​ប្រែ​សម្រួលៈ​បំណង​(​ស្ត្រេត​ថែមស៍​,​ស៊ីន​ហួរ​)៖ ការ​ជន់​លិច​ដ៏​ខ្លាំង​បន្ត​ធ្វើអោយប៉ះពាល់​មនុស្ស​ប្រមាណ​២០០.០០០​គ្រួសារ​នៅ​ថៃ​ខាងត្បូង នេះ​បើ​តាម​ការបញ្ជាក់​ពី​អាជ្ញាធរ​កាលពី​ថ្ងៃ​ព្រហស្បតិ៍​។​

​នាយកដ្ឋាន​បង្ការ​និង​សម្រាល​គ្រោះមហន្តរាយ​ថៃ​បា​និយាយថា ប្រតិបត្តិការ​បូមទឹក​និង​ជួយ​សង្គ្រោះ​នៅ​បន្ត​ធ្វើ​នៅ​ពេល​ស្ថានភាព​ទឹកជំនន់​បាន​ល្អ​ប្រសើរ​នៅ​គ្រប់​តំបន់​ប៉ះពាល់​ទាំងអស់​។​ទឹកជំនន់​​នេះ​បាន​ប៉ះពាល់​មនុស្ស​២១០.៥៥២​គ្រួសារ​នៅ​៥៧​ស្រុក​ក្នុង​ខេត្ត​ចំនួន​ប្រាំមួយ មានដូចជា ណា​ខន ស៊ី ថា​ម៉ា​រ៉ា​ត​(Nakhon Si Thammarat) ផា​តា​លុង​(Phatthalung) សុង​ក្លា​(Songkhla) ប៉ាត​តានី​(Pattani) យ៉ាឡា និង​ណារ៉ាត​ធី​វ៉ាត​(Narathiwat)​។​

​កាលពី​ថ្ងៃ​ពុធ សាកសព​មនុស្ស​ប្រាំពីរ​នាក់​ត្រូវបាន​រក​ឃើញ​ក្នុង​តំបន់​ជន់​លិច និង​មនុស្ស​ពីរ​នាក់​រងរបួស​ដោយ​ឧបទ្ទវហេតុ​ពាក់ព័ន្ធ​នឹង​ទឹកភ្លៀង​។​

​ការ​ជន់​លិច​បាន​កើត​ឡើង​នៅ​ពេល​អាកាសធាតុ​រដូវវស្សា​កើតមាន​នៅ​លើ​ឈូង​សមុទ្រ​ថៃ​និង​តំបន់​ខាងត្បូង ដោយ​បង្ក​ការ​ធ្លាក់ភ្លៀង​ចាប់ពី​ថ្ងៃ​អាទិត្យ​ដល់​ថ្ងៃ​ពុធ បង្ក​ការ​ជន់​លិច​ភ្លាមៗ ការបា​ក់ដី​និង​​ខ្យល់​ខ្លាំង​៕

​បុគ្គលិក​ទៅ​ពី​នាយកដ្ឋាន​គ្រោះមហន្តរាយ ចែក​ស្បៀង​និង​ទឹក​ផឹក​ដល់​ប្រជាជន​នៅ​ភាគខាងត្បូង​ដែល​រង​ផល​ប៉ះពាល់​ពី​ជំនន់​នៅ​ក្នុង​ខេត្ត​ណារ៉ាត​ធី​វ៉ាត កាលពី​ថ្ងៃ​២១​ធ្នូ​

​ជំនន់​ប៉ះពាល់​មនុស្ស​២១០.៥៥២​គ្រួសារ​នៅ​៥៧​ស្រុក​ក្នុង​ខេត្ត​ចំនួន​ប្រាំមួយ