ដោយ​៖ សុវណ្ណ​កុម្ភៈ​/​ភ្នំពេញ​៖ ការប្រកួត​កីឡា​វាយ​កូន​បាល់​ជើងឯក​ជាតិ​ឆ្នាំ​២០២២ បាន​បញ្ចប់​ការប្រកួត​ហើយដោយ​ក្រសួងការពារជាតិ​ឈរ​នៅ​កំពូល​តារាង​។ នេះ​ជាការ​ប្រកួត​ដោយ​ប្រើប្រាស់​ថវិកា​ប្រចាំឆ្នាំ​របស់​ក្រសួង​អប់រំ យុវជន និង កីឡា​។

​ក្រុម​កីឡាករ កីឡាការិនី​ក្រសួងការពារជាតិ​គ្រង​តំណែង​ជើងឯក​ឆ្នាំ​២០២២ បន្ទាប់ពី​ក្រុម​នេះ​​ដណ្តើម បាន​មេដាយមាស ២ គ្រឿង និង​ប្រាក់ ២ គ្រឿង​នៃ​ការប្រកួត​កីឡា​វាយ​កូន​បាល់ ជ្រើសរើស​ជើង ឯក​ប្រចាំឆ្នាំ​២០២២ នៅ​ទីលាន​ហ្វឹកហាត់ របស់​សហព័ន្ធ​ក្នុង​ពហុ​កីឡដ្ឋាន​ជាតិ អូឡាំពិក រាជធានី​ភ្នំពេញ ក្រោម​ការប្រើប្រាស់​ថវិកា ឧបត្ថម្ភ​ប្រចាំឆ្នាំ របស់​ក្រសួង​អប់រំ យុវជន និង​កីឡា រៀបចំ​ដោយ​សហព័ន្ធ​កីឡា​វាយ​កូន​បាល់​កម្ពុជា​។​

​លោក ជា ពៅ អគ្គលេខាធិការរង​នៃ​សហព័ន្ធ​កីឡា​វាយ​កូន​បាល់​កម្ពុជា​បាន​ប្រាប់​ឲ្យ​ដឹងថា​យើង​បាន​រកឃើញ​ម្ចាស់​មេដាយមាស​ចំនួន​២​វិញ្ញាសា គឺ​វិញ្ញាសា​វាយ​ឯកត្តជន​នារី មេដាយមាស​បាន​ទៅលើ​កីឡាការិនី ញ៉ែម ស្រី​នុ​ច ខេត្តសៀមរាប មេដាយប្រាក់​បាន​ទៅលើ​កីឡាការិនី ឡៅ ពេជ្រ​រស្មី ក្រសួង​សេដ្ឋកិច្ច និង មេដាយសំរិទ្ធ​បាន​ទៅលើ​កីឡាការិនី ច័ន្ទ​សុវណ្ណ​លីន​ណា ខេត្តសៀមរាប ។

​វិញ្ញាសា​វាយ​គូ​បុរស មេដាយមាស​បាន​ទៅលើ​កីឡាករ ឡុង សំនៀង និង​កីឡាករ ឱ សារិទ្ធ ក្រសួងការពារជាតិ មេដាយប្រាក់​បាន ទៅលើ​កីឡាករ ឃ្លាំង ពន្លក និង​កីឡាករ អ៊ិត ប៊ុន​ធា ក្រសួងការពារជាតិ និង មេដាយសំរិទ្ធ​បាន​ទៅ លើ​កីឡាករ យឿន សុ​ធឿន និង​កីឡាករ ទេព ទី​ម៉ូ​ធី ខេត្តកណ្តាល​។​

​វិញ្ញាសា​វាយ​ទោល​បុរស មេដាយមាស​បាន​ទៅលើ​កីឡាករ​ឡុង​សំនៀង​ក្រសួង​ការ​ពារ​ជាតិ មេដាយប្រាក់​បាន​ទៅ លើ​កីឡាករ ឃ្លាំង ពន្លក ក្រសួងការពារជាតិ និង​មេដាយសំរិទ្ធ​បាន​ទៅលើ​កីឡាករ កីឡាករ ទេព ទី​ម៉ូ​ធី ខេត្តកណ្តាល​។​


​វិញ្ញាសា​វាយ​គូ​នារី មេដាយមាស​បាន​ទៅលើ​កីឡាការិនី ញ៉ែម ស្រី​នុ​ច និង​កីឡាការិនី​ញ៉ែម សុភ័ក្ត្រ ខេត្តសៀមរាប មេដាយប្រាក់​បាន​ទៅលើ​កីឡាការិនី ឡៅ ពេជ្រ​រស្មី និង​កីឡាការិនី សឿ​ម កក្កដា ក្រសួង​សេដ្ឋកិច្ច និង មេដាយសំរិទ្ធ​បាន ទៅលើ​កីឡាការិនី ច័ន្ទ សុវណ្ណ​លីន​ណា និង​កីឡាការិនី ដាន់ រ៉ា​ន់ ខេត្តសៀមរាប​។​

​ការប្រកួត​កីឡា​វាយ​កូន​បាល់​ជ្រើសរើស​ជើងឯក​ប្រចាំឆ្នាំ​២០២២​កីឡាករ​កីឡា​រិ​នី​មាន​ចូលរួម​ចំនួន​៤៩​នាក់​មកពី​ក្លិប​កីឡា​វាយ​កូន​បាល់​ខេត្តសៀមរាប​ក្លិប​កីឡា​វាយ​កូន​បាល់​ខេត្តព្រះវិហារ​ក្លិប​កីឡា​វាយ​កូន​បាល់​ខេត្តកណ្តាល​ក្លិប​កីឡា​វាយ​កូន​បាល់​សេដ្ឋកិច្ច​ក្លិប​កីឡា​វាយ​កូន​បាល់​ក្រសួងការពារជាតិ និង​ក្លិប​កីឡា​វាយ​កូន​បាល់​ឌី​វិ​ន​កូ​។​ឆ្នាំនេះ​សហព័ន្ធ​បានដាក់​បួន​វិញ្ញាសា គឺ​វិញ្ញាសា​ឯកត្តជន​បុរស វិញ្ញាសា​ឯកត្តជន​នារី វិញ្ញាសា​វាយ​គូ​បុរស និង​វិញ្ញាសា​វាយ​គូ​នារី​៕​/R