​ប្រែ​សម្រួល : កញ្ញា​ដា​លី​ស (​ស៊ីនហួ​) ៖ ទីប្រឹក្សា​រដ្ឋ​និង​ជា​រដ្ឋមន្ត្រី​ការបរទេស​ចិន​លោក វ៉ាង យី និង រដ្ឋមន្ត្រីការបរទេស​អូស្ត្រាលី លោកស្រី ផេននី វ៉ុង (Penny Wong)​បាន​បើក​កិច្ចសន្ទនា​យុទ្ធសាស្ត្រ​​និង​កិច្ចការបរទេស​ចិន​-​អូស្ត្រាលី​លើក​ទី​ប្រាំមួយ​នៅ​ទីក្រុង​ប៉េកាំង​កាលពី​ថ្ងៃ​ពុធ​ទី​២១​ធ្នូ​។​

​លោក​វ៉ាង ជា​សមាជិក​នៃ​ការិយាល័យ​នយោបាយ​នៃ​គណៈកម្មាធិការ​មជ្ឈិមបក្ស​កុម្មុយនីស្ត​ចិន បាន​កត់សម្គាល់​ថា ដំណើរ​ទស្សនកិច្ច​របស់​លោកស្រី វ៉ុង​ធ្វើឡើង​ស្របពេល​ជាមួយ​ខួប​លើក​ទី ៥០ នៃ​ការបង្កើត​ទំនាក់ទំនង​ការទូត​រវាង​ប្រទេស​ទាំង​ពីរ និង​មាន​អត្ថន័យ​ជា​និមិត្តរូប​។​

​លោក​បាន​និយាយថា ប្រទេស​ចិន​និង​អូស្ត្រាលី​មិន​មាន​ការ​ថ្នាំងថ្នាក់​ជា​ប្រវត្តិសាស្ត្រ​ឬ​ជម្លោះ​ផលប្រយោជន៍​នោះទេ ដោយ​បន្ថែម​ថា​ភាគី​ទាំងពីរ​គួរតែ​និង​អាចជា​ដៃគូ​សហប្រតិបត្តិការ​ដែល​ត្រូវការ​គ្នា​​ទៅវិញទៅមក​។​

​លោក​វ៉ាង​បាន​និយាយថា ការរក្សា​ការអភិវឌ្ឍ​ប្រកប​ដោយ​សុខភាព​ល្អ​និង​ស្ថិរភាព​នៃ​ភាព​ជា​ដៃគូ​យុទ្ធសាស្ត្រ​គ្រប់​ជ្រុងជ្រោយ​រវាង​ចិន​-​អូស្ត្រាលី​បម្រើ​យ៉ាង​ពេញលេញ​នូវ​ផលប្រយោជន៍​ជា​មូលដ្ឋាន​របស់​​ប្រជាជន​ទាំង​ពីរ ហើយ​ក៏​អំណោយផល​ដល់​ការលើកកម្ពស់​សន្តិភាព​និង​ការអភិវឌ្ឍ​នៅក្នុង​តំបន់​អាស៊ី​ប៉ាស៊ីហ្វិក​និង​ពិភពលោក​ផងដែរ​។​

​លោក​វ៉ាង​បាន​និយាយថា ចិន​កោតសរសើរ​ចំពោះ​ឆន្ទៈ​របស់​រដ្ឋាភិបាល​អូស្ត្រាលី​ថ្មី​ក្នុងការ​ធ្វើ​ឱ្យ​ប្រសើរ​ឡើង​និង​អភិវឌ្ឍ​ទំនាក់ទំនង​ទ្វេភាគី ដោយ​បន្ថែម​ថា ភាគី​ទាំងពីរ​គួរតែ​រួមគ្នា​អនុវត្ត​ការឯកភាព​ដ៏​សំខាន់ ដែល​ធ្វើឡើង​ដោយ​មេដឹកនាំ​នៃ​ប្រទេស​ទាំង​ពីរ ដើម្បី​សម្រេចបាន​គោលដៅ​នេះ​។​

​លោក​វ៉ាង​បាន​និយាយថា ភាគី​ទាំងពីរ​គួរតែ​គោរព​តាម​ការប្តេជ្ញា​ចិត្ត​ដែល​បាន​ធ្វើឡើង​នៅពេល​បង្កើត​ទំនាក់ទំនង​ការទូត ប្រកាន់ខ្ជាប់​នូវ​ការយោគយល់​គ្នា​ត្រឹមត្រូវ និង ធ្វើ​តាម​វិធី​ចាស់ទុំ​ក្នុង​ការរួមរស់​ជាមួយគ្នា​និង​រក្សា​ស្ថិរភាព​គោលនយោបាយ​។​

​លោក​បាន​និយាយថា ចិន​និង​អូស្ត្រាលី​គួរតែ​គោរព​អធិបតេយ្យភាព បូរណភាព​ទឹកដី ប្រព័ន្ធ​នយោបាយ និង​គំរូ​អភិវឌ្ឍន៍​របស់​គ្នា​ទៅវិញទៅមក ចៀសវាង​ការជ្រៀតជ្រែក​ក្នុង​កិច្ចការ​ផ្ទៃក្នុង​របស់​គ្នា​ទៅវិញទៅមក និង ចាត់ទុក​គ្នា​ស្មើភាព​ទៅវិញទៅមក​។​

​លោក​វ៉ាង​បាន​អំពាវនាវ​ឱ្យ​ភាគី​ទាំង​ពីរ​មើល​ឱ្យបាន​ត្រឹមត្រូវ​នូវ​ការខ្វែងគំនិត​គ្នា​រវាង​ប្រទេស​ទាំង​ពីរ ទទួល​ស្គាល់​ពួក​វា គ្រប់គ្រង​ពួកវា និង ដោះស្រាយ​ពួកវា​។ លោក​បាន​និយាយថា ភាគី​ទាំងពីរ​គួរតែ​បង្កើន​ការយោគយល់​តាមរយៈ​ទំនាក់ទំនង និង​ស្វែងរក​ដំណោះស្រាយ​ដែល​អាច​ទទួលយកបាន​ទៅវិញទៅមក​តាម​រយៈ​ការពិគ្រោះ​យោបល់​គ្នា​៕

​លោកស្រី វ៉ុង​និង​លោកវ៉ាង​ជួប​ពិភាក្សា​គ្នា​នៅ​ទីក្រុង​ប៉េកាំង​កាលពី​ថ្ងៃ​ពុធ