​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អ្នក​ចាត់ការ​ទូទៅ​លោក អេ​រិក ថេន ហាក់ (Erik ten Hag) បាន​និយាយថា ក្រុម​បិសាច​ក្រហម Manchester United បាន​បន្ត​កិច្ចសន្យា​រយៈពេល​មួយ​ឆ្នាំ​សម្រាប់​កីឡាករ​ជម្រើស​ដំបូង​ចំនួន​បួន​នាក់ រួម​ទាំង​ខ្សែប្រយុទ្ធ​អង់គ្លេស ម៉ាកូ​ស រ៉ា​ស្វត (Marcus Rashford) ផងដែរ ។​

​រ៉ា​ស្វត​, ឌី​ហ្គោ ដាឡុត (Diogo Dalot), ហ្វ្រេត (Fred) និង លូក ស (Luke Shaw) សុទ្ធតែ​ស្ថិត​ក្នុង​ឆ្នាំ​ចុងក្រោយ​នៃ​កិច្ចព្រមព្រៀង​របស់​ពួកគេ ប៉ុន្តែ​មាន​ជម្រើស​ក្នុង​ការបន្ត​កុងត្រា​របស់​ពួកគេ​រហូត​ដល់ ១២ ខែ​។​

​រ៉ា​ស្វត​បាន​រកឃើញ​ទម្រង់​លេង​របស់គេ​ឡើង​វិញ​នៅ​រដូវ​កាល​នេះ​ក្រោម​ការដឹកនាំ​របស់​គ្រូបង្វឹក​ថ្មី​ថេន​ហាក់ ដោយ​លេង​បាន ២០ ប្រកួត​ក្នុង​រាល់​ការប្រកួត​ទាំងអស់ និង​ស៊ុត​បញ្ចូល​ទី​បាន ៩ គ្រាប់​។ ដាឡុត​, ហ្វ្រេត និង ស ក៏​បាន​ចូលរួម​ក្នុង​ក្រុម​យ៉ាងខ្លាំង​ផងដែរ ដោយ​ម្នាក់ៗ​បាន​បង្ហាញ​ខ្លួន​ច្រើនជាង ១៥ ដង​ក្នុង​ការប្រកួត​ទាំងអស់​។​

​លោក ថេន ហាក់ បាន​ប្រាប់​វេបសាយ​របស់​ក្លិប​ក្នុង​ការដកស្រង់​ចេញពី​បទ​សម្ភាស​មួយ​ដែល​គ្រោង​ចុះផ្សាយ​នៅ​ថ្ងៃ​អង្គារ​ខាង​មុខ​ថា “​ពិតណាស់ ខ្ញុំ​អាច​បញ្ជាក់​រឿងនេះ​បាន​”​។​

“​យើង​សប្បាយចិត្ត​ព្រោះ​ក្រុម​កំពុងដំណើរការ​ក្នុងទិសដៅ​ត្រឹមត្រូវ ហើយ​កីឡាករ​ទាំងនោះ​មាន​ការរួមចំណែក​យ៉ាង​ច្រើន​ក្នុងទិសដៅ​នោះ​។ យើង​ចង់​អភិវឌ្ឍ យើង​ចង់​គាំទ្រ​កីឡាករ​ទាំងនោះ ហើយ​យើង​ចង់ឱ្យ​ពួកគេ​បន្ត​ដំណើរការ​របស់​យើង​”​។​

“​ដូច្នេះ នោះ​គឺជា​មូលហេតុ​ដែល​យើង​ឈាន​ដល់​ការសម្រេចចិត្ត​ទាំងនោះ ខ្ញុំ​ប្រាកដថា​ពួកគេ​គឺជា​ការសម្រេចចិត្ត​ដ៏​ត្រឹមត្រូវ​។ យើង​ចង់​បង្កើត​ក្រុម​សម្រាប់​អនាគត សម្រាប់​រយៈពេល​វែង​ជាង​នេះ ហើយ​កីឡាករ​ទាំងនោះ​ត្រូវតែ​ជា​ផ្នែក​មួយ​របស់​វា​”​។​

​អ្នក​ចាំទី ដេវីត ដេ ហ៊ែ (David de Gea) ដែល​ស្ថិត​ក្នុង​ឆ្នាំ​ចុងក្រោយ​នៃ​កិច្ចសន្យា​របស់​គេ​និង​មាន​ជម្រើស​ស្រដៀង​គ្នា​សម្រាប់​ការបន្ត​កុងត្រា​ដែរនោះ មិនទាន់​ឈានដល់​កិច្ចព្រមព្រៀង​ជាមួយ​ក្លិប​នៅឡើយ​ទេ​។ លោក​ថេន​ហាក់​បាន​និយាយ​កាលពី​ខែ​តុលា​ថា​គាត់​សង្ឃឹមថា​កីឡាក​រអេ​ស្ប៉ាញ​រូប​នេះ​នឹង​បន្ត​នៅ​ទឹកដី Old Trafford ៕

​រ៉ា​ស្វត​, ឌី​ហ្គោ ដាឡុត​, ហ្វ្រេត និង លូក ស ត្រូវបាន​ក្លិប​បន្ត​កុងត្រា​ឱ្យ​១​ឆ្នាំ​ទៀត