​ប្រែ​សម្រួលៈ​បំណង​(​ស្ត្រេត​ថែមស៍​)៖ ក្រសួង​សេដ្ឋកិច្ច​របស់​ប្រទេស​ឯកោ​នេះ​បាន​ប្រាប់​ទីភ្នាក់ងារ​សារព័ត៌មាន​បារាំង​កាលពី​ថ្ងៃ​សៅ​រ៍ថា ក្រុម​មេដឹកនាំ​តា​លី​បង់​ដែល​កំពុងកាន់​អំណាច​បា​ន​ប្រាប់​ទៅ​អង្គការ​​ក្រៅ​រដ្ឋាភិបាល​( NGOs)​ជាតិ​និង​អន្តជាតិ​អោយ​ឈប់​ប្រើ​និយោជិត​ជា​ស្ត្រី​បន្ទាប់ពី​ការ​ការតវ៉ា​ប្រឆាំង​នឹង​បំរាម​សម្លៀក​បំពាក់​របស់​ក្រុម​សាសនា​អ៊ីស្លាម​ប្រកាន់​តឹង​មួយ​នេះ​។​

​បទបញ្ជា​គំរាម​ផ្អាក​ច្បាប់​អនុញ្ញាត​អោយ​អង្គការ NGOs​ធ្វើការ​នៅ​ក្នុងប្រទេស​នេះ ក្នុងករណី​មាន​អង្គការ​ណាមួយ​ខកខាន​មិនបាន​ធ្វើ​តាម​ការណែនាំ​។​

​បទបញ្ជា​ចុងក្រោយ​នេះ​កើត​ឡើង​មិន​ដល់​មួយ​សប្តាហ៍​ផង​ក្រោយពី​អាជ្ញាធរ​តា​លី​បង់​ហាម​ស្ត្រី​មិន​អោយ​ទៅ​រៀន​នៅ​សកល​វិទ្យាល័យ ដែលនាំអោយ​មាន​ការ​ថ្កោលទោស​និង​ការប្រឆាំង​តវ៉ា​ជា​សកល​។​

​ក្រុម​តា​លី​បង់​​ពេល​ខ្លួន​ចូល​កាន់កាប់​អំណាច​កាលពី​ខែ​សីហា​ឆ្នាំមុន បាន​សន្យា​គ្រប់គ្រង​អំណាច​ជាមួយ​នឹង​ច្បាប់​វិន័យ​មិនសូវ​តឹងតែង​ដូច​កាល​ពី​ខ្លួន​គ្រប់គ្រង​អា​ហ្វ​ហ្គានី​ស្ថាន​កាលពី​លើក​មុន តែ​​ពួកគេ​នៅតែ​រឹតត្បិត​តឹងតែង​លើ​ស្ត្រី ដោយ​បិទ​ខ្ទប់​ជីវិត​សាធារណៈ​របស់​គេ​។​

​មន្ត្រី​នៅ​អង្គការ​រដ្ឋាភិបាល​មួយ​ពាក់ព័ន្ធ​នឹង​ការងារ​មនុស្សធម៌​បាន​ប្រាប់​ទីភ្នាក់ងារ​សារព័ត៌មាន​បារាំង​ថា «​យើង​នឹង​ផ្អាក​សកម្មភាព​របស់​យើង​ទាំងអស់​ចាប់ពី​ថ្ងៃអាទិត្យ​។​យើង​នឹង​បើក​កិច្ចប្រជុំ​ជា​​មួយ​មន្ត្រី​ជាន់​ខ្ពស់​មក​ពី​អង្គការក្រៅរដ្ឋាភិបាល​ទាំងអស់​ដើម្បី​សំរេច​ថា​ត្រូវ​ដោះស្រាយ​បញ្ហា​នេះ​របៀប​ណា​»​។​

​សូមបញ្ជាក់​ថា អង្គការ​ក្រៅ​រដ្ឋាភិបាល​ជាតិ​និង​អន្តរជាតិ​រាប់សិប បន្ត​ធ្វើការ​ក្នុង​វិស័យ​ជាច្រើន​នៅ​ទូទាំង​តំបន់​ជនបទ​នៃ​ប្រទេស​អា​ហ្វ​ហ្គានី​ស្ថាន ក្រោយ​តា​លី​បង់​ចូល​កាន់​អំណាច​ជា​ថ្មី​កាលពី​ឆ្នាំមុន ហើ​​យ​និយោជិត​របស់គេ​ជាច្រើន​ជា​ស្ត្រី​។​

​វា​ជា​ការវាយប្រហារ​ចុងក្រោយ​បំផុត​លើ​សិទ្ធិ​ស្ត្រី​នៅ​អា​ហ្វ​ហ្គានី​ស្ថាន​។​

​កាលពី​ថ្ងៃ​អង្គារ អាជ្ញាធរ​បាន​ហាម​មិន​អោយ​ស្ត្រី​ទាំងអស់​ទៅ​រៀន​នៅ​សកល​វិទ្យាល័យ ដោយ​បង្ក​ការ​ថ្កោលទោស​ពី​អាម៉េរិក​ អង្គការសហប្រជាជាតិ​និង​ប្រជាជាតិ​កាន់សាសនា​អ៊ីស្លាម​ជាច្រើន​។​ក្រុមប្រ​​ទេស​G7​បាន​និយាយថា ការ​ហាមប្រាម​នេះ​មានន័យ​ស្មើនឹង​«​ឧក្រិដ្ឋកម្ម​ប្រឆាំង​មនុស្សជាតិ​»​។​

​ជា​ការឆ្លើយតប​នឹង​បំរាម​នេះ និស្សិត​ប្រុស​ប្រមាណ​៤០០​នាក់ បាន​ធ្វើ​ពហិកា​មិន​ចូលរួម​ការប្រឡង​មួយ​នៅ​ក្រុង​កាន់​ដា​ហា (Kandahar) ក្នុង​ការបង្ហាញ​ការជំទាស់​ដ៏​កម្រ​មួយ​។​

​ក្រុម​តា​លី​បង់​បាន​ហាម​ប្រាប់​រួចហើយ​មិន​អោយ​ក្មេងស្រី​ជំទង់​ទៅ​រៀន​នៅ​វិទ្យាល័យ និង​ស្ត្រីជាច្រើន​ត្រូវ​បង្ខំ​អោយ​ឈប់​ពី​ការងារ​រដ្ឋ ហាមឃាត់​ការធ្វើដំណើរ​ឆ្ងាយដោយ​គ្មាន​សាច់ញាតិ​ប្រុស​ទៅ​ជាមួយ​និង​បញ្ជា​អោយ​​ស្ត្រី​បិទបាំង​រាងកាយ​ពេល​ចេញពី​ក្រៅ​ផ្ទះ​។​ពួកគេ​ក៏​មិន​ត្រូវ​អនុញ្ញាត​អោយ​ចូល​ក្នង​ឧទ្យា​និង​សួន​សាធារណៈ​ផងដែរ៕

​ស្ត្រី​អា​ហ្វ​ហ្គានី​ស្ថាន ប្រឆាំង​នឹង​បំរាម​មិន​អោយ​ស្ត្រី​ទៅ​សិក្សា​នៅ​សកល​វិទ្យាល័យ​