ដោយ​៖ សុវណ្ណ​កុម្ភៈ​/​ភ្នំពេញ​៖ សម្រាប់​ព្រឹត្តិការណ៍​ស៊ី​ហ្គេម​លើក​ទី​៣១ នៅ​ប្រទេស​វៀតណាម​ប្រាក់រង្វាន់​លើកទឹកចិត្ត​ចំពោះ​ជ័យលាភី​មាន​រហូតដល់​ទៅជា​ង​៤.០០០​លាន​រៀល​​ដែល​ប្រាក់រង្វាន់​នេះ​នឹងត្រូវ​ផ្ដល់ជូន​ដល់​ជ័យលាភី​នា​ដើម​សប្ដាហ៍​ក្រោយ​។​

​ពិធី​ប្រគល់​រង្វាន់​នេះ​នឹង​ធ្វើឡើង​នៅ​ទីស្តីការក្រសួង​ការពារជាតិ​ក្រោម​អធិបតីភាព​ដ៏​​ខ្ពង់ខ្ពស់​សម្តេច​ពិជ័យ​សេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី​ក្រសួងការពារជាតិ និង​ជា​ប្រធាន​គណៈកម្មាធិការ​ជាតិ​រៀបចំ​ការប្រកួត​កីឡា​ស៊ី​ហ្គេម លើក​ទី​៣២ ឆ្នាំ​២០២៣ (CAMSOC) ជូន​ដល់​គ្រូបង្វឹក គ្រូ​ជំនួយ កីឡាករ កីឡាការិនី ដែលជា​ម្ចាស់​មេដាយមាស ប្រាក់ និង​សំរឹទ្ធ ដែល​ដណ្តើមបាន​លើ​១៥​ប្រភេទ​កីឡា មាន​មេដាយមាស ៩​វិញ្ញាសា ប្រាក់ ១៣​វិញ្ញាសា និង​សំរឹទ្ធ ៤១​វិញ្ញាសា សរុប ៦៣​វិញ្ញាសា ក្នុងការ​ប្រកួត​កីឡា​ស៊ី​ហ្គេម លើក​ទី​៣១ នៅ​ទីក្រុង​ហាណូយ ប្រទេស​វៀតណាម កាលពី​ខែឧសភា ឆ្នាំ​២០២២​។

​ប្រាក់រង្វាន់​របស់​រាជ​រដ្ឋាភិបាល​កម្ពុជា ដែល​នឹង​ផ្តល់ជូន​តាម​គោលការណ៍​នេះ​រួមមាន​៖ មេដាយមាស​១​គ្រឿង ទទួលបាន​ប្រាក់រង្វាន់ ៤០​លាន​រៀល មេដាយប្រាក់​១​គ្រឿង​ទទួលបាន ៣០​លាន​រៀល និង​មេដាយ​សំរឹទ្ធ​១​គ្រឿង ទទួលបាន​១៦​លាន​រៀល​។​ចំពោះ​គ្រូបង្វឹក​ទទួលបាន​ប្រាក់រង្វាន់ ១០០​ភាគរយ​ស្មើនឹង​កម្រិត​មេដាយ​ខ្ពស់​ជាងគេ​។ រីឯ​គ្រូ​ជំនួយ​នឹង​ទទួលបាន ៧០​ភាគរយ​នៃ​មេដាយ​ដែល​អត្ត​ព​លិ​ក​របស់ខ្លួន​ដណ្តើមបាន​។ ចំនួន​គ្រូបង្វឹក និង​អត្ត​ព​លិ​ក​ជ័យលាភី​ដែល​នឹង​ទទួលបាន​ប្រាក់រង្វាន់​នេះ សរុប ១៣៥​នាក់ ក្នុងនោះ​គ្រូបង្វឹក​៤២​នាក់ និង​អត្ត​ព​លិ​ក ៩៣​នាក់​៕​R