​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ទីភ្នាក់ងារ​សារព័ត៌មាន​ផ្លូវការ​របស់​កូរ៉េខាងជើង KCNA បាន​រាយការណ៍​កាលពី​ថ្ងៃ​សុក្រ​ទី​២៣​ធ្នូ​ថា​ក្រសួងការបរទេស​កូរ៉េ​ខាងជើង​បាន​បដិសេធ​របាយការណ៍​​ដែល​ថា​ខ្លួន​បាន​ផ្តល់​អាវុធ​ដល់​រុស្ស៊ី ដោយ​ហៅ​វា​ថា “​គ្មាន​មូលដ្ឋាន​” និង​ថ្កោលទោស​សហរដ្ឋ​អាម៉េរិក​ចំពោះ​ការផ្តល់​អាវុធ​ដ៏​សាហាវៗ​ដល់​អ៊ុ​យក្រែន​។​

​ប្រព័ន្ធ​ផ្សព្វផ្សាយ​ជប៉ុន​បាន​រាយការណ៍​មុន​នេះ​ថា កូរ៉េ​ខាងជើង​បាន​ដឹក​ជញ្ជូន​អាវុធយុទ្ធភណ្ឌ រួម​ទាំង​គ្រាប់កាំភ្លើង​ធំ​ទៅកាន់​រុស្ស៊ី​តាម​រថភ្លើង​កាលពី​ខែ​មុន​។ សេត​វិមាន​បានបញ្ជាក់​កាលពី​ថ្ងៃ​ព្រហស្បតិ៍​ថា កូរ៉េ​ខាងជើង​បាន​សំរេច​ការប្រគល់​អាវុធ​ដំបូង​ដល់​ក្រុមហ៊ុន​យោធា​ឯកជន​មួយ​របស់​រុស្ស៊ី​។​

​អ្នកនាំពាក្យ​ក្រសួង​បាន​និយាយ​នៅក្នុង​សេចក្តីថ្លែងការណ៍​មួយ​ដែល​ផ្សាយ​ដោយ KCNA ថា​”​របាយការណ៍​មិន​ពិត​របស់​ប្រព័ន្ធ​ផ្សព្វផ្សាយ​ជប៉ុន​ដែល​ថា​កូរ៉េ​ខាងជើង​បាន​ផ្តល់​អាវុធ​ដល់​រុស្ស៊ី​គឺជា​ព័ត៌មាន​​ក្លែងក្លាយ​ដែល​មិន​សម​ហេតុផល​បំផុត ដែល​គ្មាន​តម្លៃ​ក្នុងការ​ធ្វើ​អត្ថាធិប្បាយ​ឬ​ការបកស្រាយ​ណាមួយ​ឡើយ​”​។​

​យោង​តាម​សេត​វិមាន ក្រុមហ៊ុន​យោធា​ឯកជន​រុស្ស៊ី Wagner Group បាន​ទទួល​គ្រាប់បេ​និង​មី​ស៊ី​លពី​កូរ៉េខាងជើង ដើម្បី​ជួយ​ពង្រឹង​កងកម្លាំង​រុស្ស៊ី​ក្នុងប្រទេស​អ៊ុ​យក្រែន ទោះ​បី​ជា​ម្ចាស់​ក្រុមហ៊ុន Wagner លោក យេ​វ​ជេ​នី ព្រី​ហ្គោ​ហ្ស៊ី​ន (Yevgeny Prigozhin) បាន​បដិសេធ​ការអះអាង​នេះ​ថា​ជា “​ការនិយាយ​ខ្សឹបខ្សៀវ​និង​ការប៉ាន់ស្មាន​” ក៏ដោយ​។​

​ម្ចាស់​ក្រុមហ៊ុន Wagner លោក យេ​វ​ជេ​នី ព្រី​ហ្គោ​ហ្ស៊ី​ន និង​ប្រធានាធិបតី​រុស្ស៊ី​លោកពូ​ទីន​

​អ្នកនាំពាក្យ​កូរ៉េ​ខាងជើង​បាន​និយាយថា «​កូរ៉េខាងជើង​នៅ​តែ​មិន​ផ្លាស់ប្តូរ​ជំហរ​ជា​គោលការណ៍​របស់​ខ្លួន​លើ​បញ្ហា “​ប្រតិបត្តិ​ការលក់ដូរ​អាវុធ​” រវាង​កូរ៉េ​ខាងជើង និង​រុស្ស៊ី ដែល​មិន​ធ្លាប់​កើតឡើង​ទេ​» ដោយ​បន្ថែម​ថា វា​ជា​អាម៉េរិក​ដែល​នាំ​អាវុធ​ប្រល័យ​លោក​ជាច្រើន​ប្រភេទ​ទៅ​អ៊ុ​យក្រែន​។​

​នៅក្នុង​សេចក្តីថ្លែងការណ៍​ដាច់ដោយឡែក​មួយ​ក្រសួងការបរទេស​កូរ៉េ​ខាងជើង​ក៏​បាន​ថ្កោលទោស​ចំពោះ​ការប៉ុនប៉ង​របស់​សហ​រដ្ឋ​អាម៉េរិក​ក្នុង​ការចេញ​សេចក្តីថ្លែងការណ៍​របស់​ក្រុមប្រឹក្សាសន្តិសុខ​​អង្គការសហប្រជាជាតិ​ស្តី​ពី​ការបាញ់​មី​ស៊ី​ល​ផ្លោង​អន្តរ​ទ្វីប​ចុងក្រោយបង្អស់​របស់​ខ្លួន​ផងដែរ​។​

​អ្នកនាំពាក្យ​បាន​និយាយ​នៅក្នុង​សេចក្តីថ្លែងការណ៍​ថា “​កូរ៉េ​ខាងជើង​បាន​ព្រមាន​រួចហើយ​និង​ច្បាស់លាស់​ថា​ការប៉ុនប៉ង​ដ៏​ល្ងង់ខ្លៅ​របស់​សហរដ្ឋ​អាម៉េរិក​អាច​បណ្តាលឱ្យមាន​ផលវិបាក​ដែល​មិន​​គួរ​ឱ្យ​ចង់បាន​” ដោយ​ហៅ​ទង្វើ​របស់​សហរដ្ឋ​អាម៉េរិក​ថា​ជា “​ទង្វើ​ដ៏​គ្រោះថ្នាក់​បំផុត​” ដែល​កូរ៉េខាងជើង​ត្រូវតែ​ប្រឆាំង​ជាមួយនឹង​សកម្មភាព​”​។​

​កូរ៉េ​ខាងជើង​បាន​សាកល្បង​កាំជ្រួច​ជាច្រើន​មិន​ធ្លាប់​មាន​ពីមុនមក​ក្នុង​ឆ្នាំនេះ រួម​ទាំង​មី​ស៊ី​ល​ផ្លោង​អន្តរទ្វីប​ដែល​រចនា​ឡើង​ដើម្បី​ទៅ​បាញ់​ដល់​ដីគោក​របស់​សហរដ្ឋ​អាម៉េរិក​ដើម្បី​ផ្គើន​នឹង​ទណ្ឌកម្ម​អន្តរជាតិ​៕

​លោក​គីម​ជុង​អ៊ុន​និង​លោកពូ​ទីន​ជួបគ្នា​នា​ពេល​កន្លង​ទៅ