​ប្រែ​សម្រួលៈ​បំណង​(​ដេល្លី​ម៉េល​​)៖ នាយករដ្ឋមន្ត្រី​ថៃ លោក​ប្រា​យុទ្ធ ចាន់​អូ​ចា បាន​ប្រាប់​សារព័ត៌មាន​កាល​ពី​ថ្ងៃ​សុក្រ​ទី​២៣​ធ្នូ​ថា លោក​នឹង​ស្វះស្វែង​កាន់តំណែង​នាយករដ្ឋមន្ត្រី​​មួយ​អាណត្តិ​ទៀត និង​បាន​ប្រកាស​បេក្ខភាព​នាយក​រដ្ឋមន្ត្រី​សំរាប់​គណបក្ស​ទើប​បង្កើត​ថ្មី​មួយ​សំរាប់​ការបោះឆ្នោត​នៅ​ឆ្នាំក្រោយ​។​

​ប្រា​យុទ្ធ បាន​ឡើង​កាន់​អំណាច​ក្នុងនាម​ជា​មេទ័ព​ក្នុង​រដ្ឋប្រហារ​យោធា​ឆ្នាំ​២០១៤ មុន​ក្លាយជា​នាយក​រដ្ឋមន្ត្រី​ស្របច្បាប់​ក្រោយ​ការបោះឆ្នោត​ឆ្នាំ​២០១៩ តែ​ប្រជាប្រិយភាព​របស់​លោក​បាន​ធ្លាក់ចុះ​ចំពេល​​មាន​សញ្ញា​បែកបាក់​ក្នុង​គណបក្សកាន់អំណាច​។​

​នាយករដ្ឋមន្ត្រី​ប្រា​យុទ្ធ ចាន់ អូ​ចា នឹង​ស្វះស្វែង​រក​អំណាច​មួយ​អាណត្តិ​ទៀត​ក្នុង​ការបោះឆ្នោត​សកល​ដែល​គ្រោង​ធ្វើ​នៅ​មុន​ខែ​ឧសភា​ឆ្នាំ​ក្រោយ​

​លោក​បាន​ប្រាប់​អ្នកយកព័ត៌មាន​នៅ​ក្រៅ​វិមាន​រដ្ឋាភិបាល​ក្នុង​ទីក្រុង​បាងកក​ថា គណបក្ស​ប្រជាជាតិ​ថៃ​ឯកភាព​(United Thai Nation Party)​ដែល​ទើប​បង្កើតឡើង​ថ្មី «​សុំ​គាំទ្រ​ខ្ញុំ​ជាបេ​ក្ខ​​ជន​នាយករដ្ឋមន្ត្រី​សំរាប់ការបោះឆ្នោត​នាពេលខាងមុខ​» ។​

«​ខ្ញុំ​នឹង​បញ្ជាក់​អោយ​ច្បាស់​នៅ​ថ្ងៃនេះ​ថា ៖ ខ្ញុំ​បាន​សំរេចចិត្ត​ចូលរួម​តួនាទី​នេះ »​។​

​លោក​ប្រា​យុទ្ធ​ត្រូវបាន​រំពឹង​ទុក​ជា​ទូទៅ​ថា​នឹង​ចាកចេញ​ពី​គណបក្ស ផា​ឡាង ប្រា​ចា​រ៉ា​ត​(PPRP)​របស់លោក​ដែល​កំពុង​ដឹកនាំ​រដ្ឋាភិបាល​ចំរុះ​បច្ចុប្បន្ន​ក្រោយ​ពី​គណបក្ស​PPRP​បាន​ប្រកាស​កាលពី​សប្តាហ៍​​មុន​ថា ប្រធាន​បក្ស​គឺ​ឧបនាយករដ្ឋមន្ត្រី ប្រា​វីត វង់​ស៊ូ​វ៉ាន​(Prawit Wongsuwan)​នឹង​ជា​បេក្ខជន​នាយក​រដ្ឋមន្ត្រី​របស់​បក្ស​សំរាប់​ការបោះឆ្នោត​នាពេល​ខាងមុ​ខ​។​

​ឧបនាយករដ្ឋមន្ត្រី ប្រា​វីត វង់​ស៊ូ​វ៉ាន(មុខកណ្តាល) ប្រកាស​បេក្ខភាព​នាយក​រដ្ឋមន្ត្រី​សំរាប់​គណបក្ស​PPRP

​សូមបញ្ជាក់​ថា លោក​ប្រា​យុទ្ធ និង​ប្រា​វីត បាន​បំរើ​ក្នុង​ជួរ​យោធា​ថៃ​ហើយ​ជោគវាសនា​នយោបាយ​របស់​អ្នក​ទាំងពីរ​មាន​ភាពប្រទាក​គ្នា​អស់​ពេល​រាប់​ទសវត្ស​រ៍​មក​នេះ​។​ប្រា​យុទ្ធ​បាន​និយាយថា​ទំនាក់ទំនង​​រវាង​លោក​និង​ប្រា​វីត​នៅ​រឹងមាំ ទោះជា​ចែក​ផ្លូវ​នយោបាយ​គ្នា​ក្តី​។​

​ឥឡូវ​បក្ស​ភឿ​ថៃ ដែល​ជា​បក្សប្រឆាំង​កំពុងមាន​ប្រជាប្រិយភាព​ខ្ពស់​ក្រោយ​ការស្ទង់មតិ​ជាច្រើនលើក តែ​រដ្ឋធម្មនុញ្ញ​ថៃ​បច្ចុប្បន្ន​ដែល​ព្រាង​ឡើង​ក្នុងសម័យ​យោធា​គ្រប់គ្រង​ប្រទេស អនុគ្រោះ​ដល់​បណ្តា​គណ​​បក្ស​ណា​ដែល​មាន​ទំនាក់ទំនង​ល្អ​ជាមួយ​យោធា ក្នុងការបង្កើតរដ្ឋាភិបាល​៕