​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ លោក សាម ប៊ែង​មែន ហ្វ្រា​យ (Sam Bankman-Fried)​ត្រូវបាន​ដោះលែង​ដោយ​បង់​ជា​កញ្ចប់​សញ្ញាប័ណ្ណ​តម្លៃ ២៥០ លាន​ដុល្លារ​កាលពី​ថ្ងៃ​ព្រហស្បតិ៍ ខណៈ​គាត់​កំពុង​រង់ចាំ​ការកាត់ទោស​ជុំវិញ​ការដួលរលំ​ក្រុមហ៊ុន​រូបិយប័ណ្ណ​អេឡិចត្រូនិក FTX ដែល​រដ្ឋអាជ្ញា​អាម៉េរិក​ហៅថា​ជា “​ការ​ក្លែងបន្លំ​ដ៏​មហាអស្ចារ្យ​”​។​

​រដ្ឋអាជ្ញា​សហព័ន្ធ​នៅ​ម៉ា​ហា​ថែ​ន (Manhattan) បាន​ចោទប្រកាន់​គាត់​ថា​លួច​លុយ​រាប់ពាន់​លាន​ដុល្លារ​នៅក្នុង​មូលនិធិ​អតិថិជន​នៅ​ក្រុមហ៊ុន FTX​ដើម្បី​ទប់​ការខាតបង់​នៅឯ​មូលនិធិ​ការពារ​​ហានិភ័យ​របស់​គាត់​គឺ​ក្រុមហ៊ុន Alameda Research ។​

​លោក​ប៊ែង​មែន ហ្វ្រា​យ​មិន​ត្រូវ​បាន​ស្នើ​ឱ្យ​សារភាព​ទោស​កាលពី​ថ្ងៃ​ព្រហស្បតិ៍​ទេ​។ ពី​មុន​គាត់​ធ្លាប់​បាន​ទទួលស្គាល់​បរា​ជ័យ​ក្នុង​ការគ្រប់គ្រង​ហានិភ័យ​នៅ​ក្រុមហ៊ុន​FTX​ប៉ុន្តែ​និយាយថា​គាត់​មិន​ជឿ​ថា​គាត់​​ត្រូវ​មាន​ទោស​ព្រហ្មទណ្ឌ​ទេ​។​

​មេធាវី​ការពារ​ក្តី​របស់​គាត់​គឺ​លោក ម៉ាក ខូហិន (Mark Cohen) បាន​បដិសេធ​មិន​ធ្វើ​អត្ថាធិប្បាយ​បន្ទាប់ពី​សវនាការ​នៅក្នុង​តុលាការ​សហព័ន្ធ​ម៉ា​ហា​ថែ​ន​។​

​លោក​រដ្ឋអាជ្ញា នី​កូឡាស រូ​ស (Nicolas Roos) បាន​ប្រាប់​ចៅក្រម​អាម៉េរិក​លោក ហ្គា​ព្រីល ហ្គោ​រិន​ស្តេន (Gabriel Gorenstein)​ថា​កញ្ចប់​ប្រាក់​នៅ​ក្រៅ​ឃុំ​នេះ​នឹង​តម្រូវ​ឱ្យ​ប៊ែង​មែន​ហ្វ្រា​យ​​ប្រគល់​លិខិតឆ្លងដែន​របស់គាត់ ហើយ​បន្ត​ស្នាក់​នៅ​ក្នុងផ្ទះ​ឪពុក​ម្តាយ​របស់​គាត់​នៅ​ទីក្រុង​ប៉ា​ឡូ​អាល់​តូ (Palo Alto) រដ្ឋ​កាលីហ្វ័​រញ៉ា​។​

​គាត់​ក៏​នឹង​ត្រូវ​តម្រូវ​ឱ្យ​ទទួល​ការព្យាបាល​និង​វាយតម្លៃ​សុខភាព​ផ្លូវចិត្ត​ជាប្រចាំ​ផងដែរ​។​

​លោក​រូស​បាន​ហៅ​កញ្ចប់​ធានា​ក្រៅ​ឃុំ​នេះ​ថា​ជា “​សញ្ញាប័ណ្ណ​សុំ​នៅ​ក្រៅ​ឃុំ​ដ៏​ធំ​បំផុត​មិន​ធ្លាប់មាន​”៕

​លោក​ប៊ែង​មែន​ហ្វ្រា​យបង់​លុយ​២៥០​លាន​ដុល្លារ​សុំ​នៅក្រៅ​ឃុំ តែ​នៅ​ក្រោម​ការឃុំខ្លួន​ក្នុងផ្ទះ​ក្នុងពេល​រង់ចាំ​សវនាការ​កាត់ទោស​