទប្រកាន់​ពី​បទ​ដឹកនាំ​ប្រតិបត្តិការ​គ្រឿងញៀន​តម្លៃ​រាប់​ពាន់​លាន​ដុល្លារ​លើ​ប្រទេស​មួយចំនួន​ក្នុង​តំបន់​អាស៊ី​ប៉ាស៊ីហ្វិក រាប់​ចាប់ពី​ជប៉ុន​រហូត​ដល់​នូវែ​លសេ​ឡង់​។​

​មានឈ្មោះ​ល្បី​នៅ​អាស៊ី​រហូតដល់​ថ្នាក់​គេ​ប្រៀបធៀប​ជា​យូរ​មក​ហើយ​ទៅ​នឹង​ស្តេចត្រាញ់​គ្រឿងញៀន​ម៉ិក​ស៊ិក អែល ឆា​ប៉ូ (El Chapo)​រូបគេ​ត្រូវ​បាន​ចាប់ខ្លួន​នៅ​អាកាសយានដ្ឋាន​ហូ​ឡង់​កាលពី​ឆ្នាំ​​មុន​ដោយ​ប៉ូលិស​អន្តរជាតិ (Interpol)​។​

​បន្ទាប់​ពី​ការតស៊ូ​ផ្លូវច្បាប់​ជិត​ពីរ​ឆ្នាំ ទីបំផុត​រូបគេ​ត្រូវបាន​ធ្វើ​បត្យាប័ន​នៅ​ថ្ងៃ​ព្រហស្បតិ៍​ទី​២២​ធ្នូ​នេះ​។​

​ប៉ូលិស​អូស្ត្រាលី​បាន​បញ្ចេញ​រូបភាព​មន្ត្រី​ប្រដាប់អាវុធ​នាំ​រូប​គេ​ចុះ​ពី​យន្តហោះ​នៅ​អាកាសយានដ្ឋាន​មែ​ល​ប៊​ន​ដោយ​ដៃ​ជាប់​ខ្នោះ​។ រូប​គេ​នឹង​ត្រូវ​ប្រឈមមុខ​នឹង​តុលាការ​ក្នុងស្រុក​នៅ​ថ្ងៃ​ព្រហស្បតិ៍​នេះ​។​

​បុរស​អាយុ ៥៩ ឆ្នាំ​រូប​នេះ​ត្រូវបាន​ចោទប្រកាន់​ថា​ជា​ប្រធាន​ក្រុម​ជួញដូរ​គ្រឿងញៀន​ដ៏​ធំ​បំផុត​មួយ​របស់​ពិភពលោក ដែល​មាន​តម្លៃ​រាប់​ពាន់​លាន​ដុល្លារ​។​

​ក្រុម​ជួញដូរ​គ្រឿងញៀន ដែល​គេ​ស្គាល់​ថា Sam Gor Syndicate បាន​គ្រប់គ្រង​ទីផ្សារ​គ្រឿងញៀន​ខុសច្បាប់​នៅ​ទូទាំង​ទ្វីប​អាស៊ី​។ ប៉ូលិស​អូស្ត្រាលី​បាន​ប៉ាន់ស្មាន​ថា ក្រុម​នេះ​មាន​ទំនួល​ខុស​ត្រូវ​ដល់​ទៅ ៧០ ភាគរយ​នៃ​គ្រឿងញៀន​ដែល​ហូរ​ចូល​អូស្ត្រាលី​តែឯង​។​

​ប៉ូលិស​និយាយថា ក្រុម​នេះ​បាន​រត់ពន្ធ​គ្រឿង​ញៀន​ក្នុង​បរិមាណ​ដ៏​ច្រើន ជាពិសេស​មេតំ​ហ្វេ​តា​មីន ហេ​រ៉ូ​អ៊ីន និង​កេតា​មីន ចូល​ប្រទេស​បន្លំ​ក្នុង​កញ្ចប់​តែ​។​

​ទំហំ​នៃ​ក្រុម​ជួយ​ដូរ​គ្រឿងញឿន​របស់​គេ​គឺ​ជា​មូលហេតុ​ដែល​រូបគេ​ត្រូវ​បាន​ប្រៀបធៀប​ទៅ​នឹង​ស្តេចត្រាញ់​គ្រឿងញៀន​ម៉ិក​ស៊ិក ចាវ​គីម “​អែល ឆា​ប៉ូ​” គូ​ស្មាន់ (Joaquin “El Chapo” Guzman)៕

សែ ឈី ឡប់ ត្រូវបាន​បញ្ជូន​ដល់​អូស្ត្រាលី​នៅ​ព្រឹក​ថ្ងៃ​ព្រហស្បតិ៍​នេះ