​ប្រែ​សម្រួលៈ​បំណង​(​ស្ត្រេត​ថែមស៍​)៖ យ៉ាងហោច​ណាស់​មនុស្ស​១៣​នាក់​បាន​ស្លាប់​និង​១៩​នាក់​រងរបួស​នៅ​ជប៉ុន​ចាប់តាំងពី​ថ្ងៃ​សៅរ៍​មុន ដោយ​អាកាសធាតុ​ត្រជាក់​ខ្លាំង​បាន​នាំមក​ការធ្លាក់​ព្រិលដ៏​ក្រាស់​​រួម​ទាំង​ខ្យល់​ខ្លាំង​នៅ​ទូទាំង​តំបន់​ចាប់ពី​ហុក​កៃដូ​(Hokkaido)​នៅ​ភាគ​ខាងជើង​ដល់​តំបន់​គ្យូ​ស៊ុ​(Kyushu)​នៅ​ភាគ​និរតី​ប្រទេស​។​

​ដោយ​បង្ហាញ​តួលេខ​នេះកាលពី​ថ្ងៃ​សុក្រ រដ្ឋមន្ត្រី​បង្ការ​គ្រោះមហន្តរាយ​និង​នាយករដ្ឋមន្ត្រី ហ្វ៊ុយ​មី​អុ គី​ស៊ី​ដា បាន​អំពាវនាវ​អោយ​ប្រជាជន​មាន​ការប្រុងប្រយ័ត្ន​ខ្ពស់​នៅ​ចុង​សប្តាហ៍​នេះ​ដែល​ចំ​ពេល​ធ្វើ​​ដំណើរ​កម្សាន្តបុណ្យគ្រី​សម៉ាស​(​ណូអែល​)​។​

​ពួក​លោក​បាន​អំពាវនាវ​អ្នក​ដែល​រស់​នៅក្នុង​តំបន់​ដែល​ត្រូវបាន​ព្យាករណ៍​ថា​មាន​ការធ្លាក់​ទឹកកក​ខ្លាំង​អោយនៅក្នុង​ផ្ទះ ដោយ​កុំ​ចេញ​ទៅ​ណា​បើ​មិន​មាន​ការចាំបាច់​។​

​ព្រិល​ធ្លាក់​ខ្លាំង​នៅ​ក្រុង​កា​ណាហ្សា​វ៉ា​(Kanazawa)​នៅ​តំបន់ អ៊ី​ស៊ីកា​វ៉ា​( Ishikawa)​កាលពី​ថ្ងៃ​សុក្រ​

​ព្រិល​ធ្លាក់​ខ្លាំង​នៅ​ក្រុង​អ៊ូ​អូ​នុយ​ម៉ា​(Uonuma)​ក្នុង​តំបន់​នីអ៊ិ​ហ្កា​តា​(Niigata) កាលពី​ថ្ងៃ​២០​ធ្នូ​

​ការហោះហើរ​របស់​យន្ត​ហោះ​ប្រមាណ​២០០​ជើង​ត្រូវបាន​លុប​ចោល​កាលពី​ថ្ងៃ​សុក្រ និង​ការបិទផ្លូវ​ត្រូវ​បាន​រាយ​ការណ៍​ថាមាននៅ​៥៨​កំណាត់​ផ្លូវ​លើផ្លូវ​ល្បឿន​លឿន​ចំនួន​១៥​។​ការ​ដាច់​ភ្លើង​ក៏​ប៉ះពាល់​ដល់​​មនុស្ស​យ៉ាង​តិច​១០.០០០​គ្រួសារ​កាលពី​ថ្ងៃ​សុក្រ ។

​ព្រិល​ក៏​បណ្តាលអោយ​បាក់​ដំបូល​ផ្ទុះ រំលំ​បង្គោល​ភ្លើង​និង​សូ​ឡា​។​

​ក្នុងពេល​ជាមួយគ្នា ទីភ្នាក់ងារ​ឧតុនិយម​ជប៉ុន​ក៏​បាន​ចេញ​ការព្រមាន​អំពី​ការធ្លាក់​ព្រិល​ខ្លាំង​នៅ​ទូទាំង​តំបន់​ធំៗ​នៃ​ប្រទេសរហូត​ដល់​ថ្ងៃ​ចន្ទ​លើកលែង​តែ​មហា​តំបន់​តូ​ក្យូ ដែល​នឹង​មាន​ពន្លឺព្រះអាទិត្យ​​នៅ​ចុង​សប្តាហ៍​នេះ​។​

​ការស្លាប់​ភាគច្រើន​បណ្តាល​មកពី​ការងារយក​ព្រិល​ចេញ ដោយ​ម្ចាស់ផ្ទះ​ខ្លះ​ត្រូវ​ព្រិល​ធ្លាក់​ពី​ដំបូល​មក​សង្កត់​លើ​ក្នុងពេល​សម្អាត​ព្រិល​ចេញពី​ដំបូល​ផ្ទះ​ឬ​ចេញពី​ផ្លូវ​បើកបរ​។​មាន​ម្នាក់​ទំនង​ជា​ស្លាប់​ដោយការពុល​​ផ្សែង​ក្នុងពេល​ដុត​ធ្យូង​ដំ​ដៅ​នៅក្នុង​បន្ទប់​។​ក្រៅពី​នេះ​ស្លាប់​ដោយ​គ្រោះថ្នាក់​ចរាចរណ៍​នៅលើ​ផ្លូវ​រអិល​។​

​នៅ​ជប៉ុន​ខាងលិច​និង​ខាងត្បូង​ជួប​ការធ្លាក់​ព្រិល​ខ្លាំង​រួមមាន​ទីក្រុង​ហ៊ី​រ៉ូស៊ី​ម៉ា​(Hiroshima) កូជី​(Kochi)​និង​គូ​ម៉ា​ម៉ូ​តុ​(Kumamoto)​។​

​កាលពី​ថ្ងៃ​អង្គារ រថយន្ត​ប្រមាណ​៨០០​គ្រឿង​បាន​ជាប់​នៅលើ​ចម្ងាយ​ផ្លូវ​២២,៥​គីឡូម៉ែត្រ​នៅ​ទីក្រុង​ណាហ្កា​អូកា​(Nagaoka)​និង​កាស៊ី​វ៉ា​ហ្សា​គី​(Kashiwazaki)​ក្នុង​តំបន់​នីអ៊ិ​ហ្កា​តា ដោយ​បង្ខំ​អោយ​យោ​​ធា​ជប៉ុន​ចូល​ជួយ​កាយ​ព្រិល​ចេញពី​ផ្លូវ​។​វា​ចំណាយពេល​៣៨​ម៉ោង​ទម្រាំ​ដោះស្រាយ​ការកកស្ទះ​បាន​។​

​កាលពី​ថ្ងៃ​សុក្រ យានយន្ត​ជាង​១០០​ក៏​ជាប់​នៅ​ទីក្រុង​កូជី និង​ឧបទ្ទវហេតុ​ស្រ​ដៀង​គ្នា​ក៏​កើតមាន​នៅ​ទីក្រុង​មួយចំនួន​ទៀត​របស់​ជប៉ុន​៕