​ប្រែ​សម្រួល : កញ្ញា​ដា​លី​ស (CGTN) ៖ ការកើនឡើង​ករណី​ស្លាប់​ដោយកូវី​ដ​១៩​និង​ការសេព​គ្រឿងញៀន​ហួស​កម្រិត​បាន​ជំរុញ​អាយុកាល​រស់នៅ​ជា​មធ្យម​នៅ​អាម៉េរិក​ឈាន​ដល់​កម្រិត​ទាប​បំផុត​ចាប់​​តាំងពី​ឆ្នាំ​១៩៩៦ នេះ​បើ​យោងតាម​របាយការណ៍​ថ្មី​មួយ​ចេញផ្សាយ​កាលពី​ថ្ងៃ​ព្រហស្បតិ៍​ដោយ​មជ្ឈមណ្ឌល​គ្រប់គ្រង​និង​បង្ការ​ជំងឺ​របស់​សហរដ្ឋ​អាម៉េរិក (CDC)​។​

​មាន​អ្នកស្លាប់​សរុប​ចំនួន ៣.៤៦៤.២៣១ នាក់​នៅក្នុង​សហរដ្ឋ​អាម៉េរិក​ក្នុងអំឡុង​ឆ្នាំ ២០២១ គឺ​ច្រើន​ជាង​ចំនួន​សរុប​ដែល​បាន​រាយការណ៍​ក្នុង​ឆ្នាំ​២០២០​ដល់​ទៅ ៨០.៥០២ នាក់ នេះ​បើ​យោងតាម CDC ។​

​យោងតាម CDC​បានឱ្យដឹងថា អាយុ​សង្ឃឹម​រស់​នៅ​ពេល​កើត​សម្រាប់​ប្រជាជន​អាម៉េរិក​បាន​ថយ​ចុះ​ពី ៧៧ ឆ្នាំ​ក្នុង​ឆ្នាំ ២០២០ មក​ត្រឹម ៧៦,៤ ឆ្នាំ​ក្នុង​ឆ្នាំ ២០២១​ដែល​ជា​ការធ្លាក់​ចុះ​សម្រាប់​ឆ្នាំ​ទី​ពីរ​​ជាប់ៗ​គ្នា​។​

​ជំងឺ​បេះដូង​នៅតែ​ជា​មូលហេតុ​នាំមុខគេ​នៃ​ការស្លាប់​នៅ​សហរដ្ឋ​អាម៉េរិក​កាលពី​ឆ្នាំមុន បន្ទាប់មក​គឺ​ជំងឺមហារីក និង កូវី​ដ​១៩​។​

​នៅ​ឆ្នាំ ២០២១ ជនជាតិ​អាម៉េរិក​ជិត ១០៧.០០០ នាក់​បាន​ស្លាប់​ដោយសារ​ការសេព​គ្រឿងញៀន​ហួស​កម្រិត ដែល​កើនឡើង​ជិត ១៦ ភាគរយ​ធៀប​នឹង​ឆ្នាំ ២០២០ នេះ​បើ​យោងតាម CDC ។ ការស្លាប់​ដោយ​ការសេព​គ្រឿងញៀន​ហួស​កម្រិត​បាន​កើនឡើង​ប្រាំ​ដង​ក្នុង​រយៈពេល​ពីរ​ទសវត្សរ៍​កន្លងមក​នេះក្នុង​ប្រទេស​នេះ​៕

​ទិដ្ឋភាព​តាម​ដងផ្លូវ​ក្នុង​ទីក្រុង​ញូវយ៉ក សហរដ្ឋ​អាម៉េរិក ថ្ងៃទី ២០ ខែ​ធ្នូ ឆ្នាំ ២០២២